सकसमा संस्थापन

दिवाकर अधिकारी/मध्यान्ह

काठमाडौं : नेकपा एमालेका अध्यक्ष केपी शर्मा ओलीले शुक्रबार उपत्यका विशेष प्रदेश कमिटीको उद्घाटन गर्दा पनि सर्वसम्मत नेतृत्व चयन गर्न आग्रह गरे । अध्यक्ष ओलीले यसअघि सम्पन्न प्रदेश अधिवेशनहरुमा पनि सर्वसम्मत नेतृत्व चयनको अपिल गरिरहेका छन् । तर कुनैपनि प्रदेशमा सर्वसम्मत हुन सकिरहेको छैन । 

लुम्बिनी, बागमती, कोशी, कर्णाली हुँदै गण्डकीको प्रदेश अधिवेशनमा पनि मतदान भयो । यी सबै प्रदेशको नेतृत्व मतदानबाट चयन भएको छ । अर्को संयोग, सवै प्रदेशमा अध्यक्ष केपी शर्मा ओलीको समर्थनमा एउटा प्यानल बन्ने र त्यसमा नसमेटिएका नेताहरुले अलग प्यानल बनाएर चुनाव लडिरहेका छन् । 

चुनाव भएका मध्ये लुम्बिनी, कर्णाली र गण्डकीमा अध्यक्ष ओलीले प्रस्ताव गरेका नेता पराजित भएका छन् । लुम्बिनीमा हरि रिजाल, कर्णालीमा मीनबहादुर शाही र गण्डकीमा मायानाथ अधिकारीलाई अध्यक्ष ओलीको समर्थन थियो । महासचिव शंकर पोखरेलमार्फत् ओलीले अगाडि सारेका नेता मध्ये कोशी र बागमतीमा मात्रै जितेका छन् । कोशीमा घनश्याम खतिवडालाई ओलीको समर्थन थियो । 

खतिवडाले विनोद ढकाललाई ८२ मतले हराउँदै प्रदेश अध्यक्ष जिते । यति सानो मतान्तरले हारजित भएपछि अध्यक्ष ओलीले चुनावी प्रक्रियाप्रति नै असन्तुष्टि जनाएका थिए । निर्वाचन समितिमा बसेका व्यक्तिप्रति प्रश्न गरेका थिए । बागमतीमा पनि ओलीको समर्थन पाएका कैलाश ढुंगेलले इतर समूहका कृष्ण दाहाललाई हराए । यो प्रदेशमा अरु भन्दा मतान्तर बढी थियो । 

यद्यपि दुई मत धेरै ठूलो अन्तर नभएको दाहाल बताउँछन् । ‘६ सय ल्याएर जित्नुभयो । तर सवै नेता लाग्दा पनि मैले ४ सय ल्याए । मैले ल्याएको मत थोरै होइन’, भन्छन् । 

तर लुम्बिनीमा इतर समूहबाट उम्मेदवार बनेर राधाकृष्ण कँडेलले जिते । उनले दुई मतले मात्रै जितेपनि त्यसको सन्देश भने ठूलो थियो । किनकि महासचिव पोखरेलको यो गृहप्रदेश थियो । कर्णालीमा संस्थापनले अगाडि सारेका शाहीलाई हराउँदै गुलावजंग शाहले सानदार जित निकाले । शुक्रबार मात्रै सकिएको गण्डकी प्रदेशको चुनावमा त संस्थापन समूहको प्यानल नै पराजित भयो । 

उपमहासचिव पृथ्वीसुब्बा गुरुङले अगाडि सारेको प्यानलले नै जितेको थियो । खगराज अधिकारीलाई अगाडि सारेर अध्यक्ष ओली र महासचिव पोखरेलले समर्थन गरेको मायानाथ अधिकारीलाई हराउँदै नवराज शर्माले जितेका थिए । अरु चार पदमा पनि शर्माकै प्यानलले जित्यो । यसको असर अधिवेशन हुन बाँकी सुदूरपश्चिम र मधेशमा पनि पर्ने नेताहरु बताउँछन् । 

प्रधानमन्त्री दाहाल र अध्यक्ष नेपालबीच सरकारलाई प्रभावकारी बनाउनेबारे छलफल

काठमाडौं : प्रधानमन्त्री पुष्पकमल दाहाल ‘प्रचण्ड’ र सत्ता साझेदार नेकपा एकीकृत समाजवादीका अध्यक्ष माधवकुमार नेपालबीच सरकारलाई प्रभावकारी बनाउने बारेमा छलफल भएको छ । 

सिंहदरबारस्थित प्रधानमन्त्री तथा मन्त्रिपरिषद् कार्यालयमा आज भएको भेटमा उनीहरुबीच सरकारको प्रभावकारिता, समाजवादी मोर्चाको अभियान, मुलुकको अर्थतन्त्र, संसद्को चालु अधिवेशन तथा संयुक्त राष्ट्र संघका महासचिवको नेपाल भ्रमणलगायत विषयमा कुराकानी भएको थियो । 

भेटपछि सञ्चारकर्मीसँग कुराकानी गर्दै अध्यक्ष नेपालले सरकारलाई प्रभावकारी बनाउनेलगायत समसामयिक विषयमा प्रधानमन्त्री दाहालसँग छलफल भएको जानकारी दिए । “सत्तारुढ दलहरुको बैठक बसेर सरकारलाई प्रभावकारी बनाउने, अर्थतन्त्रमा देखिएका समस्या समाधान गर्न विज्ञसँग छलफल गर्ने विषयमा कुराकानी भयो”, उनले भने । 

सत्ता गठबन्धनको बैठक बसेर दलका बीचमा विभिन्न मुद्दामा समान धारणा बनाउने विषयमा पनि छलफल भएको उनले जानकारी दिए । दुई पार्टीबीचका सम्बन्धलाई घनिभूत र बलियो बनाउने विषयमा पनि गम्भीर कुराकानी भएको उनले बताए । “प्रदेश, जिल्ला र तल्ला कमिटीसम्म दुई पार्टीबीचका सम्बन्धलाई प्रभावकारी बनाउने, गुनासा तथा समस्या समाधान गर्ने बारेमा कुराकानी भयो”, उनले भने । 

भेटमा सरकारका विभिन्न निकायमा हुने नियुक्तिका बारेमा पनि कुराकानी भएको अध्यक्ष नेपालले जानकारी दिए । मन्त्री, नीति तथा आयोग एवम् राजनीतिक नियुक्तिका सम्बन्धमा दलहरुबीच भएको सहमति पालना नभएकामा अध्यक्ष नेपालले प्रधानमन्त्री दाहालको ध्यानाकर्षण गराएका थिए । 

संयुक्त राष्ट्र संघका महासचिवको आसन्न नेपाल भ्रमण, भेटघाट तथा संसद्मा सम्बोधनलगायत विषयमा प्रधानमन्त्रीसँग छलफल भएको उनले जानकारी दिए ।  

एमाले प्रदेश कमिटीको अधिवेशन शुरु

काठमाडौंः नेकपा (एमाले)का अध्यक्ष केपी शर्मा ओलीले पार्टीको उपत्यका विशेष प्रदेश कमिटीको अधिवेशनको शुक्रबार उद्घाटन गरेका छन् ।

राष्ट्रियसभा गृहमा आयोजित कार्यक्रममा अध्यक्ष ओलीले अधिवेशनको उद्घाटन गर्दै सर्वसम्मत नेतृत्व चयन गर्न आग्रह गरेका हुन्।

‘कतिपय विपक्षीहरूले अधिवेशनको सन्दर्भमा टिकाटिप्पणी गर्ने गरेको एमालेमा भिडन्त भयो भनेर हौवा फैलाएका छन्, हारजित हुँदा मन दुख्न सक्छ, सहमति गर्नुस् । सहमति नभएमा लोकतान्त्रिक अभ्यास त छँदैछ’, उनले भने ।

