एकै मञ्चमा तीन कोइराला

मुकुन्द लामिछाने/मध्यान्ह

काठमाडौं : बिपी कोइरालाको नेतृत्वमा स्थापित नेपाली कांग्रेसको नेतृत्वमा कोइराला फर्काउने प्रयासमा नेताहरु लागेका छन् । कांग्रेसको १४ औं महाधिवेशनमा यस्तो प्रयास गरिएता पनि कोइराला परिवार नै एक हुन सकेका थिएनन् । 

१५ औं महाधिवेशनमा भए एक हुने सन्देश कांग्रेसका तीन प्रभावकारी कोइराला नेताहरू शेखर कोइराला, सुजाता कोइराला र शशांक कोइरालाले प्रवाह गरेका छन् । यी नीत नेता बुधबार एकै मञ्चमा देखिए । बिपी साहित्य महोत्सवमा ‘परिवारले बुझेका बिपी’ छलफलमा वक्ताका रूपमा सहभागी नेतात्रयले कोइराला परिवार एकजुट हुने प्रष्ट संकेत गरेका हुन् । 

२०७८ सालमा भएको १४ औं महाधिवेशनमा अनेक प्रयासमा बाबजुत शेखर, सुजाता र शशांक एकजुट भएका थिएनन् । शेखर सभापति पदमा उठे पनि शेरबहादुर देउवासँग पराजित भए । सुजाता प्रकाशमान सिंह प्यानलबाट उपसभापति उठे पनि पराजित भइन् । महामन्त्री भइसकेका शशांक केन्द्रीय सदस्य मात्रै उठेर लोकप्रिय मतसहित जितेर रहे । 

शेखर सभापति उठे पनि उनका पक्षमा शशांक खुलेका थिएनन् । शेखर उपसभापति उठेकी सुजाताकै पक्षमा पनि खुलेनन् । 

कांग्रेस विधानअनुसार चार वर्षको अन्तरालमा महाधिवेशन हुँदा २०८२ मंसिरभित्र १५ औं महाधिवेशन गर्नुपर्ने हुन्छ । महाधिवेशन आउन समय धेरै भए पनि सभापति को उठ्ने भन्ने चर्चा र तयारी कांग्रेसभित्र चलिरहँदा कोइराला परिवारले एक हुने संकेत गरेका हुन् । 

शशांकका अनुसार १४ औं महाधिवेशनमा उनी मिलाउन लागेका थिए । सबैलाई मिलाउन सक्ने व्यक्ति आफैँ हुँ भन्ने उनलाई लागेको थियो । शेरबहादुर र शेखरलाई मिलाउन आफूले उत्प्रेरकको भूमिका खेलेको दाबी शशांकको छ । अब सभापतिमा आफू उपयुक्त पात्र भएको शशांकको दाबी छ । 

साथै कोइराला परिवार एक ढिक्का रहने प्रतिवद्धता जनाए । ‘हामी एक छौं, एक भएर जाने कुरा शेखर दा र सुजाताले पनि भन्नुपर्यो । हामी तीनै जना एकै ठाउँमा बस्ने हो । एउटा परिवारको सदस्य मिलाउन सक्दैनौं भने देश र पार्टी मिलाउने कसरी ?’ 

सुजाताले अब आउने महाधिवेशनमा एक भएर अघि बढ्ने बताइन् । उनी भन्छिन्, ‘कोइराला परिवारबाट कोही एक जनालाई सभापति बनाएर जाने हो भने म सहयोग गर्न तयार छु ।’ 

शेखरले आफू सधैं एकताकै पक्षमा रहेको बताए, ‘म सधैं एक भएर जानुपर्छ भन्नेमै छु ।’

बाबुरामलाई बाइपास

अस्मिता बम/मध्यान्ह

काठमाडौं : नेकपा माओवादी केन्द्रले नेपाल समाजवादी पार्टीका अध्यक्ष डा. बाबुराम भट्टराई बाइपास गर्दै पार्टी एकताका लागि पत्र पठाएको छ । भदौ ३० गते अध्यक्ष प्रचण्ड र महासचिव देव गुरुङले हस्ताक्षर गरी नेसपाका दोस्रो अध्यक्ष महिन्द्र राय यादवलाई पत्राचार गरेका हुन् । यसले नेसपाभित्र तरंग पैदा गरेको छ । 

