मानबहादुर बिश्वकर्मा/मध्यान्ह
कालीकोट : कालीकोटको रास्कोट नगरपालिकाले नगर प्रहरी भर्ती गर्न १५ दिने सार्वजनिक सूचना जारी गरेको छ । रास्कोट नगरपालिकाले नगरको सेवाका लागि करारमा नगर प्रहरी व्यवस्थापन तथा सञ्चालन सम्बन्धी कार्यविधि २०७९ निर्माण गरी त्यसअनुसार नगर प्रहरी भर्ना गर्न लागेको हो ।
नगरले १५ दिने सार्वजानिक सूचना जारी गर्दै खुला ८, महिला ३, दलित २ र शहीद तथा बेपत्ता परिवारबाट २ जना गरी १५ जनाको विज्ञापन खुलाएको छ । रास्कोट नगरपालिका प्रमुख धर्मराज शाही पोषणले स्थानीय तहले पाएको अधिकारको प्रयोग गरी नगरको शान्ति सुरक्षा कायम गर्न र स्थानीय युवाहरुलाई रोजगारी सिर्जना गर्न नगर प्रहरी भर्ना गर्न लागेको बताए ।
स्थानीय तह सञ्चालन ऐन २०७४ को दफा १९ को उप दफा २ को (क) मा भएको व्यवस्था अनुसार जिल्लामा पहिलो पटक रास्कोट नगरले नगर प्रहरीको भर्तीका लागि सार्वजनिक सूचना जारी गरेको हो ।
नगर प्रमुख शाहीले भने, 'कानूनले दिएका अधिकारीहरुको प्रयोग गरी जनतालाई गाउँमै सिंहदरबार आएको अनुभूति गराउन हामी स्थानीय सरकारलाई सबल, सक्षम र विधि पद्धतिअनुसार सञ्चालन गरी प्रभावकारी र उदाहरणीय सरकार बनाउने अभियानमा लागि परेका छौं ।'
नगरले यस्तो सूचना जारी गरेपछि स्थानीय युवाहरू हर्षित भएका छन् ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies