नुवाकोट : भदौ १० गते त्रिशूली नदीमा आएको विनाशकारी बाढीमा ज्यान गुमाएकाहरूको सुगतिको कामना गर्दै बौद्ध भिक्षुहरूले नुवाकोटको देवीघाट पुगेर प्रार्थना गरेका छन् ।

काठमाडौंको बूढानीलकण्ठस्थित बोधिसत्त्व विहारका भिक्षुहरूले देवीघाट पुगेर बाढी तथा पहिरोमा परी ज्यान गुमाएकाहरूले सुगति प्राप्त गरून् र सुखावती भुवनमा वास होस् भन्ने कामना गर्दै धार्मिक अनुष्ठान तथा प्रार्थना गरेका हुन् ।

भदौ १० गते रसुवाको उच्च हिमाली क्षेत्रमा आएको बाढीले त्रिशूली नदीको तटीय क्षेत्रमा ठूलो जनधनको क्षति पुर्‍याएको छ। बाढीको प्रभाव रसुवाको टिमुरे, स्याफ्रुबेंसी, बेत्रावती, त्रिशूली हुँदै नुवाकोट, धादिङलगायतका विभिन्न क्षेत्रमा परेको छ । बाढीका कारण घर, सडक, पुल, बजार तथा अन्य भौतिक संरचनामा क्षति पुगेको छ भने ठुलो संख्यामा मानिस प्रभावित भएका छन्। बाढीमा परी ज्यान गुमाएकाहरूको शव विभिन्न स्थानबाट उद्धार गरी व्यवस्थापन गर्ने तथा बेपत्ताको खोजी कार्य अझै जारी छ ।

उपलब्ध विवरणअनुसार बाढी तथा विपद्का घटनामा हालसम्म १ हजार ३४१ जनाको मृत्यु, ४ हजार ९९६ जना बेपत्ता र ६ हजार ७५ जना घाइते भएका छन्। यस्तै, १३ हजार १०४ जनाको उद्धार गरिएको छ। खोज, उद्धार तथा राहतका लागि २१ हजार ४६५ जना सुरक्षाकर्मी परिचालन गरिएको छ । बाढीपछि त्रिशूली नदीमा बेपत्ता भएकाहरूको खोजीका लागि नेपाली सेना, नेपाल प्रहरी र सशस्त्र प्रहरीसहितका सुरक्षा निकाय परिचालन भएका छन्। नदी तथा नदी किनारका जोखिमपूर्ण क्षेत्रमा खोजी तथा उद्धार कार्यलाई निरन्तरता दिइएको छ ।

देवीघाटमा गरिएको प्रार्थनाका क्रममा भिक्षुहरूले विपद्मा ज्यान गुमाएकाहरूप्रति श्रद्धाञ्जली अर्पण गर्दै दिवंगत आत्माको शान्ति र सुगतिका साथै बेपत्ताहरूको शीघ्र खोजी तथा परिवारजनमा धैर्य धारण गर्ने शक्ति प्राप्त होस् भन्ने कामना गरेका थिए। साथै विपद्‍बाट प्रभावित तथा घाइतेहरूको शीघ्र स्वास्थ्यलाभ र विस्थापित परिवारको पुनर्स्थापनाका लागि पनि प्रार्थना गरिएको थियो ।