कार्यक्रममा एमालेका महसाचिव शङ्कर पोखरेलले मुलुकमा आफ्नो पार्टीले एकल बहुमत प्राप्त गरेमा मात्रै समृद्ध नेपालको राष्ट्रिय आकाङ्क्षा पूरा हुने बताए ।

एमालेका अधिकांश भौगोलिक प्रदेश कमिटीका अधिवेशन सकिन लाग्दा पूर्वनिर्धारित तालिका अनुसार गैह्रभौगोलिक र बुद्धीजीवी–कर्मचारी क्षेत्रका सदस्य आबद्ध यस प्रदेश कमिटीको अधिवेशन भएको हो । उद्घाटनअघि शान्तिबाटिका (रत्नपार्क) बाट प्रदर्शनीमार्गसम्म पदयात्राको आयोजना गरिएको थियो ।

तीन सय चार प्रतिनिधि रहने अधिवेशनले ७५ सदस्यीय नयाँ नेतृत्व चयन गर्नेछ । यस प्रदेश कमिटी मातहत बुद्धिजीवि विशेष, मजदुर, विद्यार्थी र उद्योग–व्यावसय गरी चार जिल्ला कमिटी र ५८ इलाका कमिटी रहेको कमिटीका अध्यक्ष प्रेमकुमार पराजुलीले जनाए ।

एमालेले मात्र समृद्धिको यात्रा पूरा गर्न सक्छ : महासचिव पोखरेल

काठमाडौंः नेकपा (एमाले)का महासचिव शङ्कर पोखरेलले महासचिव पोखरेलले वर्तमान सरकारले नागरिकका समस्या समाधान गर्न नसकेको बताएका छन् । उनले यो सरकारले मुलुकका हरेक क्षेत्रमा सकारात्मक ऊर्जा प्रदान गर्न नसकेको आरोप लगाउँदै सरकारका कारण नै मुलुकको अर्थतन्त्र सङ्कटतर्फ धकेलिएको बताए । 

पार्टीको उपत्यका विशेष प्रदेश कमिटीको प्रथम अधिवेशनको शुक्रबार उद्घाटन गर्दै उनले हालैका दिनमा देशमा मूल्यवृद्धि आकासिएको भए पनि सरकारले महँगी नियन्त्रणमा कुनै प्रभावकारी कदम चाल्न नसकेको बताए । 

महासविच पोखरेलले मुलुकमा आफ्नो पार्टीले एकल बहुमत प्राप्त गरेमा मात्रै समृद्ध नेपालको राष्ट्रिय आकाङ्क्षा पूरा हुने तर्क गरे । उनले विगतमा अध्यक्ष केपी शर्मा ओली नेतृत्वको सरकारले समृद्धि र विकासका लागि निर्वाह गरेको भूमिका राष्ट्रिय र अन्तर्राष्ट्रिय क्षेत्रमा स्थापित भए पनि नेकपाको विभाजन र एमालेविरोधी गठनबन्धनका कारण उक्त यात्रा गन्तव्यमा पुग्न नसकेको उल्लेख गरे । 

महासचिव पोखरेलले एमालेका सबै कमिटी र सङ्गठनले आगामी २०८४ सालमा हुने निर्वाचनलाई लक्ष्य गरेर पार्टीलाई बलियो राष्ट्रिय शक्ति बनाई समृद्धि र विकासको यात्रालाई पूरा गर्ने बाटोमा लाग्न आह्वान गरे । यस अधिवेशनले ७५ सदस्यीय नयाँ नेतृत्व चयन गर्ने कार्यक्रम छ ।

जनतासँग जोडिन र निरासा हटाउन समाजवादी जागरण अभियान : अध्यक्ष नेपाल

मकवानपुरः नेकपा (एकीकृत समाजवादी)का अध्यक्ष एवम् पूर्वप्रधानमन्त्री माधवकुमार नेपालले जनतासँग जोडिन र निरासा हटाउन समाजवादी जागरण अभियान शुरु गरिएको बताएका छन् । 

सरकारले नागरिकलाई कृषिमा आत्मनिर्भर बनाउनका लागि काम गर्नुपर्ने भन्दै अध्यक्ष नेपालले गाँउ–गाँउमा कृषि क्रान्तिको अभियान लिएर अघि बढन कार्यकर्तालाई आह्वान गरे ।

शुक्रबार हेटौंडामा आयोजित समाजवादी जागरण अभियान अन्तर्गतको आयोजित कार्यक्रमलाई सम्बोधन गर्दै अध्यक्ष नेपालले जनताका समस्या समाधान गर्न सरकारले काम गरिरहेको बताए । उनले ढिला सुस्ती र भ्रष्टाचार अन्त्य गर्न सके मात्रै जनताले न्याय पाउने भनाइ राखे । जनताको मनोबल उच्च नभए समाजको विकास नहुने भन्दै उनले सरकारले कृषि क्षेत्रमा लगानी बढाउनुपर्ने आवश्यकता औँल्याए । 

जनतामा जानका लागि पार्टीको नाम मात्र नभई महाअभियान जरुरी रहेको उनको भनाइ छ । अध्यक्ष नेपालले रोजगारी, समृद्धि र सुशासनको नाराका साथ आम नागरिकमा देशको वर्तमान अवस्था, आगामी दिनमा पार्टीले लिने रणनीति, कार्यदिशा लगायतका विषयमा जानकारी गराउन अभियान सञ्चालन गरिएको स्पष्ट पारे । उनले जनतासँग स्थापित हुन आफूहरु घर–घरमा आएको बताए । 

जनता आवास कार्यक्रम, काठमाडौं–निजगढ द्रुतमार्गको योजना तथा निजगढमा अन्तर्राष्ट्रिय विमानस्थल निर्माणका योजना आफू प्रधानमन्त्री हुँदा ल्याएको भन्दै बताए । जागरण अभियानले पार्टी बलियो बन्नेमा विश्वास गर्दै उनले कार्यकर्तालाई सबैमा आशा जगाएर अघि बढ्न आग्रह गरे ।  

सो अवसरमा बागमती प्रदेशका पूर्वमुख्यमन्त्री एवं पार्टीका उपाध्यक्ष राजेन्द्र पाण्डेले अभियानले पार्टीलाई स्थापित गराउन महत्वपूर्ण भूमिका खेल्नेमा विश्वास व्यक्त गरे । जनताका आधारभूत मुद्दाहरु सम्बोधन गर्नुपर्नेमा जोड दिँदै उनले दैनिक विदेश पलायन हुने युवाहरुको लहरलाई रोक्नुपर्नेमा जोड दिए । 

पूर्वप्रधानमन्त्री एवं पार्टीका सम्मानित नेता झलनाथ खनाल, स्थायी कमिटी सदस्य विरोध खतिवडा, सचिव रामकुमारी झाँक्री, पार्टी बागमती प्रदेश अध्यक्ष सावित्रा भुषाल, बागमती प्रदेश सरकारका श्रम, रोजगार तथा यातायातमन्त्री लक्ष्मण लम्साल, जिल्ला अध्यक्ष विष्णुप्रसाद दाहाललगायतका नेताहरुको उपस्थिति थियो ।

