काठमाडौं : नेपाली कांग्रेसका नेताहरुले चुनावी तालमेल गर्दा कम्तिमा सय सिट आफुसँग राख्न नेतृत्वलाई सुझाव दिएका छन् ।
आज प्रधानमन्त्री निवास बालुवाटारमा भएको छलफलमा कांग्रेस पदाधिकारी र पूर्वपदाधिकारीहरुले बहुमतको सरकारका लागि प्रतक्ष्यतर्फ एक सय सिट कांग्रेसले लिनुपर्ने सुझाव दिएका हुन् ।
बाँकी ६५ सिट गठबन्धनका दललाई दिएर मात्रै तालमेल गर्नुपर्ने कांग्रेस नेताहरुको सुझाव छ ।
छलफल गर्दै जाँदा ९० सिटमा कांग्रेस लडेर ७५ सिट गठबन्धनका घटकहरूलाई दिनुपर्नेमा भने सहमत हुन सकिने कांग्रेस नेताहरुको भनाइ छ ।
०७४ सालको निर्वाचन र भर्खरै सम्पन्न स्थानीय तह निर्वाचनमा पाएको मतलाई गठबन्धन निर्माणको आधार बनाउनपनि पदाधिकारीले नेतृत्वलाई सुझाव दिएका छन् ।
सिट बाँडफाँट गर्दा कांग्रेसले आफ्नो हैसियत भुल्न नहुने नेताहरुको भनाइ छ । कांग्रेस नेताहरुले लोसपासहित समेटेर वृहत गठबन्धन बनाउन पहल गर्नुपर्ने पनि प्रस्ताव गरेका छन् ।
बैठकमा बिमलेन्द्र निधिले गठबन्धनमा महन्थ ठाकुर नेतृत्वको लोसपालाई पनि समेटनुपर्ने बताएका हुन् ।
सभापति देउवाले भने गठबन्धनमा लचिलो नभए विपक्षीले हदैसम्म दिएर पनि गठबन्धन गर्न मिहिनेत गरिरहेको भन्दै त्यसतर्फ ध्यान दिन नेताहरुलाई आग्रह गरेका छन् ।
यसैबीच नेपाली कांग्रेसले स्थानीय तहमा निर्वाचित पालिका प्रमुख र उपप्रमुखका लागि अभिमुखीकरण तथा प्रशिक्षण कार्यक्रम गर्ने भएको छ ।
शीर्ष नेताको बैठकले साउन ३० र ३१ गते प्रशिक्षण कार्यक्रम गर्ने निर्णय गरेको हो । प्रशिक्षणमा कांग्रेसबाट निर्वाचित देशैभरका जनप्रतिनिधि सहभागी हुनेछन् ।
काठमाडौं : आगामी मंसिर ४ गतेका लागि तय भएको प्रतिनिधि सभा र प्रदेश सभा निर्वाचनमा सिट बाँडफाँटका लागि सत्ता गठबन्धनको बैठक बस्दै छ ।
सिट बाँडफाँटका लागि गठन गरिएको गठबन्धनको कार्यदलको पहिलो बैठक बस्न लागेको हो । सीट बाँडफाँटको मोडालिटी तय गर्न सत्ता गठबन्धनले कार्यदल गठन गरेको थियो । उक्त कार्यदलको बैठक आज दिउँसो ३ बजे प्रधानमन्त्रीको सरकारी निवास बालुवाटारमा बस्न लागेको हो ।
गठबन्धनले यसअघि सिट संख्या बाँडफाँट मिलाउन ११ सदस्यीय कार्यदल गठन गरेको थियो ।
कार्यदलमा नेपाली कांग्रेसबाट तीनजना र अन्य दलबाट दुई/दुई जना सदस्य रहेका छन् । कार्यदलमा कांग्रेसबाट कृष्ण प्रसाद सिटौला, गगन थापा र ज्ञानेन्द्र बहादुर कार्की रहेका छन्। यस्तै, नेकपा माओवादीबाट वर्षमान पुन र जनार्दन शर्मा रहेका छन् ।
नेकपा एकीकृत समाजवादीबाट बेदुराम भुसाल र प्रमेश हमाल कार्यदलका सदस्य रहेका छन् । जसपाबाट रामसहायप्रसाद राय र रकम चेम्जोङ र राष्ट्रिय जनमोर्चाबाट हिमलाल पुरी र आनन्द शर्मा सदस्य रहेका छन् ।
काठमाडौं : राष्ट्रियसभाको बैठक आज दिउँसो बस्दै छ ।
