दोहा, कतार : नेवाः देय् दबु केन्द्रद्वारा प्रवास शाखाका रूपमा पहिलो सम्बन्धन प्राप्त तथा कतारमा रहेका नेवार समुदायको साझा संस्था नेवा पुचः कतारको चौथो अधिवेशन खुला र बन्द सत्र गरी दुई चरणमा सम्पन्न भएको छ । शुक्रबार ग्राण्डमलमा अवस्थित लालीगुराँस रेस्टुरेन्टको सभा हलमा सम्पन्न अधिवेशनको बन्द सत्रबाट जमुना श्रेष्ठ (भक्तपुर)को अध्यक्षतामा सर्वसम्मत रूपमा नयाँ कार्यसमिति चयन भएको छ ।

समितिको वरिष्ठ उपाध्यक्ष कैलाश श्रेष्ठ, उपाध्यक्षद्वय लक्ष्मण श्रेष्ठ र सृष्टि श्रेष्ठ, महासचिव विकास श्रेष्ठ, सचिवद्वय ओम कुमार श्रेष्ठ र रबिन कर्माचार्य, कोषाध्यक्ष अशोक श्रेष्ठ, सहकोषाध्यक्ष पर्शुराम श्रेष्ठ रहेका छन् । त्यस्तै कार्यसमिति सदस्यहरूमा निरु श्रेष्ठ, सरिता श्रेष्ठ, अस्मिता महर्जन, अञ्जना श्रेष्ठ, राम सुन्दर श्रेष्ठ, समीर श्रेष्ठ, राम हरि श्रेष्ठ, देव नारायण नगरकोटी, गंगाप्रसाद श्रेष्ठ, विकास नानिचा श्रेष्ठ र सुवर्ण कुबेर श्रेष्ठ रहेका छन् । सर्वसम्मत चयन भएको समितिलाई निर्वाचन समितिका संयोजक किशोर महर्जनले पद तथा गोपनीयताको सपथ ग्रहण गराएका थिए ।

अधिवेशनको खुला सत्र पुचः कतारका अध्यक्ष राजु महर्जनको सभापतित्व तथा नेपाल आदिवासी जनजाति महासंघ कतारका अध्यक्ष डी.एन. मगरको प्रमुख आतिथ्यतामा सम्पन्न भएको हो । अधिवेशनलाई सम्बोधन गर्दै प्रमुख अतिथि मगरले नेपालमा सबैभन्दा पहिले नेवारहरूले नै संस्था स्थापना गरेको बताउँदै कतारमा पनि नेवा पुचः संस्कार संस्कृतिको संरक्षण र प्रवद्र्धन गर्दै अगाडि बढिरहेकोमा खुसी व्यक्त गरे ।

नेवारी समुदायको पुरानो नृत्य कुमारी नृत्यमार्फत कोरियोग्राफर तथा नृत्यांगना सृष्टि श्रेष्ठले स्वागत नृत्य पेस गरेकी थिइन् । अधिवेशनमा विभिन्न कलाकारहरूले नेवारी तथा नेपाली भाषामा सांगीतिक प्रस्तुति दिएका थिए । कार्यकालभरि विभिन्न क्षेत्रबाट सहयोग गर्ने सहयोगी, कलाकारसहित नेपाल आदिवासी जनजाति महासंघ कतार मातहतका सबै मातृ संस्थाहरूलाई सम्मान गरिएको थियो । अधिवेशनमा न्यून संस्थाहरूलाई निमन्त्रणा गरिएको थियो भने मातृ संस्था प्रमुख तथा प्रतिनिधिहरूले शुभकामना मन्तव्य राखेका थिए ।

अधिवेशनको खुला सत्रको समापन गर्दै सभापति महर्जनले आफ्नो कार्यकाल सफल बनाउन सहयोग गर्ने सबैमा आभार व्यक्त गरेका थिए । पुचःका वरिष्ठ उपाध्यक्ष राकेश श्रेष्ठले स्वागत मन्तव्य राखेको अधिवेशनलाई महासचिव कैलाश श्रेष्ठले सहजीकरण गरेका थिए ।