आज फागु पूर्णिमा । नेपाल कला र सँस्कृतिले भरिएको देश हो । जहाँ विभिन्न चाडपर्वहरु मनाउने गरिन्छ । तीमध्ये फागु पनि एक हो । जसले नेपाली सँस्कृतिलाई झल्काउने गर्दछ । फागु पुर्णिमाको रुपमा पनि लिने गरिएको पाईन्छ । फागु हिन्दु संस्कृतिमा प्रत्येक वर्षको फागुन शुक्ल पूर्णिमा अर्थात होली पूर्णिमाको दिन मनाइन्छ । फागुन शुक्ल अष्टमीको दिन काठमाडौँको बसन्तपुर दरबार अगाडि चीर विशेषरूपले सजाएको लिङ्गो गाडेपछि होली शुरू भएको मानिने फागुपर्व पूर्णिमाको राति उक्त चीर लिङ्गोलाई ढालेर जलाएपछि समाप्त भएको ठानिन्छ ।
होलीको बारेमा पौराणिक भनाइ अनुसार प्राचीन समयमा नास्तिक हिरण्यकशिपुनामक राक्षसले भगवान विष्णुभक्त आफ्नै छोरा प्रल्हादलाई मार्न हिरण्यकशिपुले छोरालाई अग्निकुण्डमा हालेर मार्न आफ्नी बहिनी होलीका ‘जसलाई अग्निले पनि डढाउन नसक्ने वरदान पाएकी थिइन्’लाई जिम्मा दिएका थिए । दाजुको आदेशानुसार होलीका प्रल्हादलाई काखमा लिएर अग्निमा बस्ता आगोले धर्मको साथ दिएकोले होलीका जलेर नष्ट भइन् तर प्रल्हादलाई केही भएन । होलिका दहनकै खुसीयाली मनाउन एक आपसमा रङ्ग र अविर छरेर होली पर्व मनाउने परम्परा चलेको धार्मिक मान्यता रहिआएको छ । होली नेपाल, भारत तथा अन्य राष्ट्रमा रहेका हिन्दुहरूको एउटा महत्वपूर्ण चाड हो । यसै सन्दर्भमा कलाकर्मीहरुको विगतको होली अनुभव र यो सालको होली योजना के छ त मध्यान्ह दैनिकका लागि सानु श्रेष्ठले तयार पारेको सामग्रीः
रविन्द्र खड्का, अध्यक्ष नेपाल चलचित्र कलाकार संघ
‘होली’ हाम्रो सँस्कृतीसंङ जोडिएको एउटा महत्वपूर्ण परम्परा हो । पहिले, पहिले हामी होलीको दिन कहिले आउँला भनेर औंला गनि बस्दथियौं । तर, अहिले त्यो अवस्था हामीबाट टाढिएको जस्तो लाग्दैछ । समय र उमेरले त्यो उत्साह उमंगलाई कमि गराएको झै लाग्दैछ । तर एउटा ग्ल्यामर क्षेत्रको प्रतिनिधित्व गर्दैरहेको वर्तमान अवस्थामा ममा फेरि उहीँ बाल्यकाल र युवा अवस्थाको जोश, जाङ्गर पलाए झै लाग्दैछ । पोहोर ‘कोविद १९’ का कारण हामी घर भित्रै रह्यौ यसपट भने पक्कै ‘निमन्त्रणा’ आएको खण्डमा सहभागी हुनेनैछौ । हाम्रो भवन निर्माणको कार्य ब्यस्तताले गर्दा आफुले चाहेर पनि ‘होली पर्व’ को आयोजना गर्न सकेनौं देश र बिदेशमा रहनु हुने सबै चलचित्रकर्मी लगायत सबै नेपालीहरुमा होलीको शुभकामना । ‘कोभिड–१९’ निर्मूल भएको छैन । स्वास्थ्य मापदण्ड अपनाएर होलीको रमाइलो गर्नुहोला । सञ्चारकर्मी मित्र श्री सानुकाजी श्रेष्ठज्यु लगायत लोकप्रिय राष्ट्रिय दैनिक मध्यान्ह परिवारलाई धन्यवाद तथा होलीको शुभकामना ।
सन्तोष श्रेष्ठ, संगीतकार
फागु वा होली रङहरूको पर्व हो । यो नेपाली मौलिकता भित्रको एउटा सुनौलो परिचय पनि हो । रङसँगसँगै एकअर्कामा आत्मीयता साटिएको हुन्छ । भावना साटिएको हुन्छ । फागुमा रङ्गिएझैँ सबैको जीवन रङ्गीन बनोस् भन्ने कामना पनि जोडिएको हुन्छ । अघिल्लो वर्षसम्म अत्यन्तै उत्साहजनक फागु मनाइएको थियोे । गतवर्ष कोरोनाको थोरै असर देखिएकोले उत्साहजनक बन्न सकेन । यस पटक पनि अझैसम्म कोरोनाको प्रभावको कारण त्यति उत्साहजनक अवस्था छैन । कोरोनाको कारण यसवर्षको पारिवारिक फागु हुनेछ ।
सुजता के.सी., गायिका
होली भन्ने बित्तिकै रंगको चाड भन्ने बुझिन्छ । मलाई सबै भन्दा मन पर्ने चाड मध्ये एक होली पनि पर्छ । पोहोर सालतिरको होली सारै रमाईलो गरेर मानाईन्थ्यो । परिवार अनि साथी भाई जम्मा भएर रंग दलेर नाचगान गरेर बिताइन्थ्यो । तर, यस पटक भने सबैले सुरक्षित हुनु जरुरी छ । त्यसैले होलीको लागि स्पेसल त केही प्लान छैन घरैमा बसेर परिवारसँग रंग लगाएर मनाउने सोच छ । तर, मलाई यो होलीको जबरजस्ती रंग अनि पानी छ्याप्ने परीपाटी भने पटक्कै मन पर्दैन । ईच्छ्या नहुने ब्यक्तिलाई रंग दल्ने र लोला हान्ने काम गर्नु अपराध हो ।