राेजगारी, समृद्धि र सुशासनका लागि समाजवादी जागरण अभियान : माधव नेपाल 

प्रेमचन्द्र झा/मध्यान्ह

रौतहट : नेकपा एकीकृत समाजवादी पार्टीका अध्यक्ष एवम् पूर्वप्रधानमन्त्री माधवकुमार नेपालले राेजगारी, समृद्धि र सुशासनका लागि समाजवादी जागरण अभियान थालेकाे बताएका छन । रौतहटको गरुडामा बिहीबार आयोजित सामाजवादी जागरण अभियानलाई सम्बोधन गर्दै उनले देशको बेरोजगारी र गरिबी अन्त्य गर्न सरकारलाई दबाब दिने अभियानको रुपमा यो कार्यक्रमको थाल्नी गरिएको बताए ।

देशमा बढ्दो बेरोजगारी र गरिबीका कारण युवा पुस्ता विदेशिनु पर्ने अवस्था आएकोप्रति चिन्ता व्यक्त गर्दै अध्यक्ष नेपालले यो अभियानबाट देशको बेरोजगारी र गरिबीको अन्त्य गर्न सरकारलाई दबाब दिन मेचीदेखि महाकालीसम्म समाजवादी जागरणअभियानको थाल्नी गरिएको बताए ।

अध्यक्ष नेपालले रौतहटको समग्र विकासका लागि हरसम्भव प्रयास गरिरहेको जिकिर गरे । उनले रौतहटको मुटु मानिने श्रीराम सुगर मिल्सलाई कुनै हाल्तमा सञ्चालन गराउने प्रतिबद्धता व्यक्त गरे । जिल्लाको बेरोजगारी अन्त्य गर्ने एउटा मुख्य अंगका रुपमा रहेको श्रीराम सुगर मिल्स कुनैपनि बहानामा जिल्लाभन्दा बाहिर सार्न नमिल्ने चेतावनी दिँदै उनले यहाँका किसानहरुको समस्या छिटोभन्दा छिटो समाधान हुने आश्वासन दिए ।

अध्यक्ष नेपालले सर्लाहीको भरत तालभन्दा सुन्दर ताल रौतहटमा बनाउने पहल भइरहेको पनि बताए । उनले रौतहटको व्यापार क्षेत्रलाई अगाडि बढाउन तथा बेरोजगारी कम गर्न  पर्यटकीय क्षेत्रलाई विस्तार गर्ने जिकिर गरे । 

जिल्ला अध्यक्ष कमल राय यादवको अध्यक्षतामा भएको सो कार्यक्रमलाई सम्बोधन गर्दै पार्टीका सम्मानित नेता एवम् पूर्वप्रधानमन्त्री झलनाथ खनालले  देशलाई समृद्धि र सुशासनतर्फ लैजान समाजवादी पार्टीले मुख्य भूमिका खेलिरहेका बताए । नेता खनाले विदेशी पुँजीवादी एजेन्टहरुले देशको ठूला उद्योगहरु बन्द गराइ विदेशी सामान उपभोग गर्न बाध्य बनाएको बताए । खनालले हेटौंडाको कपडा उद्योग नेपाली कांग्रेसले बन्द गराएको समेत आरोप लगाए ।

एमाले गण्डकी अधिवेशन : मतदानद्वारा नेतृत्व चुनिँदै

गण्डकीः नेकपा (एमाले) गण्डकी प्रदेश कमिटिको पहिलो अधिवेशन पोखरामा जारी छ । नयाँ नेतृत्व चयनका लागि सर्वसम्मतको प्रयास असफल भएपछि मतदानद्वारा नेतृत्वको टुङ्गो लाग्ने भएको छ । पदाधिकारीसहित विभिन्न पदमा बिहीबार मतदान हुने निर्वाचन समितिले जनाएको छ ।

मतदान अवधि बिहान ११ः५५ बजेदेखि साँझ ५ः३० बजेसम्मलाई तोकिएको प्रमुख निर्वाचन अधिकृत सुरेन्द्र थापा मगरले जानकारी दिए । प्रदेश किमिटी अध्यक्षमा म्याग्दीका नवराज शर्मा र लमजुङका मायानाथ अधिकारी चुनावी मैदानमा छन् । 

