काठमाडौं : नेपाल लोकतान्त्रिक वैदेशिक रोजगार व्यवसायी एसोसिएसनको यहि वैशाख ७ गते नयाँ नेतृत्वको निर्वाचनका लागि प्रचारप्रसार र आन्तरिक लविङ तीव्ररूपमा अघि बढेको छ । साधारणसभाको मिति सामुन्ने आउँदै गर्दा व्यवसायीहरू प्रतिस्पर्धीलाई आफुभन्दा कनिष्ठ र नेतृत्व क्षमताका दृष्टिकोणले कमजोर देखाउँदै आफुलाई अब्बलका रूपमा प्रचार गर्ने क्रम शुरू भएको छ ।
एसोसिएसनले सम्भव भए आइतबार कार्यसमितिको बैठक बस्ने र उक्त बैठकमा पार्टीका निर्वाचन प्रतिनिधिसमेत राखी अध्यक्ष, पदाधिकारी तथा कार्यसमितिका सदस्यका आका‘क्षीहरुसंग छलफल गराउने तयारी गरिएको बताइएको छ । एसोसिएसनको साधारणसभाले अध्यक्षसहित १९ जनाको निर्वाचन गर्नेछ । एसोसिएसनले निर्वाचनका लागि संस्थापक अध्यक्ष तिलकबहादुर रानाभाटको संयोजकत्वमा तीन सदस्यीय निर्वाचन समिति गठन गरेको छ ।
सत्तारूढ नेपाली कांग्रेसको शुभेच्छुक संस्थाको हैसियतमा रहेको एसोसिएसनको निर्वाचित कार्यसमितिको कार्यकाल दुई वर्षको हुने व्यवस्था छ । एसोसिएसनलाई नेपाली कांग्रेसले महाधिवेशनमा तीन महाधिवेशन प्रतिनिधि पठाउन कोटा प्रदान गरेको छ भने नेपाल वैदेशिक रोजगार व्यवसायी संघको निर्वाचनमा एसोसिएसनले सिफारिस गर्ने उम्मेद्वारले सहजै जित्ने भएपछि व्यवसायी एसोसिएसनको नेतृत्वमा जान तीव्र प्रतिस्पर्धा गरिरहेका छन् ।
कतिपयले रचनात्मक सोचका आधारमा संस्थालाई अघि बढाउने योजना आफुसँग रहेको बताएका छन् । विधान अनुसार अध्यक्ष, वरिष्ठ उपाध्यक्ष, उपाध्यक्ष, महासचिव, सचिव, कोषाध्यक्ष, सहकोषाध्यक्ष र सदस्यहरुसहित २३ सदस्यीय रहने भएपनि कार्यसमितिमा १९ जनाको निर्वाचन हुनेछ । ४ जना कार्यसमिति सदस्य निर्वाचित अध्यक्षले मनोनयन गर्ने व्यवस्था रहेको छ ।
अध्यक्षका लागि हालका वरिष्ठ उपाध्यक्ष तारानाथ अर्याल र पूर्व उपाध्यक्ष ऋषि शर्मा आ–आफ्नो प्यालन बनाएर चुनाव प्रचारमा लागेका छन् । वर्तमान अध्यक्ष नरेन्द्र ढकाल परिस्थिति अनुकूल भए दोहोरिने मनस्थितिमा रहेको भएपनि शनिबारसम्म उनले उम्मेद्वारी सार्वजनिक गरेका छैनन् ।
एसोसिएसनको सदस्यभन्दा पदाधिकारीमा व्यवसायीको आकर्षण बढी देखिएको छ । वरिष्ठ उपाध्यक्षमा भवानी निरौला, किशोर कुमार केसी, थिरमणि पौडेल र जनक खड्का आकांक्षी देखिएका छन् । द्वितीय उपाध्यक्षमा नारायण पराजुली र मित्रदेव घिमिरे, तृतीय उपाध्यक्षमा बाबुलाल मगर (नरेन्द्र) र केशवराज न्यौपाने, महासचिवमा कमल काफ्ले, मेघनाथ भुर्तेल र विनोद जंग केसी, सचिवमा लक्ष्मण पौडेल, कृष्णप्रसाद जैसी, विक्रम श्रेष्ठ, कर्णराज कटुवाल, भोजराज भुषाल, प्रकाश बोहरा, जंग बहादुर ईजम, सहसचिवमा नवीन पोखरेल, तुल्सी पुरी, अमीर बास्तोला र सुरेश ढकालले दाबी गरेको श्रोतले बतायो । कोषाध्यक्षमा राजेश गौतम तथा ईन्द्र आचार्यले आ–आफ्नो तरिकाले मत मागिरहेका छन् ।
कार्यसमितिका सदस्यमा हेमन्त न्यौपाने, किरण न्यापाने, प्रेम दुलाल, हर्क लिम्बू, मान बहादुर कुँवर, हरि केसी, यमबहादुर केसी, विष्णु सापकोटा, सुनिता श्रेष्ठ, माधव भण्डारीलगायतले इच्छा देखाएको बताइएको छ ।
निर्वाचन हुने र प्रतिस्पर्धा पनि पेचिलो बन्न सक्ने आंकलनका आधारमा उम्मेद्वारका आकांक्षीहरूले आफैं खटेर आफ्नो पक्षका व्यवसायीलाई प्रतिनिधि बनाउन लागेका छन् । पार्टीले केन्द्रीय सदस्य सुरेन्द्रराज पाण्डे, पूर्व अध्यक्ष विमलप्रसाद ढकाल, किरण किशोर घिमिरे, तिलबहादुर रानाभाट, प्रज्ञान न्यौपाने, कृष्ण पौडेल र अध्यक्ष नरेन्द्रप्रसाद ढकाललाई सहमतिको आधारमा नेतृत्व चयन गराउने जिम्मेवारी दिई खटाएको छ ।
अध्यक्षका प्रत्यासीका ऐजेण्डा के के छन् ?
