कोरोना महामारीले मुलुक आक्रान्त बनिरहेका बेला सत्तारुढ नेपाल कम्युनिष्ट पार्टी (नेकपा) आन्तरिक किचलोमा फस्यो । महामारी रोकथाममा खटिनुपर्ने सत्तारुढ नेकपा र नेकपा नेतृत्व सरकारको पूरा ध्यान पार्टीभित्रको किचलो मिलाउनतिर केन्द्रीत हुन पुग्यो । आन्तरिक हलमै व्यस्त हुनुले नेकपा नेतृत्व सरकारलाई जनस्वास्थ्यमाथि गम्भीर बेवास्ता गरेको आरोप लाग्यो । जनता महामारीका कारण रोग र भोक पिरोलिएका बेला जस्तो गतिविधि नेकपामा देखियो, यसले जनस्वास्थ्यमा गम्भीर लापरबाही गरेको आरोप अस्वभाविक थिएन । किनभने, विश्वकै ध्यान महामारी रोकथाममा केन्द्रीत बनेको बेला नेकपा भने कुर्सीको लडाइमा मस्त थियो ।
यतिसम्म कि प्रधानमन्त्री केपी शर्मा ओलीले नेकपाभित्रको कलहकै कारण जारी वर्षे अधिवेशन अकस्मात अन्त्य गरिदिए । जुनबेला राष्ट्रिय एकता कायम गर्न संसद जरुरी थियो, त्यही बेला ओली सरकारले अधिवेशन नै अन्त्य गरिदियो । यसले जनता प्रतिनिधिहरुले सरकारलाई सुझाव दिन, महत्वपूर्ण नीतिगत निर्णय लिन र राष्ट्रिय संकल्प कायम गर्ने अवसर गुम्यो । महामारी रोकिनुको साटो झनै फैलदै गयो । महामारी अवधिभर कहिले पनि सरकार, राजनीतिक दल र आम नागरिक बीच समन्वय हुन सकेन । तर, ढिलै भएपनि भदौ २६ गते नेकपाभित्र देखिएको संकट समाधान उन्मुख भयो, स्थायी कमिटी बैठकबाट पार्टी एकताको बाँकी काम टुंग्याउँदै चैतमा महाधिवेशन गर्ने निर्णय भयो । नेकपा स्थायी कमिटीबाट यही सरकार पाँच वर्ष रहने निर्णय हुनु राष्ट्रिय राजनीतिक जीवनका लागि महत्वपूर्ण थियो । किनभने, मुलुक रोग र भोकले आक्रान्त भइरहेका बेला सरकारको स्थायित्व जरुरी थियो । नेकपालाई जनमत पनि पाँच वर्षे स्थीर सरकारका लागि दिइएको थियो ।
तर, स्थायी कमिटी बैठकको एक महिनासम्म अहिलेसम्म सन्देश दिनेगरी कुनै गतिविधि हुन सकेको छैन । बरु, उल्टै कर्णाली प्रदेशका मुख्यमन्त्री विरुद्ध नेकपाभित्रको आन्तरिक कलहकै कारण अविश्वासको प्रस्ताव दर्ता भयो । कर्णाली प्रदेशको रोग अन्य प्रदेशमा सर्ने भय नै देखिएको थियो । कर्णाली प्रदेशको सरकार विरुद्ध परेको अविश्वासको प्रस्ताव असफल त भएको छ, तर फेरि पनि नेकपाभित्र जनचाहना अनुसार काम हुन सकेको छैन । यसले नेकपा फेरि अर्को संकटतिर धकेलिने संभावना बढेको छ, फेरि पनि जनस्वास्थ्य तर्फ भन्दा पनि नेताहरुको व्यक्तिगत स्वार्थको लडाइ हुने संकेत समेत प्रष्ट देखिएको छ ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies