दोहा, कतार : कतारवासी तमुहरूको साझा संस्था तमु (गुरुङ) समाज कतारले यस वर्षको सप्री ल्हो ल्होसार मनाउने भएको छ । हरेक वर्ष पुस १५ मा मनाउँदै आएको ल्होसार यो वर्ष पनि मुप्रही ल्होलाई बिदाइ र सप्रही ल्हो लाई स्वागत गर्दै मनाउन कार्यक्रमको आयोजना गर्न लागिएको हो ।

तमुहरूको सांस्कृतिक राष्ट्रिय पर्व ल्होसारलाई थप संगीतमय बनाउन नेपालबाट हास्य कलाकार तथा जादुगर शेरबहादुर गुरुङ र लोक दोहोरी तथा कौडा चुड्का गायिका बबिता गुरुङ कतार आउने आयोजकले जनाएको छ ।

आगामी शुक्रवार अबु हामुर स्थित आइडियल इन्डियन स्कुलको सभा हलमा सम्पन्न हुने कार्यक्रमको तयारी अन्तिम चरणमा पुगेको समाजकी अध्यक्ष टौमाया गुरुङले जानकारी दिइन् । कार्यक्रममा तमु सांस्कृतिक परिवार कतारका कलाकारहरूसहित एनआरएन आइडल २०२३ का विजेता रुस्तम तामाङ, नृत्य तर्फकी विजेता निरु श्रेष्ठ लगायत अन्य थुप्रै कलाकारहरूले सांगीतिक प्रस्तुति दिनेछन् ।

कार्यक्रम हलसम्म पुग्न ग्रान्डमल, सनैया -४७, मतार गदिम, उमसलाल, अलखोर, होम साइड, बिराकत अल अवामिर, अर्जेन्टिना क्यामलगायतका अन्य धेरै स्थानबाट यातायातको समेत व्यवस्था रहेको आयोजकले जनाएको छ । मध्यान्ह राष्ट्रिय दैनिक सप्री ल्हो ल्होसार कार्यक्रमको सञ्चार सहयोगीका रूपमा रहेको छ ।