माओवादीले पठाएको पत्रमा भनिएको छ, ‘भदौ २५ गते पार्टीको केन्द्रीय कार्यालय ९पदाधिकारीहरु०को बैठकमा पार्टी एकता सम्बन्धमा गम्भीरताका साथ छलफल भयो र अन्तमा पार्टी एकतालाई सफल तुल्याउनका लागि पार्टीको नामको सन्दर्भमा नेपाल कम्युनिस्ट पार्टीको पछाडि कोष्टभित्र रहेको माओवादी केन्द्र बारे आगामी महाधिवेशनमा खुला रुपले छलफल गरी आवश्यक निर्णय लिन सकिने भनी गरिएको निर्णयलाई जानकारीको लागि पत्राचार गरिएको छ ।’ 

भट्टराई प्रगतिशील नेपाली समाज भारतले गरेको कार्यक्रममा भाग लिन दिल्ली छन् । असोज १ गते भ्रमणमा निस्किएका भट्टराई बैंगलोर, गोवा, चण्डीगढ र दिल्लीमा आयोजना गरिने कार्यक्रममा सहभागी भएर असोज ६ गते स्वदेश फर्किने उनको सचिवालयले जनाएको छ । यहीबेला माओवादी केन्द्रको पत्रले नेसपामा तरंग ल्याएको हो । 

नेताहरुका अनुसार आम चुनावभन्दा अगाडि नै माओवादी र नेसपाबीच पार्टी एकताको समझदारी भएको थियो । त्यही समझदारी अनुसार नेसपाका केही नेताले माओवादीको चुनाव चिह्न बाटै चुनाव लडे ।

उनीहरुमध्ये प्रतिनिधिसभामा महेन्द्रराय यादव र बागमती प्रदेशसभा सहअध्यक्ष गंगानारायण श्रेष्ठ निर्वाचित भए । यादव प्रचण्ड सरकारमा खानेपानी मन्त्री छन् भने श्रेष्ठ बागमतीमा आन्तरिक मामिला तथा कानुनमन्त्री छन् । 

दुई पार्टीबीच एकता वार्ता पनि सुरु भएको थियो । माओवादीले उपाध्यक्ष कृष्णबहादुर महराको नेतृत्वमा र नसपाले सहअध्यक्ष श्रेष्ठको नेतृत्वमा वार्ता समिति नै बनाएर छलफल थालेको थियो । गत चैतमा नेसपाले पार्टी एकताको आधार भन्दै ९ बुँदे पत्र माओवादीलाई पठाएको थियो । त्यसपछि सम्वाद अघि बढेन ।

डा. बाबुराम भट्टराई देश बाहिर रहेको समयमा माओवादी केन्द्रले पार्टी एकताको लागि भन्दै वरीयता क्रममा दोस्रो नम्बरमा रहेका अध्यक्ष महिन्द्र राय यादवको नाममा पत्राचार गरेपछि नेसपामा तरंग पैदा भएको हो ।

माओवादी अध्यक्ष प्रचण्ड र महासचिव गुरुङले हस्ताक्षर गरेको पत्रमा आगामी महाधिवेशनमा खुला रूपले छलफल गरी पार्टीको नामबारे निर्णय लिनसक्ने माओवादी निर्णयबारे जानकारी दिइएको छ । 

कांग्रेस बैसाखी बिना टिक्नै नसक्ने पार्टी भयो : यामलाल कँडेल

कुलेन्द्र शाही/मध्यान्ह

सुर्खेत : नेकपा एमाले कर्णाली प्रदेश संसदीय दलका नेता यामलाल कँडेलले कांग्रेस बैसाखी बिना टिक्नै नसक्ने पार्टी भएको आरोप लगाएका छन् । बुधबार वीरेन्द्रनगरमा कचहरी प्रेस क्लबले आयोजना गरेको एक कार्यक्रममा बोल्दै उनले यस्तो बताएका हुन् ।