गोपाल ढकाल, हाँस्य कलाकार
विगतमा होलीको रौनक राम्रो भयो । २०१८ मा होली इण्डियाको पुणेमा बलिउडका कलाकारहरुसंग बिताइयो । २०१९ मा नेपालमा हामि कलाकार मिलेर रमाइलो गरियो । २०२० मा खासै मनाउन पाइएन, अबको होली मज्जाले हर्ष अनि उमङ्गका साथ ‘कोभिड १९’ लाई मध्यनजर गर्दै मनाउने सोच मा छु ।
दिपक रमण, गायक संगीतकार
पोहरको होली कोरोनाले खासै केही भएन । यसपाली धमकेदारका साथ रमाइलो गरिन्छ । यो पाली आफ्नै शब्दसहित नयाँ होली गीत पनि दर्शक सामु गत साता सर्वजनीक गरें जुन होली गीतले राम्रै चर्चा पाइरहेको छ ।
सुमिना श्रेष्ठ, ट्याटु आर्टिष्ट
अरु चाडपर्व जस्तै फागु पनि महत्वपुर्ण पर्व हो । पछिल्लो समयको फागु अगि उत्छृंखल बनेजस्तो लाग्छ । काम विशेषले घर बाहिर निस्केकाहरुलाई हप्तादिन अघिदेखि नै पानी छ्याप्ने, लोला हान्ने जस्ता कार्यले समाजमा नकारात्मक सन्देश प्रवाह हुने कार्य बन्द होस् । पर्वलाई पर्वकै रुपमा एकआपसमा मिलेर मनाउने सोचमा छु ह्याप्पी होली ।
सुशिला गौतम, गायिका
मलाई बिशेष त होली नै मन पर्दैन थियो, त्यसै माथि दुई बर्ष अगाडि होलीकै दिनमा मैले मेरो बुवा गुमाएकी थिंए त्यो दिन बुवाको तिथि परेको हुन्छ, त्यसैले पनि म होलीको कुनै योजना बनाउदिन र खेल्दिन पनि ।
सहिमा श्रेष्ठ, गायिका
यस पटक त्यस्तो कुनै योजना छैन । आफ्नो नयाँ प्रोजेटको काममा नै ब्यस्त हुन्छु । समय मिल्यो भने होलीको प्रोगाम पनि गर्नु पर्ला, मिलेन भने आफ्नै कामलाई फोकस गर्छु ।
दिनेश केसी, नायक
सानोमा खुबै फागु खेलिन्थ्यो । समय बित्दै जाने क्रममा फागुको रौनकमा पनि परिवर्तन हुन थल्यो । बच्पनमा जति मज्जा फागुको लिइन्थ्यो अहिले हुन्न । तर पनि साथीभाइ मिलेर फागु मनाउनुपर्छ ।
पदम राई, गायक
गत साल मेरो गीत ‘के मिठो छ र सखर चिनी’ले अत्याधिक सफलता पाईरहेको थियो र त्यसैको प्रमोशन गर्नमा ब्यस्त रहदैगर्दा कोभिडका कारण लकडाउन शुरु भयो । होली पनि मनाउन पाइएन यस पाली खासै रमाइलो गर्ने मुड छैन हेरौं त्यस दिन के हुन्छ ।
रिया श्रेष्ठ, नायिका, मोडल
होली सबै हिन्दुले मनाउने पर्व हो । विगतमा धेरै रमाइलो गरेर मनाइन्थ्यो, यसपालि रमाइलो होला जस्तो छैन किन की कोभिडका कारण सबैको मन खिन्न होला, तर पनि सबै दुःख भुलेर स्वास्थ्यको ख्याल गर्दै मनाउने बिचारमा छु ।
श्रीदेव भट्टराई, नायक
होली भन्ने बितिकै उत्सव अनि उमंग हुन्छु । म सानै देखि होली मन पराउछु यो भन्दा अगाडि गतसालकोे होली कतारमा मानाएको थिएँ । म एक कार्यक्रमको शिलशिलामा कतार पुगेको थिए त्या हजारौ नेपालीको माझमा होली मनाएर रमाइलो गरियो । आफ्ना देशको कलाकारसंग होली मनाउँदा अति नै खुसि भैयो भन्दै साथि भाइ र दर्शकमा रौनक थियो । मलाई नि सारै खुसी लगेको थियो । यो पटक भने म आफ्नै देशमा विविध कार्यक्रमका साथ मनाउने छु । दुई ठाउँबाट कुरो आएको छ । म १३ र १४ गते गीतको शुटिङ हुने भएकोले १५ गतेको एउटा कार्यक्रममा मात्र सरिक हुन्छु होला ।
सुष्मिता श्रेष्ठ, मोडल
गत साल कोरोनाका कारण होली मनाउन पाइएन । यस पाली मज्जाले मनाउने हो । होली कै कार्यक्रमको लागि म अहिले पुर्वमा छु । झापा र इटहरीमा मेरो कार्यक्रम भएकोले यस पटकको होली यतै मनाइन्छ ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies