वीरगञ्ज : वीरगञ्ज महानगरपालिकाले नगरक्षेत्रका सामुदायिक र निजी विद्यालयमा अध्यनरत छात्राहरुलाई कक्षा ६ देखि १२ सम्मका करिब १५ हजार छात्राहरुलाई आत्मरक्षा तालिम प्रदान गरेको छ ।
वीरगञ्जको आदर्शनगरस्थित रंगशालामा आयोजित उक्त कार्यक्रमको उद्घाटन खानेपानी मन्त्री प्रदीप यादवले गरेका थिए । सो कार्यक्रमको प्रशिक्षण सत्रमा भारतका प्रसिद्ध मार्शल आर्ट प्रशिक्षक डा. चिता यजनेश शेट्टीले छात्राहरुलाई आत्मरक्षाका विविध कला सिकाएका थिए । नेपाल भारत सहयोग मञ्चको समन्वयमा भएको यो तालिमले गिनिज बुक अफ वर्ल्ड रेकर्डमा वीरगञ्ज महानगरको नाम दर्ता गराउने लक्ष्य रहेको छ ।
मन्त्री यादवले तालिमको उद्घाटन गर्दै महिला सशक्तिकरणका लागि सरकार ठोस कार्यक्रमहरूसहित अघि बढिरहेको उल्लेख गरे । मन्त्री यादवले मन्तव्यको क्रममा तालिमले छात्राहरुलाई आत्मविश्वासी र सक्षम बनाउँदै महिला हिंसाका घटनाहरुको प्रतिकार गर्न प्रेरित गर्ने विश्वास व्यक्त गरे । साथै, भारतका ख्यातिप्राप्त प्रशिक्षकले निःशुल्क प्रशिक्षण प्रदान गर्दा दुई देशबीचको सम्बन्ध थप बलियो हुने धारणा पनि मन्त्री यादवले राखे ।
त्यसैगरी वीरगञ्ज महानगर पालिकाका प्रमुख राजेशमान सिंहले यो तालिम वीरगञ्जका विद्यालयमा प्रत्येक हप्ता नियमित रुपमा सञ्चालन गरिने जानकारी गराए । उनका अनुसार १५ हजार एक सय छात्राहरुले तालिमका लागि नाम दर्ता गराएका थिए । सो विवरणसहित गिनिज बुक अफ वर्ल्ड रेकर्डमा पठाइसकिएको जानकारी समेत दिए ।
महानगर प्रमुख सिंहले महिलाहरुलाई रातको समयमा निर्धक्क हिँड्न सक्ने वातावरण निर्माणको प्रतिबद्धता व्यक्त गर्दै वीरगञ्जका छोरीले डर बिना हिँड्न सक्ने अवस्था सिर्जना गर्ने बताए ।
सो कार्यक्रममा वीरगञ्ज महानगर पालिकाका उपप्रमुख इम्तियाज आलमले छात्राहरुको हिम्मतलाई सराहना गर्दै आत्मरक्षाको सीपले उनीहरुलाई आत्मविश्वासी बनाउने बताए । अब सामुदायिक तथा निजी विद्यालयकामा हरेक शुक्रबार आत्मरक्षा तालिम शुरु गर्ने बताए । यो तालिमले छोरीहरुले भय मुक्त हिँड्ने बताए । तालिमका मुख्य प्रशिक्षक मास्टर चिताले आत्मरक्षाको कला भगवानको पूजा जस्तै पवित्र भएको उल्लेख गर्दै यसले संकटको बेला सहयोग पुग्ने बताए ।
उक्त कार्यक्रममा प्रतिनिधिसभा सदस्य प्रभु हजरा, प्रदेश सांसद वीणा शर्मा, प्रमुख जिल्ला अधिकारी गणेश अर्याल, प्रहरी उपरीक्षक कुमोद ढुंगेल, भारतीय महावाणिज्य दूत देवी सहाय, र अन्य विशिष्ट व्यक्तिहरू वडा अध्यक्षहरु विभिन्न संस्थाका पदाधिकारीहरु लगायतको उपस्थिति रहेको थियो ।
