सर्लाही : बागमती नदीको पानीले सर्लाहीको बलरा नगरपालिका डुबानमा परेको छ । गत बिहीबारदेखि शनिबारसम्म परेको पानीले बागमती नदीमा बनाइएको तटबन्ध विभिन्न ठाउँमा भत्किन गइ बलरा डुबानमा परेको हो । बलराको दक्षिणी सीमाना दशगजा लगत्तै भारतले बनाएको सैनिक सडकका कारण बलरामा पानी थुनिएको छ । 

भारतीय पक्षले सैनिक सडक निर्माण गर्दा पानीको प्राकृतिक निकास नै बन्द हुँदा बलरा डुवानमा परेको हो । बलरा–४ स्थित ईलाका प्रहरी कार्यालय बलरा र बलरा –९ स्थित सशस्त्र प्रहरीको बेस क्याम्प अचलगढ छतौना पनि डुबानमा परेका छन् । 

बलराका अधिकांश भाग डुबानमा परेको हो । शनिबार साँझदेखि बलरामा प्रवेश गरेको बाढीको पानीले बलरामा अधिकांश घरको भुइँतल्लामा पानी प्रवेश गरेको छ । बलरामा सर्वसाधारणको सम्पूर्ण आवागमन ठप्प रहेको छ । सडक र गल्लीमा कम्तीमा दुई फिटसम्म पानी जमेको छ । सोमबार साँझसम्म पनि पानी कम हुन सकेको छैन ।

बलरा नगरपालिकाका नगर प्रमुख रामाशंकर कुशवाहाले यस बर्ष मात्र भारतीय पक्षले दसगज्जा नजिकै पानीको निकाश नदिइ सैनिक सडक निर्माण गर्दा नगरपालिका भरी पानी जमेको बताए । उनले बागमती नदीमा पानीको सतह घटेपछि मात्र नगरपालिकामा जमेको पनि पुनः बागमती नदीमा फिर्ता जाने बताए । 

उनका अनुसार बाढीले नगरपालिकाको वडा नं.१,२ र ३ लाई बढी प्रभावित गरेको छ भने वडा नं.४,५,१० र ११ लाई आंशिक रुपमा प्रभावित गरेको छ । त्यस्तै, नगरपालिकाभित्र बाढीले अहिलेसम्म १ जनाको मृत्यु भएको छ भने अन्य १ जना बेपत्ता रहेका छन् ।

जिल्लाका सबै साना र ठूला नदीमा पानीको बहाव अत्यन्त धेरै भएकोले जिल्लाको लाखौं बिगहा उखु, धान, हल्दी र विभिन्न तरकारी खेती डुबानमा परेको किसानहरुले बताएका छन् । 

जिल्ला प्रहरी कार्यालय सर्लाहीका अनुसार बाढीले हालसम्म जिल्लामा पुर्णरुपमा क्षति भएको घर संख्या २ सय ९० रहेको छ भने बाढीले ५ सय ७४ घरमा आंशिक रुपमा क्षति पुर्‍याएको छ । त्यस्तै,१६ सय ३९ घरमा बाढी प्रवेश गरेको छ ।

सुरक्षाकर्मीलाई उद्धारका सबै उपाय अपनाउनका लागि निर्देशन दिइएको र अहोरात्र खटेर सुरक्षाकर्मीले सर्वसाधारणको बाढी र पानीजन्य समस्यामा साथ दिइरहेको सर्लाहीका प्रमुख जिल्ला अधिकारी गोपाल कुमार अधिकारीले जानकारी गराएका छन् ।