अंग्रेजी नयाँ वर्ष २०२५ लाई स्वागत गर्न संसार तम्तयार भएर बसेको छ । अन्तर्राष्ट्रिय संचार माध्यमहरूले वर्षभर भएका घटना विवरण तयार पारेर प्रकाशन गरिरहेका छन् । व्यापारिक कम्पनीहरू आफ्ना उत्पादनको प्रवद्र्धन गर्न नयाँ वर्ष विशेष प्याकेज घोषणा गरिरहेका छन् । नयाँ कम्पनी खुल्ने अन्तिम तयारीमा जुट्नेहरूको संख्या उत्तिकै छ । नयाँ वर्षसँगै आर्थिक वर्ष गणना हुने देशहरूका निम्ति त यो दिन विशेष हुने नै भयो । धेरैजसो युरोपका देशहरू, ल्याटिन अमेरिकी देशहरू, कतिपय अफ्रिका र एसियाली देशहरूले नयाँ वर्षदेखि नै आर्थिक वर्षको पनि गणना गर्छन् । त्यस्ता देशहरूका निम्ति नयाँ कार्यक्रमको घोषणा र वर्षभरको समीक्षा गर्ने यो विशेष दिन पनि हो ।
अंग्रेजी नयाँ वर्षको महत्त्व बढिरहनुमा प्रविधिको छलाङले ‘विश्व एक घर’को मान्यता थप बलियो हुनु पनि हो । हाम्रै देशको सन्दर्भमा पनि अहिले संसारभर नेपाली पुगेका छन् । यसको अर्थ संसारभरको संस्कृतिसँग नेपाली परिचित भइरहेका छन् । अर्थात्, अंग्रेजी नयाँ वर्षको उत्सव अब नेपालीहरूको पनि विशेष बनिरहेको छ । त्यसैले यो दिनलाई विशेष महत्त्वका साथ हेर्न सकिन्छ । नयाँ वर्षलाई विशेष बनाउने संस्थागत र व्यक्तिगत काइदाहरू हुन्छन् । नेपालीले अंग्रेजी वर्ष मनाइरहँदा यी दुवै विकल्पमा खुला हुनुपर्छ । त्यो भनेको सरकारको नेतृत्वमा रहनेहरूले संस्थागत रूपमै वर्षभरको समीक्षा र नयाँ संकल्प गर्नु राम्रो हुन्छ । नागरिकले व्यक्तिगत रूपले पनि नयाँ वर्षलाई विशेष बनाउन सक्छन् ।
व्यक्तिगतको निर्णय उसको रोजाइअनुसार हुनु सर्वोत्तम विकल्प हो । तर, शासन सत्तामा बस्नेहरूले वर्षभर भएका गल्तीहरूको समीक्षा गरेर एउटा निष्कर्ष निकाल्न सकिन्छ । सन् २०२४ लाई हेर्ने हो भने संसारभरको प्रवृत्ति निरंकुशताको पराजय देखिएको छ । दक्षिण एसियाकै बंगलादेश र श्रीलंका त्यसका बलिया उदाहरण हुन् । भर्खरै सिरियाका निरंकुश शासकले देश छाडेर भाग्नुपरेको छ । युद्ध नीतिविपरीत आश्वासन दिने डोनाल्ड ट्रम्प अमेरिकाको राष्ट्रपति निर्वाचित भएका छन् । हिन्दु अतिवादको राजनीति छिमेकी भारतमा पराजित भएको छ । अरू यस्ता थुप्रै उदाहरण छन्, जहाँ जनताले निरंकुशता अस्वीकार गरेका छन् । नेपालमा पनि नयाँ वर्ष मनाइरहँदा नागरिक स्वतन्त्रता र सार्वभौमिकताबारे नेतृत्वमा रहनेहरूले ध्यान दिनुपर्छ । कम्तीमा नेतृत्व गर्नेहरूले लोकतान्त्रिक अभ्यास र मान्यतामा विश्वास गरे भने नयाँ वर्ष उपलब्धिमूलक नै हुनेमा ढुक्क हुन सकिन्छ किनकि गलत नगर्नु पनि आफैंमा उपलब्धि हो ।