नयाँ बानेश्वरस्थित संघीय संसद् भवनमा दिउँसो १ बजे बैठक शुरु हुने बैठकमा अध्यक्ष गणेशप्रसाद तिमिल्सिनाले राष्ट्रपतिको कार्यालयबाट प्राप्त विधेयक प्रमाणीकरणसम्बन्धी पत्रको व्यहोरा जानकारी गराउने सम्भावित कार्यसूची छ ।
यस्तै, अध्यक्ष तिमिल्सिनाले राष्ट्रियसभा नियमावली, २०७५ को नियम १४९ बमोजिम विषयगत समितिमा रहने सदस्यहरूको नाम मनोनयनका लागि प्रस्ताव गर्नेछन् ।
अध्यक्ष तिमिल्सिनाले नै राष्ट्रियसभाका विषयगत समितिका सभापतिको निर्वाचनको मिति र समय तोक्ने समेत सम्भावित कार्यसूची रहेको संसद् सचिवालयले जनाएको छ ।
काठमाडौं : नेकपा एकीकृत समाजवादीका सचिव रामकुमारी झाक्रीविरुद्ध पार्टी पंक्ति नै खनिएको छ । पूर्वमन्त्री झाक्रीको अभिव्यक्तिलाई लिएर पार्टीका नेता तथा कार्यकर्ताले उनको विरोध जनाइरहेका छन् । झाक्रीले अध्यक्ष माधवकुमार नेपालको विरोध जनाएको भन्दै उनको विरोध भइरहेको हो ।
गृहजिल्ला रौतहट पुगेका अध्यक्ष नेपालले हचुवाको भरमा परियोजना उद्घाटन गरेको अभिव्यक्ति झाक्रीले दिएकी थिइन् । लगत्तै सहरी विकास मन्त्रालयबाटै खण्डन गर्दै उक्त आयोजना रहेको जनाएको छ । त्यही पत्र र झाक्रीको अभिव्यक्तिलाई सामाजिक सञ्जालमा राखेर एकीकृत समाजवादीका कार्यकर्ताहरुले प्रचार गरिरहेका छन् ।
अध्यक्ष नेपाल र सचिव झाक्रीबीच केही समय यता सम्बन्ध चिसिएको छ । स्थानीय चुनाव लगत्तै मन्त्रिपरिषद् पुनर्गठनको निर्णय भएपछि झाक्री पार्टी नेतृत्वप्रति असन्तुष्ट बनेकी छन् । पार्टीले पूर्व जानकारी नै नदिइ मन्त्रिपरिषद् पुनर्गठनको निर्णय गरेको आरोप झाक्रीले लगाएकी छन् । एकीकृत समाजवादीले पार्टीको पूर्व निर्णय भन्दै मन्त्रीहरु फिर्ता बोलाएर नयाँ मन्त्रीको नाम प्रधानमन्त्री झलनाथ खनाललाई बुझाएको थियो ।
त्यसमा मन्त्रीबाट फिर्ता बोलाइएकाहरुले चर्को असन्तुष्टि जनाएका थिए । उनीहरुको असन्तुष्टिकै कारण एक महिनासम्म एकीकृत समाजवादीको निर्णय कार्यान्वयन भएन । अन्ततः एकीकृत समाजवादीको निर्णय कार्यान्वयन भयो । रामकुमारीसहित विरोध खतिवडा, किसान श्रेष्ठ र प्रेम आले सरकारबाट फिर्ता भए । स्वास्थ्य राज्यमन्त्री भवानी खापुङको भने बढुवा भयो ।
उनी नै स्वास्थ्यमन्त्री भए । जीवनराम श्रेष्ठ, मेटमणि चौधरी, शेरबहादुर कुँवर मन्त्री भए भने हिरा केसी स्वास्थ्य राज्यमन्त्री छन् । यसपछि चिसिएको झाक्री र अध्यक्ष नेपालको सम्बन्ध सुध्रन सकेको छैन । बरु थप तिक्तता बढेको छ ।
झाक्री मात्रै नभएर पूर्वप्रधानमन्त्री झलनाथ खनालले पनि पार्टी निर्णयप्रति असन्तुष्टि जनाउँदै आएका छन् । खनालले भने पार्टीको नीतिगत निर्णयप्रति असन्तुष्टि जनाउँदै आएका छन् । उनले मार्गदर्शक सिद्धान्तप्रति फरक मत राखेका थिए । अध्यक्ष नेपाल जनताको बहुदलीय जनवाद (जबज)कै पक्षमा छन् भने नेता खनालले भने अब समाजवादी कार्यक्रम ल्याउनुपर्ने पक्षमा छन् ।
