काठमाडौं : ‘नेपाली आर्ट, कल्चर एण्ड म्युजिक अवार्ड २०२०’ हुने भएको छ । कोभिड–१९ तथा लकडाउनले गर्दा सुस्ताएको नेपाली सांगीतिक क्षेत्रलाई चलायमान बनाउन र सांगीतिक क्षेत्रमा नयाँ आयाम थप्नको लागि कला, संस्कृति र सांगीतिक क्षेत्रका व्यक्तित्वहरुलाई सम्मान गर्ने उद्देश्यले संगीतका विभिन्न विधा तर्फ ‘नेपाली आर्ट, कल्चर एण्ड म्युजिक अवार्ड २०२०’ गरिने भएको छ । ‘नेपाली आर्ट, कल्चर एण्ड म्युजिक अवार्ड २०२०’ यहि आउँदो भदौ महिनाभित्र काठमाडौंमा गरिने आयोजक कमिटीले बताएको छ ।
म्युजिक अवार्ड आवेदनको लागि दर्ता फारम खुलीसकेको छ भने भदौ १५ गतेसम्म फारम भरिने जानकारी गराइएको छ । जसका लागि २०७६ असोजदेखि २०७७ भदौसम्मका गीत संगीतहरुलाई समावेश गरिने भएको छ भने नवप्रतिभाको हकमा २०७६ भित्र गीत निकालेको हुनु पर्नेछ ।
क्रियटिभ ईन्साइट मिडियाको प्रस्तुतिमा हुन लागेको यस अवार्डलाई शुभकामना मिडिया सोलुसन प्रालिले व्यवस्थापन गर्ने भएको छ । संचारकर्मी सुर्य चन्दको अधक्ष्यतामा हुने यस अवार्ड कार्यक्रमको संयोजक तथा कार्यक्रम निर्देशक सुमन बैरागी पण्डित रहेका छन् । उत्कृष्ट नवप्रतिभा, रचनाकार, लोक तथा दोहोरी गायक–गायिका, पर्व विशेष गीत– तिज, दशैँ तिहार, होली, भजन, पप र आधुनिक गायक–गायिका, भाषा–भाषिका गीत, म्युजिक भिडियो, आर्ट तथा सांस्कृतिकलगायत विभिन्न विधामा अवार्ड प्रदान गरिनेछ ।
अवार्डमा समाजका विभिन्न प्रतिष्ठित व्यक्तिहरुलाइ सम्मान गरिने छ भने नेपाल कला क्षेत्रमा कलम चलाउने पत्रकारलाई समेत सम्मान गरिने आयोजक संस्थाले जनाएको छ । ‘नेपाली आर्ट, कल्चर एण्ड म्युजिक अवार्ड २०२०’को लागि आवेदन फारम भर्न चाहने इच्छुक गायक गायिकाले शुभकामना मिडिया सोलुसन प्रालिको कार्यालय कपुरधारा सामाखुसीमा सम्पर्क गरेर आवेदन दिन सकिने आयोजकले जनाएको छ ।
