रियाद, साउदी अरब : साउदीमा कार्यरत नेपालीहरुले चासोक तङनाम (नवाँगी पर्व) मनाएका छन् । याक्थुङ चुम्लुङ समाज साउदी अरबले शुक्रबार आफ्नो पाँचौं वार्षिकोत्सव तथा चासोक तङनाम (नवाँगी पर्व) मनाएको हो ।
कार्यक्रममा उधौली चासोक तङनाम नवाँगी पर्व येले तङबे ५०८४ को शुभकामना आदान-प्रदान गरिनुका साथै मौलिक सांस्कृतिक प्रस्तुतिहरू प्रदर्शन गरिएका थिए ।
कार्यक्रमको मुख्य आकर्षण केलाङ नाच र च्याब्रुङ नाच थिए, जसले लिम्बू समुदायको मौलिकता र सांस्कृतिक धरोहरलाई जीवन्त बनाएको थियो । कार्यक्रममा साउदी अरबमा क्रियाशील संघ-संस्थाका प्रतिनिधिहरू, बुद्धिजीबी, समाजसेवी, व्यवसायी, पत्रकार र नेपाली समुदायको उपस्थिति रहेको थियो ।
याक्थुङ चुम्लुङ समाजले यस्तो कार्यक्रम आयोजना गरेर साउदी अरबमा कार्यरत नेपालीहरूलाई सांस्कृतिक मूल्यमान्यता जगेर्ना गर्न र समाजमा एकता र सहकार्यको भावना प्रवर्द्धन गर्न प्रेरित गरेको कार्यक्रममा सहभागीहरूले बताएका छन् ।
कार्यक्रमको समापनमा सहभागीहरूलाई धन्यवाद ज्ञापन गर्दै आगामी दिनमा यस्ता कार्यक्रमहरूलाई अझ प्रभावकारी बनाउन सबैको साथ र सहयोग आवश्यक रहेको आयोजकको भनाइ थियो ।