अमेरिकी सहयोग परियोजना एमसीसीबारे त पार्टी निर्णय नै पालना गरेनन् । खनालले एमसीसीको विपक्षमा मतदान गरे । तत्कालीन नेपाल कम्युनिष्ट पार्टी (नेकपा) कालमा पनि एमसीसीको विपक्षमा थिए । तर एकीकृत समाजवादीले व्याख्यात्मक टिप्पणी सहित एमसीसी अनुमोदनको पक्षमा उभिदा नेता खनालले भने बिमती जनाए ।
स्थानीय चुनावमा नेपाली कांग्रेस सहितको सत्ता गठबन्धन गर्ने निर्णयमा पनि उनको बिमती थियो । कांग्रेस सहितको गठबन्धन नभएर वाम गठबन्धन गर्नुपर्ने खनालको तर्क छ । स्रोतका अनुसार, खनाल निकट नेताहरु अहिले अध्यक्ष नेपालसँग असहमत छन् । झाक्री पनि खनाल निकट नेता हुन् । यसले एकीकृत समाजवादीमा सैद्धान्तिक र संगठनात्मक संरचना पाइनसक्दै विभाजनको खतरा बढेर गएको छ ।
मुकुन्द लामिछाने/मध्यान्ह
काठमाडौं : प्रधानमन्त्री शेरबहादुर देउवासँग आइतबार लोकतान्त्रिक समाजवादी पार्टी (लोसपा) का नेताहरुले भेटवार्ता गरेका छन् । लोसपाका नेताहरुसँग प्रधानमन्त्री देउवाले बितेको एक वर्षदेखि भेटवार्ता हुँदै आएको छ । विशेषगरी लोसपाका अध्यक्ष महन्थ ठाकुरको पृष्ठभूमि नेपाली कांग्रेस हुनुको लाभ प्रधानमन्त्री देउवाले पाएको देखिन्छ ।
ठाकुरले जीवनको उर्वर समय कांग्रेस निर्माणमा खर्चिएका थिए । तर २०६४ सालको मधेश आन्दोलनसँगै अलग भएका ठाकुरले यसअघि नेकपा एमालेका अध्यक्ष केपी शर्मा ओलीलाई साथ दिएका थिए । ओलीलाई साथ दिएर प्रतिनिधिसभा विघटनको पक्षमा उभिएका ठाकुर सहित लोसपाका नेताहरुले लगत्तै कित्ता परिवर्तन गरे । ओली पदमुक्त भएर देउवा प्रधानमन्त्री हुँदा लोसपाका नेताहरुले कित्ता परिवर्तन गदै सत्तारुढ बने ।
गएको वर्ष ३ साउनमा लोसपाका सांसदहरुले देउवाले विश्वासको मत दिएका थिए । लोसपाले साथ दिएकै कारण देउवाले प्रधानमन्त्रीमा १६५ सांसदको समर्थन पाएका थिए । त्यसपछि लगतार लोसपाका नेताहरु प्रधानमन्त्री देउवासँग भेटवार्ता गरिरहेका छन् । तर सरकारमा सहभागी हुने र चुनावमा गठबन्धन गर्ने अवसर भने पाएका छैनन् ।
मधेश केन्द्रीत अर्का दल जनता समाजवादी पार्टी (जसपा) सरकारमा भएकाले प्रधानमन्त्री देउवासँगको भेटवार्ताले ठोस् रुप लिन सकेको छैन । गएको स्थानीय चुनावमै लोसपाले सत्ता गठबन्धनसँग तालमेल गर्न चाहन्थ्यो । तर जसपा गठबन्धनमा भएकाले त्यो प्रत्यास सफल हुन सकेन । प्रमुख प्रतिपक्षी दल नेकपा एमालेसँग केही स्थानीय तहमा गठबन्धन गरेपनि ०७४ जति पनि जित्न सकेन ।
फेरि सत्ता गठबन्धनले प्रतिनिधिसभा र प्रदेशसभा निर्वाचनमा गठबन्धन गर्ने निर्णय गरिसकेको छ । सिट बाँडफाँट गर्न कार्यदल नै बनाइसकेको छ । यस्तो बेलामा लोसपाका नेताहरुले प्रधानमन्त्री देउवासँग भेटवार्ता गरेका छन् । लोसपासँग सहकार्य गर्दा जसपा गुमाउनुपर्ने परिस्थितिसँग प्रधानमन्त्री देउवा सचेत देखिन्छन् । त्यसैले पनि निर्णयमा प्रधानमन्त्री देउवा पुग्न सकेका छैनन् ।
तर लोसपा बाहेकका दलहरुको मात्रै गठबन्धन गर्दा मधेश प्रदेशको नतिजा अर्कै हुन सक्छ । क्षति भने लोसपालाई पुग्न सक्छ । किनकि मधेश प्रदेशमा जसपा, कांग्रेस र माओवादी केन्द्रको प्रभाव राम्रो छ । अझ एकीकृत समाजवादीको पनि राम्रै उपस्थिति छ । तर तुलनात्मक कमजोर एमालेसँग गठबन्धन गरेर जाँदा ठूलो फाइदा लोसपालाई नपुग्न सक्छ । यो तथ्य बुझेर पनि लोसपासँग विकल्प भने साँघुरिएको छ ।
काठमाडौंः नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले समृद्ध मुलुक निर्माणको लागि विदेशमा रहेका नेपालीको भूमिका महत्वपूर्ण रहने बताएका छन् ।
‘समृद्ध नेपालको आधार, आर्थिक क्रान्तिमा प्रवासी नेपालीको सरोकार’ विषयक अन्तरक्रिया कार्यक्रमलाई आज जापानको राजधानी टोकियोमा सम्बोधन गर्दै उनले आर्थिक समृद्धिका लागि आफूहरू प्रयत्नशील रहेको र विदेशिएका नेपालीलाई एक दिन स्वदेश फर्कनका लागि अपिल गर्ने दिनको प्रतिक्षामा आफू रहेको बताए ।
उनले नेपाली समुदायमा नकारात्मक प्रवृत्ति रहेको भन्दै त्यसलाई सकारात्मक नतिजामा परिणत गर्नुपर्नेमा जोड दिए । ‘हाम्रो समाजमा अहिले पनि नकारात्मक सोच राख्ने र नकारात्मक कुरा गर्दा रमाइलो मान्ने मानिस रहेका छन् ।’ उनले भने, ‘हिरोसिमामा बम हानेको ठाउँ मैले आज हेरेँ । यत्रो दुर्घटना र हत्या हुँदा जापानीको मनमा के होला रु मनोभावना कस्तो होला भनेर सोधेँ । तर जापानीहरूमा कुनै विद्वेष छैन । त्यो बेलाको परिस्थिति त्यस्तै थियो । अब हामीले मिहिनेत गरेर विकासमा केन्द्रित हुनुपर्छ भनियो ।’
पूर्वप्रधानमन्त्री दाहालले नेपालमा भने असाध्यै नकारात्मक सोच्ने मानिस रहेको भन्दै गुनासो गरे । जापानीहरूले पुरानो पीडा भुलेर देशलाई विकासको गतिमा अघि लगिसकेको उल्लेख गर्दै उनले नेपालमा भने देशको निम्ति मर्छु भन्दा पनि सुख नपाइएको बताए ।
काठमाडौं : प्रतिनिधिसभाले तत्कालीन प्रधानन्यायाधीश चोलेन्द्रशमशेर जबराविरुद्ध दर्ता भएको महाअभियोगको प्रस्तावलाई महाअभियोग सिफारिस समितिमा पठाएको छ ।
आइतबार बसेको प्रतिनिधिसभा बैठकले जबराविरुद्ध दर्ता भएको महाअभियोग प्रस्तावलाई महाअभियोग सिफारिस समितिमा पठाएको हो । सभामुख अग्निप्रसाद सापकोटाले महाअभियोग प्रस्ताव समितिमा पठाउने राखेको प्रस्तावलाई बैठकले बहुमतले स्वीकृत गरेको हो ।
गत २२ फागुनमा प्रतिनिधिसभा बैठकले जबराविरुद्ध दर्ता भएको महाअभियोग प्रस्तावमाथि छानबिन गर्न ११ सदस्यीय महाअभियोग सिफारिस समिति गठन गरेको थियो । समितिमा सो प्रस्तावलाई पठाउने प्रस्तावलाई आइतबारकाे प्रतिनिधिसभाले बहुमतले स्वीकृत गरेको हो ।
