दोहा, कतार : कतारमा अन्तर्राष्ट्रिय आप्रवासी दिवस भव्यरूपमा मनाइएको छ । नेपाल, फिलिपिन्स र भारतका आप्रवासीहरूले संयुक्त रूपमा शुक्रबार एक कार्यक्रमका बीच अन्तर्राष्ट्रिय आप्रवासी दिवस भव्य रूपमा मनाएका हुन् ।

वर्कर सपोर्ट एन्ड इन्स्योरेन्स फन्ड, माइग्रेन्ट, फोरम इन एसिया र इन्टरनेशनल अर्गनाइजेसन फर माइग्रेसनको संयुक्त आयोजनामा भएको कार्यक्रममा कतारको श्रम मन्त्रालयबाट अब्दुल्ला मोहमद, खुलुद अल कुबैशी, शालिम अल मोहनन्दीलगायतको उपस्थिति रहेको थियो ।

कार्यक्रममा नेपाली संस्कृति झल्कने भेसभूषासहित नेपाली महिला समाज कतारका बालकलाकार साथै तमु गुरुङ समाज कतारका कलाकारहरूले नृत्य प्रस्तुत गरेका थिए । भारत फिलिपिन्सका कलाकारहरूले पनि आफ्नो देशको संस्कृति झल्कने भेसभूषामा गायन तथा नृत्यहरू प्रस्तुत गरेका थिए ।

कार्यक्रममा सहभागीहरूलाई मनोरञ्जनका लागि विभिन्न खेल खेलाई विजेतालाई पुरस्कार पनि वितरण गरिएको थियो । नेपाली समुदायको तर्फबाट हमिद खान र माया केसीले सहजीकरण गरेको कार्यक्रम दोहास्थित रेडिशन ब्लु होटलको सभा हलमा सम्पन्न भएको हो ।

संयुक्त राष्ट्रसंघको आह्वानमा आप्रवासनका चुनौती र अवसरका बारेमा चेतना जगाउन र विश्वभरका आप्रवासीको योगदानलाई मान्यता दिन विश्वव्यापी रूपमा यो दिवस मनाइन्छ । दिवस डिसेम्बर १८ मा मनाइने गरिएको भए पनि प्राविधिक कारणले २०२४ को आप्रवासी दिवस हिजो मनाइएको आयोजकले जानकारी दिएका छन् ।