शर्मा प्रदेश एमाले गण्डकीका हालका अध्यक्षसमेत छन् । यस्तै उपाध्यक्षमा स्याङ्जाका मीनप्रसाद गुरुङ र नवलपुरका बाबुराम विक, सचिवमा लमजुङका धनञ्जय दवाडी र कास्कीका रश्मी आचार्य तथा उपसचिवमा पर्वतका मञ्जु अधिकारी, कास्कीका दामबहादुर विक, म्याग्दीका सन्तोष रावल र कास्कीका मीना गुरुङले उम्मेदवारी दिएका छन् । 

प्रदेश कमिटी सदस्यमा २७ जना निर्विरोध निर्वाचित भएको निर्वाचन समितिले जनाएको छ । अधिवेशनबाट पाँच पदाधिकारीसहित एक सय ६२ सदस्यीय नयाँ कमिटी चयन हुनेछ । अधिवेशनमा प्रदेशका ११ जिल्लाबाट नौ सय सात प्रतिनिधिले भाग लिएका छन् ।

एमाले लुम्बिनी प्रदेशका नेता माओवादी केन्द्रमा प्रवेश

काठमाडौंः नेकपा (एमाले)का लुम्बिनी प्रदेश सचिवालय सदस्य शान्तिदेवी हरिजनसहितका नेता तथा कार्यकर्ता पार्टी परित्याग गरी नेकपा (माओवादी केन्द्र)मा प्रवेश गरेका छन् । प्रधानमन्त्री निवास बालुवाटारमा बिहीबार प्रधानमन्त्री पुष्पकमल दाहाल ‘प्रचण्ड’सँग भेट गरी उनीहरुले एमाले परित्याग गरी माओवादी केन्द्र प्रवेश गरेका हुन् । 

माओवादी केन्द्रका अध्यक्ष एवं प्रधानमन्त्री दाहालले एमाले लुम्बिनी सचिवालय सदस्य हरिजन, लुम्बिनी प्रदेश सदस्य रामविलास यादव, कपिलवस्तु जिल्ला सदस्य सन्दिप मौरिया, अधिकारकर्मी एवं प्राध्यापक सञ्जयकुमार पासीलगायत नेता कार्यकर्तालाई पार्टीमा स्वागत गरेका छन् । 

हरिजन २०७० सालको संविधासभा सदस्य र यादव एमाले निकट किसान महासङ्घका केन्द्रीय सदस्य छन् । उनीहरुलाई पार्टीमा स्वागत गर्दै प्रधानमन्त्री दाहालले मुलुकमा अस्थिरता निम्त्याउने शक्ति सल्बलाइरहेकाले उत्पीडित समुदाय  एक हुनुपर्ने बताए । 

उनले पिछडिएका तथा उत्पीडित वर्गको उत्थान, उचित सम्मान र राज्यका निकायमा सम्मानजनक प्रतिनिधित्व हुनुपर्छ भन्ने चाहेको बताए । पार्टीमा प्रवेश गर्नेलाई उचित जिम्मेवारी र भूमिका दिइने अध्यक्ष दाहालको भनाइ छ । 

अनेरास्ववियु (क्रान्तिकारी) मेलुङको तेस्रो सम्मेलन सम्पन्न

ईश्वर विश्वकर्मा/मध्यान्ह

दोलखा : अनेरास्ववियु (क्रान्तिकारी) मेलुङ गाउँपालिकाको तेस्रो गाउँ सम्मेलन सम्पन्न भएको छ । सम्मेलनले प्रकाश दियालीको अध्यक्षतामा सर्वसम्मत ४३ सदस्यीय गाउँ कमिटी गठन गरेको छ ।

कमिटीको उपाध्यक्षमा कविराज कार्की, प्रशान्त कार्की, सचिवमा गिता मगर, सह–सचिवमा रनिता खड्का, अभिनन्दन परियार, सोफिया गोले र कोषध्यक्षमा सदिप काफ्ले चयन भएका छन् । सम्मेलनको उद्घाटन अनेरास्ववियु(क्रान्तिकारी)को केन्द्रीय सचिवालय सदस्य चन्द्रकुमार लामाले गरेका थिए । सो अवसरमा उनले विद्यार्थी हकहितको लागि अनेरास्ववियु(क्रान्तिकारी) सदैव काम गर्ने बताए । 

उनले शिक्षा क्षेत्रमा हुने गरेका बेतिथि र भ्रष्टाचारलाई रोक्दै गुणस्तरीय र समाजवादी शिक्षा आर्जन गर्ने वातावरण सरकारले निर्माण गर्नुपर्ने उल्लेख गरे । सचिवालय सदस्य लामाले विद्यार्थीहरुले आफ्ना हकअधिकार सुनिश्चित गराउनका लागि अनेरास्ववियु(क्रान्तिकारी)मा आबद्ध हुन आवश्यक रहेको बताउँदै भने, ‘पुरानो र सक्रिय भएकोले संगठनको विरासत कायम राख्न विद्यार्थीहरु सक्रिय हुनुपर्छ ।’

सम्मेलनमा एकीकृत अखिल नेपाल शिक्षक संगठन दोलखाको जिल्ला अध्यक्ष सन्तोष श्रेष्ठ, अखिल क्रान्तिकारी जिल्ला सह–संयोजक विकल खड्का लगायतले मन्तव्य राखेका थिए । 

समाजवादको प्रत्याभूति गराउन अगाडि बढेका छौं : अध्यक्ष नेपाल

रामएकवाल राम/मध्यान्ह

सिरहा : नेकपा एकीकृत समाजवादी पार्टीका अध्यक्ष माधवकुमार नेपालले आफ्नो पार्टी गरिब, गुरुवाको पार्टी रहेको बताएका छन् । 

असोज १४ गतेदेखि शुरु भएको ‘मेची–महाकाली समाजवादी जागरण अभियान २०८०’ अन्तर्गत मंगलबार सिरहाको भगवानपुर गाउँपालिका –१ स्थित भगवानपुर चोकमा आयोजित कार्यक्रममा अध्यक्ष नेपालले पुँजीवादी व्यवस्थाको अन्त्य र जनतालाई समाजवादको प्रत्याभूति गराउन एकीकृत समाजवादी पार्टी अगाडि बढिसकेको बताए । 

उनले अन्याय, अत्याचार, शोषण, दमन, सामन्तवाद, पुँजीवाद लगायत हरेक किसिमको प्रतिक्रियावाद विकासको बाधक तत्वहरुको सामना गर्दै जनतालाई समाजवादको प्रत्याभुती गराउने उदेश्यले अभियान सञ्चालन गरिएको बताए । 

अध्यक्ष नेपालले देशमा जनतालाई रोजगारी, किसानको भलाई, शिक्षा, स्वास्थ्यको अधिकार जनताको गाँसबाससहितको अधिकारको आवाज बुलन्द गर्ने आफ्ना पार्टी रहेको बताए । 

उनले सुशासन समृद्धि र रोजगारीसहित तराई मधेसको एक मात्र लाईफलाईन हुलाकी सडक अन्तर्गत सिरहा–धनुषा जोड्ने पुल भाँसिएको कुरा अवगत रहेको भन्दै पुनः निर्माण गरी सञ्चालनमा ल्याउन मञ्चबाटै सरकारको ध्यानाकर्षण गराए । 

कार्यक्रममा पार्टीका सम्मानित नेता झलनाथ खनाल,उपाध्यक्ष राजेन्द्र पाण्डे, उपाध्यक्ष धर्मनाथ साह, उपाध्यक्ष जयन्ती राई, महासचिव घनश्याम भुसाल, उप महासचिव जगरनाथ खतिवडा लगायतको उपस्थिति रहेको थियो ।