गत फागुनमा संसदले एमाले, कांग्रेस, माओवादी केन्द्र, एकीकृत समाजवादी, लोकतान्त्रिक समाजवादी र जनता समाजवादीका सांसदलाई समेटेर महाअभियोग सिफारिस समिति गठन गरेको थियो ।
समितिमा एमालेबाट विष्णु पौडेल, लालबाबु पण्डित, शिवमाया तुम्बाहाङ्फे, कृष्णभक्त पोखरेल, कांग्रेसबाट मिनबहादुर विश्वकर्मा, रामबहादुर विष्ट, माओवादी केन्द्रबाट यशाेदा सुवेदी, रेखा शर्मा, एकीकृत समाजवादीबाट कल्याणी खड्का, लोसपाबाट एकवाल मियाँ र जसपाबाट प्रमोद साह छन् ।
काठमाडौं : एमाले सांसद प्रदीप ज्ञवालीले संसदीय छानविन समितिको अपूर्ण प्रतिवेदनका कारण अर्थमन्त्रालयमा सचिवहरुको भागभाग रहेको बताएका छन् ।
आइतबार बसेको प्रतिनिधिसभा बैठकमा उनले बजेट बनाउने क्रममा गत १४ जेठ मध्यराति भएका विषयमा छानविन गर्न गठित संसदीय समितिले अपूर्ण प्रतिवेदन बुझाएको बताए ।
जस कारण अर्थमन्त्रालयमा कुनै पनि सचिव जान नमानेको र भएका सचिवले पनि सरुवा मागेको उनको भनाइ छ ।
‘कुनै बेला अर्थमन्त्रालयमा सचिव जान हानथाप गर्थे । तर, अहिलेसचिव अर्थमन्त्रालयमा जान नमान्ने, भएकाले पनि सरुवा माग्ने अवस्था सृजना भयो । मन्त्रालयमा सचिव भागाभागको अवस्था सृजना हुनुमा छानविन समितिको अपूर्ण प्रतिवेदन, अथवा १४ जेठको घटना प्रतिउत्पादक अवस्था बनेको छ,’ ज्ञवालीले भने ।
काठमाडौं : निर्वाचन आयोगले प्रतिनिधिसभा र प्रदेशसभा निर्वाचनका लागि आजदेखि दल दर्ता प्रक्रिया शुरु गर्ने भएको छ । दल दर्ताका लागि साउन ३१ सम्मको समय तोकिएको आयोगले जनाएको छ ।
दल दर्ताका लागि निवेदन दिँदा प्रतिनिधिसभा सदस्यको छुट्टै र प्रदेशसभा सदस्यको हकमा प्रदेशगत रूपमा छुट्टाछुट्टै निवेदन पेश गर्नुपर्नेछ ।
आयोगमा दर्ता भएका दलहरूले पनि चुनावको प्रयोजनका लागि पुनः दर्ता गर्नुपर्ने व्यवस्था छ ।
प्रतिनिधि सभा तथा प्रदेशसभाको निर्वाचनमा चुनावी तालमेल गरेका दललाई एउटै चुनाव चिह्नसमेत लिन पाउने छन् ।
तालमेल गरेका दलले एउटै निर्वाचन चिह्नमा निर्वाचन लड्न खोजेमा त्यस्तो सुविधा पाउने आयोगले जनाएको हो । यसरी तालमेलमा जाने हुँदा निर्वाचन आयोगलाई दल दर्ता गर्दा नै जानकारी गराउनुपर्नेछ ।
राजनीतिक दलसम्बन्धी ऐन, २०७३ को दफा ४९ मा दुई वा त्यो भन्दा बढी दलहरू एकल निर्वाचन चिह्न लिई निर्वाचनमा भाग लिन पाउने व्यवस्था छ ।
संयुक्तरुपमा उम्मेदवारी दिँदा सम्बन्धित उम्मेदवार कुन दलमा आबद्ध हो भन्ने चाहिँ खुलाउनुपर्नेछ । तर यसरी संयुक्त निर्वाचनमा गएपछि सबैभन्दा बढी सिट प्राप्त गर्ने दलकै सांसद मानिने छन् ।
सरकारले आउँदो मंसिर ४ गतेका लागि प्रतिनिधि सभा र प्रदेश सभा चुनावको मिति तोकेको छ ।
मुकुन्द लामिछाने/मध्यान्ह
काठमाडौं : मौजुदा प्रतिनिधिसभा र प्रदेश सभामा सबैभन्दा ठूलो दलको रुपमा रहेको मुलुककै सबैभन्दा ठूलो पार्टी नेकपा एमालेले आसन्न मंसिर ४ गते हुने प्रदेश र प्रतिनिधिसभाको चुनावएक्लै लड्ने तयारी गरेको छ ।
