काठमाडौं । मोरङको उमागौरी कृषि सहकारी संस्थाको ठगी प्रकरणमा जोडिएकी संसद्का लेखा समिति सभापति ऋषिकेश पोखरेल पत्नी अञ्जला कोइरालाविरुद्ध पक्राउ पुर्जी जारी भएको छ ।
कोइरालासहित २६ जनाविरुद्ध मंगलबार जिल्ला अदालत मोरङले पक्राउ पुर्जी जारी गरेको हो । कोइराला उमागौरी सहकारीको पूर्वसंचालक हुन् । सहकारी संकटमा परेपछि कोइरालाले ५ माघ २०७८ मा सहकारीबाट राजीनामा दिएकी थिइन् । मोरङको धनपालथान गाउँपालिका– ४ कर्सियामा रहेको यो सहकारीमा कुनै बेला संचालक समिति सदस्य रहेकी कोइराला मोरङ– २ मा निर्वाचित एमाले सांसदसमेत रहेका लेखा समिति सभापति पोखरेलकी पत्नी हुन् ।
सहकारीको संचालकमा पोखरेलले नै पत्नीको नाम राखेका थिए । शिक्षण पेसामा आवद्ध कोइराला सहकारीको सदस्य हुँदा सहकारीले लघुवित्तबाट ऋण लिने निर्णय गरेको थियो ।
यसअघि नै मुद्दा चलेका तर उपस्थित नभएका २५ जनाको हकमा मोरङ जिल्ला अदालतले ‘उपस्थित हुन आउनू’ भनी ३५ दिने म्याद जारी गरेको हो । सोही सहकारी प्रकरणमा जोडिएका अन्य १० जनाविरुद्ध भने यसअघि नै पक्राउ पुर्जी जारी भइसकेको थियो । पक्राउ परेकाबाहेक २५ जनाको हकमा म्याद जारी भएको हो ।
उमागौरीले विभिन्न बैंक तथा वित्तीय संस्थाबाट ११ करोड ५६ लाख ७८ हजार रुपैयाँ ऋण लिएको देखिन्छ । १८ करोड ४० लाख कुल पुँजी देखाइएको सहकारीको वासलात रिपोर्टमा १७ करोड ८७ लाख ४२ हजार रुपैयाँ कर्जा तथा सापट लगानी रहेको देखाइएको छ ।
‘अञ्जला कोइरालासहित २६ जनाविरुद्ध पक्राउ पुर्जी जारी भएको हो’, अदालतका सूचना अधिकारी हेमबहादुर बुढाथोकीले भने, ‘२७ मंसिरमा अभियोगपत्र दायर भएको थियो । सोहीअनुसार पक्राउ पुर्जी जारी भएको हो ।’
इलाका प्रहरी कार्यालय रंगेलीले यो विषयमा अनुसन्धान गरी प्रतिवेदन बुझाएको थियो । सोही आधारमा सरकारी वकिलको कार्यालय मोरङले पोखरेल पत्नी अञ्जला र सहकारीका अध्यक्ष शम्भु रौनियारसहित २६ जनाविरुद्ध २२ करोड रुपैउयाँ बिगोसहित मुद्दा दर्ता गरेको थियो । यसअघि कोइरालाविरुद्ध सहकारी ठगीमा जिल्ला अदालत मोरङमा मुद्दा दायर भएको थियो ।
ठगी प्रकरणमा २६ प्रतिवादीमध्ये रोशन राजवंशीलाई थुनामा पठाउन अदालतले आदेश दिएको थियो । सरकारी वकिल कार्यालयका अनुसार सहकारीको २२ करोड रुपैयाँ बिगो माग दाबी गरिएको छ ।
प्रतिवादीहरू उमागौरी कृषि सहकारीका अध्यक्ष शम्भुप्रसाद रौनियार, उपाध्यक्ष लक्ष्मण साह रौनियार, सचिव आलम अनसारी मिया, कोषाध्यक्ष शम्भुप्रसाद सिंह, सदस्यहरू आमोदकुमार मण्डल, जितमान ठाकुर, लेखा समिति संयोजक विजयकुमार यादव, लेखा समितिका सदस्यहरू सुरेन्द्रकुमार राजवंशी, अशोककुमार विश्वास फरार छन् ।
त्यस्तै, संचालक समितिकी पूर्वउपाध्यक्ष दिलमाया राई, प्रतिनिधिसभाअन्तर्गतको सार्वजनिक लेखा समितिका सभापति ऋषिकेश पोखरेलकी श्रीमती एवं पूर्वसंचालक समिति सदस्य अञ्जला कोइराला, पूर्वउपाध्यक्ष उपासी राजवंशी, लेखापाल सोनु यादव, पूर्वकर्मचारीहरू मोहमद नजाम उद्दिन, चम्पा गिरी, पूर्वउपाध्यक्षहरू शम्भुप्रसाद सिंह, सन्तलाल खवास, सुमन लोहनी, पूर्वसहसचिव लक्ष्मीदेवी कार्की राजवंशी, पूर्वसदस्य ज्योति बाँस्कोटा, पूर्वसंचालक समिति सदस्यहरू मित्रप्रसाद शिवाकोटी, शरद् सिंह, मो. नसरुद्दिन, मनोजकुमार सोनी र यशोदाकुमारी राजवंशीलाई फरार प्रतिवादी बनाई जिल्ला सरकारी वकिलको कार्यालय मोरङले अभियोग दायर गरेको थियो ।
योगिता शर्मा बाँस्तोलाको जाहेरीमा दायर भएको उक्त मुद्दा सहकारी ऐन, २०७४ को दफा १२२ अनुसार प्रतिवादीअन्तर्गतको कसुर अगाडि बढाइएको छ ।
सर्वसाधारणको बचत तथा ऋण अपचलन गरेपछि करिब डेढ वर्षयता सहकारीको कार्यालय बन्द छ । अनुसन्धानमा असहयोग गरेको भन्दै प्रहरीले १४ कात्तिकमा सहकारीको कार्यालयको ताला फोडेर कागजात जफत गरेको थियो ।