तारानाथ अर्याल
अध्यक्षका आकांक्षी वरिष्ठ उपाध्यक्ष तारानाथ अर्यालले आफू एसोसिएसनको कार्यसमितिको सदस्यदेखि महासचिव र वरिष्ठ उपाध्यक्ष भएकोले यसपटक अध्यक्षको स्वभाविक उम्मेद्वार रहेको बताए ।
अर्यालले एसोसिएसन नेपाली कांग्रेसको शुभेच्छुक संस्था भएकोले वैदेशिक रोजगारका समस्या बारेमा पार्टीपंक्ति र अन्य घटक संस्थामा छलफल गराई नेपाल वैदेशिक रोजगार व्यवसायी संघमार्फत समाधान खोज्न अत्यधिक पहल गर्ने ,वैदेशिक रोजगारमा रहेका मेडिकल लगायत सबै प्रकारका सिण्डिकेट हटाउन कठोर कदम अघि बढाउने, रोजगारदाताबाट सेवा शुल्क नपाएको अवस्थामा कामदार पठाउने अन्य मुलुकका ऐजेन्सीले पाउने सरहको सेवा शुल्कका लागि प्रयास गर्ने, कोभिडका कारणले वैदेशिक रोजगार क्षेत्रलाई संकटग्रस्त क्षेत्र घोषणा गरेपनि सो अनुसारको सुविधा नपाएकोले त्यसका लागि पहल गर्ने, वैदेशिक रोजगार ऐन र नियमावलीलाई व्यवसायीमैत्री र कामदारका कर्तव्य तोक्ने गरी परिमार्जन गर्न संघमार्फत पहल गर्ने बताए ।
त्यसैगरी अर्यालले विशेष परिस्थितिका कारणले संघमा संघका पूर्व अध्यक्षको संयोजकत्वमा तदर्थ कार्यसमिति गठन भएकोले सकेसम्म छिटो साधारणसभा र नयाँ कार्यसमितिको निर्वाचन गराउने वातावरणका लागि एसोसिएसनका तर्फबाट आवश्यक परामर्श र पहल गर्ने पनि आफ्नो योजना रहेको बताए ।
ऋषि शर्मा
अध्यक्षका अर्का आकांक्षी ऋषि शर्माले आफु विगत दुई दशकदेखि निरन्तर पेशामा रहेको, विगतमा उपाध्यक्ष र वरिष्ठ उपाध्यक्षको जिम्मेवारी कुशलतापूर्वक सम्हालेको, संघको निर्वाचनमा तिलकबहादुर रानाभाटको पालादेखि नै लोकतान्त्रिक पक्षधरलाई जिताउन निःस्वार्थरूपमा खटेको, सबै पक्षसँग समन्वयकारी भूमिका निभाउन सक्ने भएकोले आफुलाई एसोसिएसनका पूर्वअध्यक्ष, सल्लाहकार तथा वर्तमान कार्यसमितिको समर्थन रहेको दाबी गरे ।
उनले अध्यक्षमा निर्वाचित भएपछि अत्यन्तै अव्यवहारिक मानिएको संख्या सयको समस्याको स्थायी समाधान खोज्ने, सेवा शुल्क परिमार्जन गरी दक्षिण एशियाली मुलकसरह बनाउन पहल गर्ने, मागपत्र प्रमाणीकरणमा रहेको समस्यादेखि बेलाबेलामा उत्पन्न हुने समस्याहरूको समाधानका लागि मातृपार्टी नेपाली कांग्रेस, मन्त्रालय विभाग र अन्य संघसंस्थासँग छलफल, समन्वय र पहल गर्ने बताए ।
शर्माले आफु नेपाली कांग्रेसको सिद्धान्त र आदर्शमा निरन्तर प्रतिवद्ध र क्रियाशील रहेकोे भन्दै नेपाली कांग्रेसको गत महाधिवेशनमा सुर्खेतबाट अत्याधिक लोकप्रिय मतले महाधिवेशन प्रतिनिधिमा छानिएका कारणले पनि अन्य प्रतिस्पर्धीले भन्दा आफुले एसोसिएसनलाई सशक्त, प्रभावकारी र नवीन सोचका आधारमा नेतृत्व दिनसक्ने आत्मविश्वास रहेको बताए । उनले भने, ‘म कानूनको विद्यार्थी पनि भएकोले समस्याहरूको जटिलता र समाधान बुझेको छु अन्य प्रतिस्प्रधीले भन्दा एसोसिएसनलाई चुस्त नेतृत्व प्रदान गर्न सक्छु ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies