.png)
पवन जयसवाल/मध्यान्ह
नेपालगञ्ज, बाँके : बाँकेमा नवौं विश्व माटो दिवस मनाइएको छ । माटो तथा मल परीक्षण प्रयोगशाला खजुरा बाँकेको आयोजनामा सोमबार नवौं माटो दिवस मनाइएको हो ।
यस्तै माटो दिवसको अवसरमा कोहलपुर नगरपालिकाको कार्यालयमा अन्तरक्रिया कार्यक्रम समेत गरिएको थियो । सो कार्यक्रममा लुम्बिनी प्रदेश र बाँके जिल्लामा माटोको अवस्था विषयमा प्रस्तुतिकरण मार्फत प्रकाश परिएको थियो । माटो तथा मल परीक्षण प्रयोगशाला खजुरा बाँकेका प्रमुख कोमल शाहीले माटोको अवस्थाका विषयमा प्रस्तुतिकरण गरेकी थिइन् ।
प्रयोगशालाको तथ्यांक अनुसार बाँकेमा चालु आर्थिक वर्ष २०७९/०८० को हालसम्मको अवधिमा ३ हजार एक सय ३७ वटा माटोको नमुना परीक्षण गरिएको छ । जस अनुसार बाँकेमा २३ प्रतिशत माटोमा अम्लियपना, ३७ प्रतिशत माटोमा तटस्थापना र ४० प्रतिशत माटोमा छरियपना भेटिएको कार्यालय प्रमुख शाहीले बताइन् ।
यस्तै जिल्लामा माटोको प्रांगरिक पदार्थ जाँच गर्दा एक प्रतिशत माटोमा मात्रैे धेरै प्रांगरिक पदार्थ भेटिएको छ भने ४ प्रतिशत माटोमा मध्यम र ९५ प्रतिशत माटोमा कम मात्रामा प्रांगारिक पदार्थ भेटिएको कार्यालयले जनाएको छ । यसरी माटोको उर्वराशक्तिमा ह्रास आउँदा सहभागीहरुले चिन्ता व्यक्त गर्दै सुधार गर्नुपर्नेमा जोड दिएका थिए ।
उक्त कार्यक्रममा कोहलपुर नगरपालिकाका उपमेयर संगीता सुवेदीले किसानहरुले रासायनिक मलभन्दा प्रांगारिक मललाई बढी प्रथामिकता दिनुपर्ने बताइन् । त्यसका लागि कोहलपुर नगरपालिकाबाट आवश्यक पहल चाल्ने समेत उनले बताइन् ।
यस्तै क्षेत्रीय कृषि अनुसन्धान केन्द्र खजुराका निर्देशक समीर अहमदले बढ्दो शहरीकरण र औद्योगीकरणका कारण माटो बिग्रिँदै गएको बताए । कृषि अयोग्य भूमिमा मात्रै शहरीकरण तथा औद्योगीकरण गर्नुपर्ने उनको भनाइ थियो ।
कार्यक्रममा माटोको उर्वराशक्ति बढाउन तथा माटो बिग्रिनबाट जोगाउनका लागि रासायनिक मलको सट्टामा गोबर मल र हरियो मलको प्रयोग गर्नुपर्ने सहभागीहरुको सुझाव थियो ।
कार्यक्रममा बाली संरक्षण प्रयोगशाला खजुरा बाँकेका प्रमुख देवेश कुमार मिश्र, कोहलपुर कृषि शाखा प्रमुख चन्द्र बहादुर बुढा, कृषि अधिकृत दिनेश कुमार भट्टाराई, कृषि तथा सहकारी पदाधिकारी, किसान तथा विद्यार्थीहरुको सहभागिता रहेको थियो ।
.JPG)