उनले अहिले सत्तामा भएको पार्टी जनता अल्मल्याउनेतर्फ लागेको बताए । 'चुनाव सकिएको एक वर्ष नहुँदै सरकारमा भएको पार्टी नै अभियान भनेर जनता अल्मल्याउनेतर्फ लागेको छ ।' उनले भने ।

उनले कर्णाली सरकार मन्त्री उत्पादन गर्ने कारखाना बनेको समेत बताए । उनले भने, 'जति मान्छे आउँछन् सबैलाई मन्त्री बनाएर छोड्ने पार्टीबाट विकास हुन्छ भनेर मलाई केही विश्वास लागेको छैन ।'

शंकर पोखरेलको ‘अर्थपूर्ण’ भेट

दिवाकर अधिकारी/मध्यान्ह

काठमाडौं : नेकपा एमालेका महासचिव शंकर पोखरेलले पूर्वराष्ट्रपति विद्यादेवी भण्डारीसँग भेट गरेका छन् । चीन भ्रमण सकेर नेपाल फर्किएपछि महासचिव पोखरेलले भण्डारीसँग भेट गरेका हुन् । राजनीतिमा फर्किन सक्ने चर्चाकाबीच पूर्वराष्ट्रपति भण्डारीसँग एमाले महासचिव पोखरेलले भेटेका हुन् । चीन भ्रमणपछि भएको नेताद्धयको भेटलाई अर्थपूर्ण राजनीतिक भेटका रुपमा हेरिएको छ । सोमबार साँझ पूर्वराष्ट्रपति भण्डारीसँग भेटेका हुन् । 

चिनियाँ कम्युनिष्ट पार्टीको निमन्त्रणामा महासचिव पोखरेल चीन भ्रमणमा गएका थिए । एमाले उपाध्यक्ष सुवास नेम्वाङको निधन भएपछि महासचिव पोखरेल भ्रमण छोट्याएर स्वदेश फर्किएका थिए । 

राष्ट्रपति भण्डारी राजनीतिमा आउने चर्चाबारे अध्यक्ष ओलीले टिप्पणी गरेका थिए । तर, कम्युनिस्टहरूलाई एक ठाउँमा ल्याउने गरी भण्डारीलाई एमालेको भावी नेतृत्वमा ल्याउन एउटा पक्षले पहल गरिरहेका बेला पोखरेलले भण्डारीसँग भेटेका हुन् । एमालेको उपाध्यक्ष भएकै बेला भण्डारीलाई राष्ट्रपति बनाइएको थियो । तर, ७ वर्ष राष्ट्रपति भएपछि पनि उनी एमालेमा फर्किन सक्ने आकलन भइरहेको छ । यही बेला अध्यक्ष ओलीका विश्वासपात्र मानिने पोखरेलले अर्थपूर्ण भेट गरेका हुन् । 

पोखरेल आफैंले यो भेटको महत्व र सन्देश धेरै रहेको संकेत गरेका हुन् । भण्डारीलाई भेटेपछि पोखरेल स्वयंले चीन भ्रमणपश्चात पूर्व राष्ट्रपतिज्यूसँग भेटघाट भनेर फोटो सामाजिक सञ्जालमार्फत सार्वजनिक गरेका हुन् । 

ओलीले दुईतिहाइको सरकार टिकाउन नसकेको, पटक–पटक संसद् विघटन गरेको, एमालेलाई फूटबाट जोगाउन नसकेको, आम चुनावपछिको केन्द्र र प्रदेशको सरकार टिकाउन नसकेको जस्ता आरोप खेपिरहेका छन् । यसैले एमालेको ठूलै समूहले ओलीको सट्टा विद्यालाई अगाडि सार्दा माधव नेपालले नेतृत्व गरेको सहितका कम्युनिस्ट पार्टीबीच एकता हुन सक्ने तर्कसहित पहलकदमी लिएका छन् । तर, यो विषयलाई अध्यक्ष ओलीले सहज रूपमा नलिएको कतिपय नेताहरु बताउँछन् । 

राजनीतिक विश्लेषकहरू यो भेटलाई दुई अर्थमा हेर्न सकिने बताउँछन् । पहिलो, चीनले पनि एमालेको नेतृत्व परिवर्तन र कम्युनिस्टबीच एकता चाहेको छ । दोस्रो, ओलीले भण्डारीबाट थ्रेट महसुस गरेकाले विश्वासपात्रलाई भेट्न पठाएर हामीसँगै छौं भन्ने देखाउँदैछन् । राजनीतिक विश्लेषक कृष्ण पोखरेल कम्युनिस्टबीच एकता गर्ने विषय टाढाको भए पनि अब एमालेमा ओलीबाट पार्टी चल्छ भन्नेमा उनकै टीम पनि विश्वस्त नभएको बताउँछन् । 

लुम्बिनी प्रदेश अधिवेशन उद्घाटनकै दिन भदौ १६ गते पोखरेल चीन भ्रमणमा गएका थिए । भ्रमणका क्रममा पोखरेलले चिनियाँ कम्युनिष्ट पार्टी सीपीसीका विदेश विभाग प्रमुख लिउ जियनचाओ र पोलिटब्यूरो सदस्य युआन जियाजुनसँग भेट गरेका थिए । जियाजुन गत साउनमा नेपाल भ्रमणमा पनि आएका थिए । 

पोखरेलसँग स्थायी समिति सदस्य तथा परराष्ट्र मामिला विभाग प्रमुख डा. राजन भट्टराई, स्थायी समिति सदस्य तथा प्रचार विभाग प्रमुख राजेन्द्र गौतम पनि चीन पुगेका थिए । 

शेखर–गगनलाई विश्वको सरप्राइज

अस्मिता बम/मध्यान्ह

काठमाडौं : मंगलबार नेपाली कांग्रेसका नेता डा. शेखर कोइरालाले आफ्नो समूहको बैठक बोलाएका थिए । उक्त बैठकमा महामन्त्री विश्वप्रकाश शर्मा र नेता प्रदीप पौडेल उपस्थित रहने बताइएको थियो । तर, दुवै नेता गएनन् ।

शेखर दाइले बोलाएको बैठकमा नजानु भनेको देउवासँग नजिकिने भन्ने नभएको शर्मा निकट नेताहरु बताउँछन् । साथै, गगन थापासँग सम्बन्ध टाढा बनाउन पनि नभएको उनको प्रष्टीकरण छ । नेताहरुका अनुसार डा. शेखर कोइरालाको कार्यशैलीप्रति केही गुनासा भएकाले बैठकमा उपस्थित भएको सन्देश पठाएका छन् । 

केन्द्रीय सदस्यहरुले शर्मा र पौडेल किन नआएको भनी डा.शेखरलाई सोधेका थिए । जवाफमा डा. शेखरले शर्माले आउने वचन दिएको र पौडेलले चीन जान परेकाले आउन नसकेको जवाफ दिएको बताए । 

महामन्त्री गगन थापाले दुई महामन्त्री र शेखरको छुट्टै छलफल गरेर अर्को बैठकमा आउने वातावरण बनाउने आशय बैठकमा सुनाए । कांग्रेस उपसभापति धनराज गुरुङले भने महामन्त्री शर्मालाई जबरजस्ती गरेर समूहमा ल्याउन आवश्यक नभएको बताए । समूहमा नयाँ मान्छे जोड्ने कुरासँग जिम्मेवारी दिने कुरामा लड्नुपर्ने उनको भनाइ छ ।

कानुनमन्त्री समेत रहेका गुरुङले सरकारबारे ब्रिफिङ सुनाएका थिए । प्रधानमन्त्री पुष्पकमल दाहाल प्रचण्डलाई सुशासनका पक्षमा उभिन आफूले निरन्तर दबाब दिइरहेको उनले बताए । कानुनमन्त्री गुरुङले न्यायाधीश नियुक्तिको प्रशंसा भएको पनि स्मरण गरे । 

पार्टी सभापति शेरबहादुर देउवाले काम कारबाहीमा हस्तक्षेप गरिरहेको उनको गूनासो छ । सरकार सञ्चालनमा पार्टी मान्छे पर्छन भनेर कांग्रेसबाटै खुट्टा तान्ने काम भएको उनको गुनासो छ । 

डा. शेखर समूहको बैठकमा आउन शेखर कोइरालाले फोन गरेर महामन्त्री विश्वप्रकाश शर्मा र महामन्त्रीका प्रत्यासी प्रदीप पौडेललाई समेत आमन्त्रण गरेका थिए । कोइरालाले फोन गर्दा दुवै नेताले सकारात्मक जवाफ दिएपनि अनुपस्थित भउपछि नेताहरुले सोधीखोजी गरेका हुन् । 

डा.शेखर कोइरालाले बोलाएको बैठकमा आउने सन्देश दिएर पनि महामन्त्री विश्वप्रकाश शर्मा अनुपस्थित रहेर सरप्राइज्ड दिएको नेताहरु बताउँछन् । डा. शेखरलाई नेतृत्वमा अस्विकार गरेको संकेत गर्दै महामन्त्री शर्माले सभापतिमा नयाँपन खोजेको बताएका छन् । साथै छलफलमा नेताहरुले डा.शेखर र महामन्त्री थापाको सम्बन्धका विषयमा समेत चासो राखेका छन् । 

शेखर–गगन समूहका पदाधिकारी र केन्द्रीय सदस्य सहभागी बैठकमा नेताहरुले समूहभित्रको एकतालाई लिएर प्रश्न उठाएका हुन् । नेताहरुले शेखर–गगनबीचमा छलफल गरी एकतावद्ध हुन सुझाव दिएका छन् । 

संविधान दिवसमा एमालेले 'सेल्फी विथ नेसनल फ्ल्याग' कार्यक्रम गर्ने

काठमाडौं : नेकपा एमालेले संविधान दिवसमा विशेष कार्यक्रम गर्ने भएको छ । 

संविधान दिवसका अवसरमा असोज ३ गते बिहान ७ बजे काठमाडौंको नारायणचौरमा आयोजना हुने कार्यक्रममा सहभागी भइ राष्ट्रिय झण्डासँग सेल्फी खिच्न एमाले अध्यक्ष केपी शर्मा ओलीले आह्वान गरेको एमाले प्रचार विभाग सचिव गगन विष्टले जानकारी दिए । 

अध्यक्ष ओलीले नागरिकका हक संविधानमा लेखिएका दिन असोज ३ गते ‘मर्निङ वाक नेसनल वाक, सेल्फी विथ नेशनल फ्ल्याग’ नारासहित संविधान दिवस मनाउन आग्रह गरेका छन् । उनले नारायणचौरमा भेट गरी यसपटकको राष्ट्रिय दिवस जनस्तरबाटै भव्यताका साथ मनाउन अपिल गरेका छन् ।

टोल-टोलमा घुम्दै माओवादीका नेता

प्रचण्ड खत्री/मध्यान्ह

रुकुम पश्चिम : रुकुम पश्चिमको बाँफिकोट गाउँपालिकामा १० वटा वडा रहेका छन् । १० वटा वडाका विभिन्न गाउँ बस्तीमा नेकपा माओवादी केन्द्रका वडा इन्चार्जदेखि नेता कार्यकर्ताहरु जनताको घरघरमा पुगिरहेका छन् । माओवादी केन्द्रको विशेष रुपान्तरण अभियानअन्तर्गत उनीहरु जनताको समस्या बुझ्न टोल-टोलमा पुगेका हुन् ।

बाँफिकोट वडा नम्बर ४ मा पनि जनभेटघाट जारी रहेको छ । जनभेटघाटका क्रममा नेपाली कांग्रेस परित्याग गरी कृष्ण बहादुर गिरी माओवादी केन्द्रमा प्रविश गरेको अभियानकी इन्चार्ज प्रेमा शाहीले बताइन् । 

यस्तै अभियानकै क्रममा वडा नं १० फेरा टोलमा कमला जैसीको अध्यक्षतामा ९ सदस्यीय टोल कमिटी गठन गरिएको छ । त्यस्तै मयरी टोलमा गजेन्द्र कुमार बुढाको अध्यक्षतामा ११ सदस्यीय टोल कमिटी गठन गरिएको वडा अध्यक्ष तथा अभियानका इन्चार्ज हरि चन्दले जानकारी दिए । 

