काठमाडौं : उपप्रधान एवम् गृहमन्त्री रवि लामिछानेले सहकारी ठगी प्रकरणमा फरार रहेका जीबी राईको लोकेसन पत्ता लागिसकेको दाबी गरेका छन् ।
गृहमन्त्री लामिछानेले दर्जनभन्दा बढी सहकारी ठगीको आरोप लागेका जीबी राई मलेसियामा भएको पत्ता लागेको बताएका हुन् ।
श्री एयरलाइन्सको परीक्षण उडानका लागि भरतपुर आएका लामिछानेले पत्रकारसँग कुराकानी गर्दै राईको लोकेसन पत्ता लागेको र उनलाई नेपाल ल्याउने विषयमा पहल थालिएको बताए ।
मलेसियासँग सुपर्दुगी सन्धी नभएका कारणले उनलाई ल्याउन केही ढिलाई भएको उनले बताए ।
यस्तै गृहमन्त्री लामिछानेले प्रहरी महानिरीक्षक फेर्ने चर्चा कतै नचलेको स्पष्ट पारे । उनले सो विषयमा कसैले चर्चा चलाएको र त्यसमा सत्यता नरहेको बताए ।