सुर्खेत । कर्णाली प्रदेशको राजधानी वीरेन्द्रनगर सुर्खेतमा सवारी साधनको चाप बढ्दै गएको छ । सवारी चाप बढेसँगै यहाँ वीरेन्द्रनगर बजार क्षेत्रमा सही तरिकाले बाटो काट्न र सवारी दुर्घटना न्यूनीकरणका लागि ट्राफिक लाइटको आवश्यकता छ । 

तर, अहिलेसम्म कर्णालीका कुनै पनि बजार क्षेत्र तथा चोकहरूमा ट्राफिक लाइट राखिएका छैनन्, जसले गर्दा यस क्षेत्रका यात्रु तथा चालकले लाइटका बारेमा व्यावहारिक ज्ञानसमेत पाउन सकेका छैनन् । 

ट्राफिक लाइटका रूपमा प्रयोग हुने रातो, हरियो र पहेंलो रङ र यसको अर्थका बारेमा यात्रु र चालकलाई बुझाउनसमेत यसको आवश्यकता भए पनि यसका बारेमा सरोकारवाला निकायको ध्यान पुग्न सकेको छैन । ट्राफिक प्रहरीको आँखा छलेर नियम मिच्ने प्रवृत्ति धेरै सवारी चालकमा रहेकाले ट्राफिक व्यवस्थापन गाह्रो हुने गरेको ट्राफिक प्रहरीहरूकै गुनासो छ । 

जिल्ला ट्राफिक प्रहरी कार्यालय सुर्खेतका प्रहरी प्रमुख वकिल सुनारले ट्राफिक नियम जानकारहरूबाट नै प्रहरीको आँखा छल्दै नियम मिच्ने प्रवृत्ति हटाउन एउटै चोकमा धेरै संख्यामा ट्राफिक प्रहरी खटाउन बाध्य हुनुपरेको बताए ।

बजारका मुख्य चोकमै सवारी साधन व्यवस्थित गर्न नियमित रूपमा २–४ जनासम्म ट्राफिक प्रहरी खट्दै आएका छन् । सडकमा ट्राफिक लाइटको व्यवस्था नहुँदा ट्राफिक प्रहरी हातकै इशारामा सवारी साधन व्यवस्थापन गर्न बाध्य छन् ।  

प्रहरी प्रमुख सुनार वीरेन्द्रनगरमा ट्राफिक लाइट अतिआवश्यक भएको बताउँछन् । ट्राफिक लाइटले यातायात व्यवस्थामा अझै सहजता ल्याउने र जनमानसमा नियमको पालना गर्ने मानसिकताको विकास गर्न मद्दत गर्ने भएकाले ट्राफिक व्यवस्थापनलाई चुस्त बनाउन ट्राफिक लाइटको महत्त्वपूर्ण भूमिका रहेको उनको भनाइ छ ।

उनले यहाँ ट्राफिक लाइटको व्यवस्था गर्न सकेमा धेरैलाई आधारभूत ज्ञान हुने र अन्य ठूला शहरमा जाँदा सहज हुने बताए । ‘म्यानुअलभन्दा ट्राफिक लाइटले काम गर्दा सहज हुन्छ’, उनले थपे, ‘यहाँ लाइट भएको भए बजार यति अव्यवस्थित हुने थिएन । साथै, दुर्घटनामा पनि धेरै मात्रामा कमी आउने थियो ।’ एनका अनुसार सुर्खेतमा ४० हजारभन्दा बढी सवारी साधन दर्ता छन् । त्यसमध्ये ९० प्रतिशत वीरेन्द्रनगरकै सडकमा गुड्छन् । तर, ती सबै सवारी साधन प्रहरीको हातको इसारा र सिट्टीमा भर पर्नुपर्ने बाध्यता छ । 

जडान गर्ने तयारीमा नगरपालिका

वीरेन्द्रनगरमा ट्राफिक लाइट लगाउने तयारीमा रहेको नगरपालिकाको दाबी छ । वीरेन्द्रनगर नगरपालिकाका प्रमुख प्रशासकीय अधिकृत लक्ष्मीप्रसाद बाँस्कोटाले नगरपालिका वीरेन्द्रचोकमा तत्कालै ट्राफिक लाइट जडान गर्ने प्रक्रियामा रहेको बताए । उनले केही दिनअघि मात्र वीरेन्द्रचोकमा ट्राफिक लाइट जडान गर्ने कार्यपालिका बैठकमा निर्णय भएको जानकारी दिए । 

‘हामीले यसै वर्ष वीरेन्द्रनगरमा लाइट राख्ने निर्णय गरेका छौं, त्यसका लागि एक हप्ताभित्रमा टेन्डर खुलाउँछौं । अरू सबै प्रक्रिया पूरा भइसकेको छ’, उनले मध्यान्हसँग भने । अधिकृत बाँस्कोटाले वीरेन्द्रचोकमा लाइट जडानका लागि २५ लाख रुपैयाँसमेत विनियोजन गरिसकेको जानकारी दिए । 

५ ठाउँमा अर्को वर्ष

प्रमुख प्रशासकीय अधिकृत बाँस्कोटाले यस वर्ष वीरेन्द्रचोकमा लाइट राख्ने र अर्को वर्ष यहाँका विभिन्न ५ ठाउँमा लाइट राख्ने जानकारी दिए । उनले अर्को वर्ष पिपिरा चोक, एयरपोर्ट, बसपार्क, मंगलगढी र यरीचोकमा लाइट राख्ने तयारी गरेको जानकारी दिए ।

‘केही दिन अगाडि मात्र कार्यपालिकाको बैठक बसेर वीरेन्द्रचोकमा यसै वर्ष र अरू ५ ठाउँमा अर्को वर्ष लाइट राख्ने भनेर निर्णय भएको छ’, उनले भने, ‘ट्राफिक लाइट संचालन गर्न आवश्यक सहयोग गर्ने भन्ने हिसाबले यातायात व्यवस्था विभागबाट पनि पत्र आइसकेको छ । सम्भवतः अब एक हप्तामा हामीले प्रक्रिया सुरु गर्छाैं ।’