गत बैशाख ३० मा सम्पन्न स्थानीय तहको निर्वाचनमा प्रमुख पाँच दल एकातिर थिए । नेपाली कांग्रेस, नेकपा माओवादी केन्द्र, नेकपा एकीकृत समाजवादी, जनता समाजवादी पार्टी (जसपा) र राष्ट्रिय जनमोर्चा चुनावी गठबन्धन बनाएर चुनावमा होमिँदा एमालेले केही साना पार्टीको साथ लिए पनि समग्रमा एक्लै चुनाव लडेको थियो । यस्तो हुँदा पनि दोस्रो ठूलो दल हुन सफल एमाले मंसिर ४ गते हुने प्रदेश र प्रतिनिधिसभाको चुनाव पनि एक्ले लड्ने तयारीमा छ ।
एक्लै चुनावमा जाने तयारीमा रहेको एमालेल मुख्यत ‘विकासका लागि स्थिर सरकार र स्थिरताका लागि बहुमत’ भनेर जनतामा जाने तयारी गरेको छ । यही अनुसार एमाले नेताहरुले सार्वजनिक अभिव्यक्ति दिइरहेका छन् ।
शनिवार मात्रै एमालेका अध्यक्ष केपी शर्मा ओलीले एमाले ढाल्न नेकपा माओवादी केन्द्रका अध्यक्ष पुष्पकमल दाहाल प्रचण्ड र नेकपा एकीकृत समाजवादीका अध्यक्ष माधवकुमार नेपाल नेपाली कांग्रेसरुपी बन्चरोको बींड बनेको टिप्पणी गरे । यस्तो टिप्पणीका पछाडि उनले स्थिर सरकार चलाउन नदिएको भनी प्रचण्ड र माधव नेपाललाइ आरोपित गर्न खोज्नु हो ।
शनिबार काठमाडौंमा आयोजित अगुवा कार्यकर्ता भेलामा एमाले अध्यक्ष ओलीले कांग्रेसलाई विगतमा २३ सिटमा खुम्च्याइ दिएर कम्युनिस्टलाई ठाडो शिर गरेर हेर्न नसक्ने बनाइदिएको तर अहिले कम्युनिस्टलाई हराउन कम्युनिस्ट नै कांग्रेसको बींड टिप्पणी गरेका हुन । एमाले अध्यक्ष ओलीको प्रश्न छ, ‘कांग्रेसको बींड हेर्नुस् त कस्ता छन् ? एमाले काट्ने, एमाले सिध्याउने भनेका बींड कस्ता छन् के के नामका छन् ?’
एमाले अध्यक्ष ओलीले रुख ढाल्ने बन्चरोको बींड रुखकै काठ प्रयोग हुँदा रुख धुरुधुरु रोएको एउटा कथा सुनाए ‘बञ्चरो लिएर एउटा रुख ढाल्न थालेछन् एक जनाले, वरतिर परतिरका रुख रुन थालेछन् । अरु रुखले सोधे ‘आखिर ढल्नु त छँदैछ, मर्नु त छँदैछ,‘कसैले काट्यो ढल्नुपर्यो भनेर किन आँशु खसालेको ?’ देख्ने रुखहरुले भने, ‘बन्चरोले काट्यो ठूलो कुरा भएन, तर हामीलाई काट्ने बञ्चरोको बींड काठकै छ, त्यो चाहिं दुखको कुरा हो ।’
बञ्चरोले मात्र रुख ढाल्न सक्दै नसक्ने उल्लेख गर्दै उनले भने, ‘कांग्रेसलाई २३ सिटमा पु¥याइदिएका थियौं लड्ने त कुरा छाडिदिऔं हेर्न पनि सकेको थिएन, तर अदालत गएर सरकार ढालिपाउँ भन्ने दक्षिणपन्थी सरकार बनाइपाउँ भनेर परमादेश मागे ।’
एमाले अध्यक्ष ओलीले माओवादी र एकीकृत समाजवादी केन्द्रका नेता कार्यकर्तालाई एमालेमा फर्किन पनि आग्रह गरे ।
Bagbazar Kathmandu
Phone : 014226366, 014228298
Mobile : 9841293261, 9841206411
Email : [email protected]
सूचना विभाग दर्ता नं. : 807/074/075
© 2022 मध्यान्ह सर्वाधिकार सुरक्षित | Managed by Bent Ray Technologies