भैरहवा : आकर्षक वैदेशिक रोजगारीको प्रलोभनमा कुवेत लैजान भारत पुर्याइएका ६ जना महिलालाई उद्धार गरी रूपन्देही प्रशासनले आफन्तको जिम्मा लगाएको छ । भारत हुँदै कुवेत पठाउने भन्दै लगिएका उनीहरूलाई सशस्त्र प्रहरीले भारतीय सुरक्षा बलको सहयोगमा उद्धार गरेको हो ।
दलालले उनीहरूलाई भारत लगेर अलपत्र पारेपछि उद्धार गरी ल्याइएको जिल्ला प्रशासन कार्यालय रूपन्देहीले जनाएको छ । उद्धार गरी ल्याइएकामा रूपन्देही, दाङ, चितवन र सिन्धुलीका महिला रहेको प्रमुख जिल्ला अधिकारी गणेश अर्यालले जानकारी दिए । उद्धार गरी ल्याइएकाहरूलाई आफन्तको जिम्मा लगाइएको पनि अर्यालले जानकारी दिए ।
उनले कुवेत गएर मासिक नेपाली ४५ हजार रुपैयाँ कमाइ हुने काम लगाइदिने भनेर उनीहरूलाई लामो समय काठमाडौंमा राखेको र त्यसपछि रूपन्देहीबाट पैदल हिँडाएर भारत पुर्याइएको देखिएको बताए ।
.jpg)
