सुर्खेत : कालीकोटको तिलागुफा नगरपालिकालाई साक्षर घोषणा गरिएको छ । बिहीबार कर्णाली प्रदेशका सामाजिक विकास मन्त्री घनश्याम भण्डारीको सहभागितामा साक्षर पालिका घोषणा गरिएको हो । तिलागुफा कालीकोटको सातौं साक्षर पालिका घोषणा भएको हो । अब सन्नित्रीवेणी नगरपालिका र खाँडाचक्र नगरपालिका साक्षर घोषणा हुन बाँकी छन् ।

राष्ट्रिय जनगणना २०७८ अनुसार तीलागुफाको जनसंख्या १६ हजार १९७ रहेको छ । नगरपालिकामा ३६ सामुदायिक विद्यालय छन् । साक्षर पालिका घोषणा गर्ने अभियानअन्तर्गत ११ वटै वडामा सामुदायिक सिकाइ केन्द्रमार्फत निरक्षर विवरण अनुसार तथ्यांक संकलन गरिएको थियो । जसअनुसार एक हजार ६६ जन निरक्षर रहेका छन् ।

घोषणाका आधार तोकिएका १२ सूचकमध्ये ९५ प्रतिशत पूरा गरेपछि साक्षर पालिका घोषणा गरिएको नगरप्रमुख शंकरप्रसाद उपाध्यायले बताए । उनका अनुसार नगरपालिकाले साक्षर अभियानअन्तर्गत सञ्चालन गरेका क्रियाकलापको निरन्तरता, सीपसँग जोड्न, सिकाइलाई निरन्तर प्रक्रियाका रूपमा लिने र आगामी आर्थिक वर्षहरुमा निश्चित बजेट विनियोजन गरिनेलगायतका प्रतिबद्धता जनाइएको छ । तिलागुफालाई आर्थिक वर्ष २०८३/८४ मा पूर्ण साक्षर घोषणा गर्ने लक्ष्य लिइएको छ ।

मन्त्री घनश्याम भण्डारीले साक्षर नगरपालिका घोषणासँगै पाठ्यक्रम र पाठ्यवस्तुमा लेखिएका विषयवस्तुलाई व्यावहारिक जीवनमा लागू गर्न उत्पादनशील क्षेत्रमा केन्द्रित हुनुपर्ने धारणा राखे । त्यसका लागि प्रमुख पर्यटकीय स्थल रारा जाने बाटोमै रहेको कालीकोटमा पर्यटन र जडीबुटीको क्षेत्रमा थुप्रै सम्भावना रहेको उनले बताए । त्यसको कार्यान्वयनमा स्थानीय तहहरुले महत्त्वपूर्ण भूमिका खेल्ने उनले जानकारी दिए ।

नेताहरुप्रति हेर्ने दृष्टिकोण नकारात्मक हुनुको कारणबारे प्रस्ट्याउँदै निर्वाचित जनप्रतिनिधिले गाउँ समाज बनाउन ध्यान केन्द्रित हुनुपर्ने बताए । अधुरा अपुरा योजना सम्पन्न गराउन विवरण माग गरिरहेको बताए ।

जिल्ला समन्वय समिति प्रमुख रञ्जित शाहीले स्वास्थ्य, शिक्षालाई नैसर्गिक अधिकार भनिए अनुरुप कार्यान्वयनमा सबै तहका सरकार कटिबद्ध हुनुपर्ने बताए । उनले वस्तुस्थिति अनुसार यहाँका नागरिकलाई साक्षर बनाइ समृद्ध नेपाल निर्माणमा टेवा पुग्ने विश्वास व्यक्त गरे ।