वडा नम्बर ३ मा पनि जनभेटघाट चलिरहेको छ । वडा नम्बर ३ का जग्रा, खोयापधेरा, भाग्ले, सल्लेचवरलगायतका टोलमा जनभेटघाट गरिएको वडा नम्बर ३ का पार्टी अध्यक्ष बेगम ओलीले बताए ।

सशंकित माधव नेपाल

मुकुन्द लामिछाने/मध्यान्ह

काठमाडौं : आलोपालोमा आफू एक वर्ष प्रधानमन्त्री हुने भद्र सहमति कार्यान्वयन गराउनमा एकीकृत समाजवादीका अध्यक्ष माधव नेपाल छन् । यही बेला कांग्रेसबाट सरकारको नेतृत्व बदलेर कांग्रेसकै नेतृत्वमा सरकार बनाउनुपर्ने अभिव्यक्ति आएपछि एकीकृत समाजवादीका अध्यक्ष माधव कुमार नेपाल थप शशंकित भएका हुन् । 

खासगरी कांग्रेस नेता डा. शेखर कोइरालाले पछिल्लो केही सातायता निरन्तर कांग्रेसले सरकारको नेतृत्व गर्नुपर्ने विषय उठाउँदै आएका छन् । सभापति शेरबहादुर देउवासमेत सहभागी कार्यक्रममा शेखरले ‘सरकारले प्रभावकारी काम गर्न सकेन । हाम्रा मन्त्रीले पनि प्रभावकारी कार्यसम्पादन देखाउने अवस्था भएन, अब कांग्रेसले नेतृत्व गर्नुपर्छ’ भनेपछि गठबन्धनमा रहेको एउटा दल एकीकृत समाजवादी र त्यसको नेतृत्वकर्ता माधव कुमार नेपाल शशंसिकत भएका हुन् ।

वर्तमान सत्ता गठबन्धनबीच पुष्पकमल दाहाल प्रचण्डले दुई वर्ष, नेकपा एकीकृत समाजवादीका अध्यक्ष माधव नेपालले बीचमा एक वर्ष र अन्तिममा दुई वर्ष कांग्रेस सभापति शेरबहादुर देउवाले सरकारको नेतृत्व गर्ने समझदारी भएको बताइन्छ । तर, एमालेपछि कांग्रेसको सहयोगमा प्रचण्डले सरकार चलाएको ९ महिना पनि नबित्दै डा.शेखरले हरेकजसो सार्वजनिक मञ्चमा बोल्दा सरकार परिवर्तनको विषयलाई प्राथमिकता साथ उठाउन थालेपछि माधव नपाल झस्किएका हुन् । 

सोमबारमात्रै एकीकृत समाजवादीका अध्यक्ष माधवकुमार नेपालले सत्ता गठबन्धनबाट आफ्नो पार्टीलाई बाहिर निकाल्ने षड्यन्त्र भइरहेको बताए । काठमाडौँमा आयोजित एक कार्यक्रमलाई सम्बोधन गर्दै उनले गठबन्धनलाई कमजोर पार्नका लागि आफ्नो पार्टीलाई बाहिर निकाल्ने प्रयास भइराखेको बताए ।

गठबन्धनलाई बलियो बनाउने जिम्मेवारी आफूहरुको रहेको पनि उनको भनाइ छ । गठबन्धन बनाउने काममा भूमिका आफूहरुले नै खेलेको भन्दै उनले आफूहरुले नै गठबन्धन जोगाउनुपर्ने अवस्था रहेकोा बताए ।

उनले भनेका छन्, ‘गठबन्धनलाई धारे हात लगाएर यसलाई कमजोर पार्नका लागि हाम्रो पार्टीलाई बाहिर निकाल्ने जुन किसिमको षड्यन्त्र भइरहेको छ, त्यसबाट होशियार हुनका लागि म सबैलाई आह्वान गर्न चाहन्छु ।’ 

यस्तो प्रयासमा जान अन्जानमा कतिपय पार्टीकै नेताहरु समेत रुमल्लिन पुगेको उनको आशंका छ । एमसीसीका सन्दर्भमा उठेका बहसलाई लिएर उनले यस्तो बताएका हुन् । 

