जुम्ला : जुम्लामा नियमित रुपमा ९ कक्षाका विद्यार्थीले एसईई परीक्षा दिन मिल्ने भन्दै केही शिक्षक र विद्यालयले शुल्क लिने गरेको समाचार बाहिरिए पनि सरोकारवाला पक्ष भने मौन रहेको छ ।
गैरकानुनी विषयलाई शिक्षण सेवा जस्तो पवित्र पेसा बोकेकाहरुबाट भइरहँदा विद्यार्थी र अभिभावकहरूको लागि थप चिन्ताको विषय बनेको छ ।
शिक्षा प्रणालीमा सुधारको आवश्यकता रहेको बेला विद्यालय र शिक्षकहरूले विद्यार्थीहरुबाट चर्को शुल्क लिनु, नियमित पढीरहेका विद्यार्थीलाई विभिन्न प्रलोभन देखाइ पैसामा सर्टिफिकेट किन्न खोज्नुले समस्या उत्पन्न भएको छ ।
तातोपानी ४ वडामा रहेको नेत्र ज्योती मावि हाँकुले गुठीचौर १ मा रहेको खड्गदेवी मावि मणिसाँघुका नियमित रुपमा कक्षा ९ मा अध्ययनरत १५ जना विद्यार्थीबाट एक जनाको ५ हजारका दरले एसईई परीक्षा फारम भरिदिने भन्दै शुल्क लिएका छन् ।
गत वर्ष खड्गदेवी मावि मणिसाँघुका ९ कक्षाको रजिष्ट्रेशन फारम नभरी नेत्रज्योती मावि हाँकु विद्यालयबाट गैरकानुनी रुपमा एसईईको परीक्षा दिएर पास भएको विषय समेत बाहिरिएको छ ।
खड्गदेवी मावि मणिसाँघुका कक्षा ९ का विद्यार्थी जुनमाया रोकायासहितका गडी गाउँका ३ जना र १३ जना गुठीगाउँका गरी १६ जना विद्यार्थीबाट ५ हजारका दरले २०८१ चैत ७ गतेबाट सञ्चालन हुने एसईईको परीक्षाको फारम भर्ने भन्दै अभिभावकबाट तातोपानी ६ कालिका आधारभूत विद्यालयका शिक्षक रमेश न्यौपानेले पैसा लिएको आरोप लागेको छ ।
खड्गदेवी मावि मणिसाँघुका कक्षा ९ मा अध्ययनरत विद्यार्थीहरु सुरेन्द्र बुढा, सुशिल बोहोरा, सुनिल बोहोरा, आन्नद बस्नेत, रबिन्द बस्नेत, सन्त बुढा, रामछाया बाहोरा, जुनमाया रोकाया, जनुदेवी बोहोरा, सपना बस्नेत, जुनतारा रोकाया, निरुता बोहोरा, निशा बोहोरासहितका विद्यार्थी पैसा फिर्ता गरिदिन माग गर्दै शिक्षा विकास तथा समन्वय ईकाइको कार्यालयमा पुगेका थिए । तर गैर कानुनी रुपमा पैसा असुली हुँदा कक्षा ९ का विद्यार्थीलाई एसईई पास गराउने शिक्षक र विद्यालयविरुद्ध कानुनी कारबाही गर्नुको सट्टा यहाँका जिम्मेवार निकाय टुलुटुल हेरेर बसेका छन् ।
गत वर्ष कक्षा ९ का विद्यार्थीले रजिष्टे«शन फारम नभरी ९ को परीक्षा उत्तिर्ण नगरी एसईई पास गर्नेमा खड्ग देवी मावि मणिसाँघुका मात्रै १० जना विद्यार्थी रहेको विद्यालयले जनाएको छ । उनीहरुले पनि एसईईको परीक्षा फारमको लागि ५सय तिर्नुपर्नेमा ५ हजारका देखि २० हजारसम्म तिरेको बताउने गरेका छन् ।
त्यस्तै शिक्षा विकास तथा समन्वय इकाई जुम्लाका प्रमुख रमेशबहादुर मल्लले यस्तो कार्य गर्ने शिक्षक र विद्यालयलाई कानुनी व्यवस्था अनुसार कारबाही गर्ने बताए ।
उनले यस पटक कक्षा ९ का विद्यार्थीको फारम शिक्षा विकास तथा समन्वय ईकाइले रद्द गरी सकेकाले उनीहरुले गैरकानुनी रुपमा असुलेको शुल्क फिर्ता गराउन विद्यालयका प्रधानाध्यापकलाई भनिसकेको बताए ।
त्यस्तै खड्गदेवी मावि मणिसाँघुकाका प्रधानाध्यापक रामप्रसाद थकालीका अनुसार नियमित कक्षा ९ मा पढ्ने विद्यार्थीले एसईई दिने विषय नियममा नमिल्ने बताए ।
गत वर्ष पनि प्रधानाध्यापक बिष्णुभक्त शर्माको पालामा नियमित रुपमा कक्षा ९ का जुनदेवी बोहोरा, चिरन देवी एडि, महेन्द्र बोहोरा, नविन एडि, नरेश बोहोरा, निमर्ला बोहोरा, पुष्पा बोहोरा, सुमान एडि, सुस्मिता एडि र उर्जा बुढा गरी १० जनाले नेत्र ज्योती माविबाट एसईई परीक्षा दिइ पास गरेको पुष्टि भएको छ ।
त्यस्तै नेत्रज्योति मावि हाँकुका प्रधानाध्यापक जाज्वल्यराज न्यौपानेले शिक्षक रमेश न्यौपाने चन्द्रलाल बोहोराको मिलोमतोमा यस्तो कार्य गरेको स्वीकार गरे ।
_YP5gPfksDS.jpg)