अध्यक्ष नेपालले व्याख्यात्मक घोषणाको रुपमा एमसीसी पास नगरेको भए नेपालको हात तल पर्ने, नेपालको स्वाभिमानले नतमस्तक हुनुपर्ने स्थिति आउने दाबी गरे । उनले व्याख्यात्मक घोषणापछि मात्रै पास गर्नाले विदेशीको गुलाम बन्नु नपरेको जिकिर गरे । उनले एमसीसीको घोर विरोध गरेको कारण वाहवाही पाउने भए मजदुर किसान पार्टी र मोहनविक्रम सिंहको पार्टीले सय सिट कटाउने भनी ब्यङ्ग्य गरे । 

एकीकृत समाजवादीका सम्मानित नेता झलनाथ खनालले एमसीसीका विषयमा प्रश्न उठाउँदै आएका छन् । यसमाथिको बहस एकीकृत समाजवादीलाई वर्तमान सत्ता गठबन्धनबाट बाहिर निकाल्ने प्रयासलाई सहयोग पु¥याउन सक्ने अध्यक्ष नेपालको टिप्पणी छ । 

डा. शेखरको सन्देश

दिवाकर अधिकारी/मध्यान्ह

काठमाडौं : नेपाली कांग्रेसका नेता डा.शेखर कोइरालाले केन्द्रीय कार्यसमिति बैठकअघि आफ्नो समूहको बैठक बोलाएका छन् । आफ्नो पक्षमा नरहेका महामन्त्री विश्वप्रकाश शर्मा र महामन्त्रीका प्रत्यासी प्रदीप पौडेललाई आमन्त्रण गरेर सन्देश दिन खोजेका छन् । 

कोइरालाको सम्पर्क कार्यालय बालुवाटारमा मंगलबार दिउँसो २ बजेका लागि बोलाइएको बैठकमा शर्मा र पौडेल समेत सहभागी हुन तयार भएपछि कांग्रेसभित्र तरंग पैदा भएको छ । 

१४ औं महाधिवेशनपछि पहिलो पटक महामन्त्री शर्मा र नेता पौडेल शेखर समूहको बैठकमा सहभागी हुन लागेका हुन् । असोज ४ गते बस्ने केन्द्रीय समिति बैठकमा सामूहिक रूपमा प्रस्तुत कोइरालाले आफू पक्षको बैठक बोलाएका हुन् । 

०७८ मा भएको १४ औं महाधिवेशनमा शर्मा प्रकाशमान सिंह प्यानलबाट उठेर महामन्त्री जितेका थिए भने पौडेल सभापति शेरबहादुर देउवा प्यानलबाट महामन्त्रीमा पराजित भएका थिए। तर गत पुस ६ मा भएको कांग्रेस संसदीय दल निर्वाचनमा शर्मा र पौडेल संसदीय दल नेताका उम्मेदवार महामन्त्री गगन थापा पक्षमा खुलेका थिए । थापाले कोइराला प्यानलबाट महामन्त्री जितेका थिए । 

कोइरालाले ०८२ मा हुने १५ औं महाधिवेशन लक्षित गरेर आफ्नो समूहलाई बलियो बनाउने प्रयास गरिरहेका छन् । 

कांग्रेसले असोज ४ गते केन्द्रीय समिति बैठक बोलाएको छ । उक्त बैठकमा सामूहिक रूपमा धारणा प्रस्तुत गर्न विभिन्न विषयमाथि छलफल गर्न कोइरालाले आफू पक्षको बैठक बोलाएका हुन् । 

यसअघि गत साउन २ मा बसेको केन्द्रीय समिति बैठकअघि कोइरालाले आफू पक्षको छुट्टै भेला गरेका थिएनन् । त्यसबेला सभापति शेरबहादुर देउवासँग मिलेको आरोप कोइरालामाथि लागेको थियो । तर कोइरालाले आफू कसैसँग नमिलेको प्रष्टीकरण दिएका थिए ।

शेखर समूह समेत एक नरहेको कतिपय कांग्रेस नेताहरु नै बताउँछन् । कांग्रेसका संस्थापन इतरका नेता डा. शेखर कोइराला र महामन्त्री गगन थापावीच सम्बन्ध नजिक न टाढाको अवस्थामा रहेकाले जुनसुकै बेला अलग रुपमा अगाडि बढ्न सक्ने कतिपयको आँकलन छ । गगन थापा पार्टी नेतृत्वकै प्रत्यासी भएका कारण उनले डा. कोइरालालाई नेतृत्व स्वीकार गर्न तयार नभए यो समूह एक रहनेछैन् । तथापि, डा. शेखर र गगन थापाले आफूहरु एकै ठाउँमा रहेको बताउने गरेका छन् । 

तर इतर पक्षका नेताहरु भने यी दुई नेताबीच कहिं न कहिं एक अर्काप्रति आशंका रहेको बताउँछन् । संस्थापन इतरकै नेता अर्जुन नरसिंह केसीले महामन्त्री विश्वप्रकाश शर्मा र केन्द्रीय सदस्य प्रदीप पौडेललाई आफ्नै निवासमा बोलाएर छलफल गरेका थिए । यो अवस्थामा डा. शेखर समूहको बैठकमा महामन्त्री शर्मा र नेता प्रदीप पौडेल छलफलमा सहभागी हुनुलाई अर्थपूर्ण रुपमा हेरिएको छ ।

देश दौडाहमा रास्वपा

अस्मिता बम/मध्यान्ह

काठमाडौं : राष्ट्रिय स्वतन्त्र पार्टी (रास्वपा)ले संगठन विस्तारलाई तिव्रत दिएको छ । रास्वपाका केन्द्रिय सदस्य गणेश कार्कीका अनुसार २७० पालिकामा भेला सकेको छ । ६ प्रदेशको प्रशिक्षण सकेको रास्वपाले पछिल्लो दिनमा पालिका भेलालाई प्राथमिकता दिएको हो ।

सहमहामन्त्री कविन्द्र बुर्लाकोटी संगठन विस्तारक्रममा नेताहरु देश दौडाहमा रहेको बताउँछन् । भदौको अन्तिम साता सभापति रवि लामिछाने, सहमहामन्त्री कविन्द्र बुर्लाकोटी, सांसदद्वय डा. स्वर्णिम वाग्ले, डा. तोसिमा कार्की लगायत गोरखा र तनहुँमा पालिका भेलामा सहभागी भएका थिए । 

असोज ६ गते रुपन्देहीको तिलोत्तमा नगरपालिकामा भेला गर्न लागिएको छ । अन्य प्रदेशको तुलनामा कर्णालीमा पार्टीको गतिविधि कम रहेको रास्वपा नेताहरुको स्वीकारोक्ति छ । अन्य ६ प्रदेशमा प्रशिक्षण सकिए पनि कर्णालीको हुन सकेको छैन । 

गत मंसिर ४ गते भएको आम निर्वाचनबाट सदनको चौथो ठूलो दल बन्दै ४२ दिन सरकारकमा रहेको राष्ट्रिय स्वतन्त्र पार्टी सरकारलाई दिएको समर्थन पनि फिर्ता लिएसँगै संगठन विस्तारमा लागेको छ । यसले पछिल्लो समय रफ्तार लिएको नेताहरु बताउँछन् । 

सत्ताका लागि च्याखे दाउ र अस्थिर अंक गणितमा नयाँ अर्को गठबन्धन किस्साको सम्भावना रहिरहे पनि अब आफ्नै नेतृत्वमा सरकारमा जाने योजना रास्वपाको छ । छोटो समयमा नै सरकारको र राजनीतिक चलखेलको अनुभव बुटलिसकेको पार्टीको अबको सत्ता यात्रा प्रधानमन्त्रीमा हुने रास्वपाका नेताहरुको भनाइ छ ।

सत्ता प्रतिपक्ष दुवैको अनुभव सम्हालिसकेको पार्टीले २०८४ को निर्वाचनमा बहुमतका साथ सदन प्रवेश गर्दै सरकारको नेतृत्व गर्ने योजना बनाएको छ । यद्यपि, अस्थिर अंक गणित र सदनमा चौथो ठूलो दलको हैसियत बनाएका कारण पुनः नयाँ समीकरण बनाएर सरकारमा जाने सम्भावनालाई भने नेताहरुले नकारेका छैनन् ।