केही समय पहिले ‘डाँडाको बरपिपल’ बोलको गीत सार्वजनिक भएको थियो । त्यो ‘डाँडाको बरपिपल’ नामक चलचित्रको गीत हो जुन युट्युवमा हेर्न र सुन्न सकिन्छ । त्यो नै गायिका सत्यकला राईको सार्वजनिक भएको पछिल्लो गीत हो । ‘तिमी मसँग नबोल्ने अरे’, ‘इन्टरनेटैमा’, ‘ए पूर्वै धारन’, ‘बेनी मेलैमा’, ‘आलुदम चना’, ‘र्याइँर्याइँ गर्यो सारंगी’ लगायत दर्जनौं गीत चर्चामा रहे पनि ‘तिमीलाई हङकङ पुरायो आइडी कार्डैले’ बोलको गीतले गायिका सत्यकला राईलाई अत्याधिक सफलता दिलायो । एकपछि अर्को स्रोता रुचीको गीतसंगीत पस्कदै आइरहेकी गायिका केही समय संगीतको क्षेत्रबाट नै हराएको जस्तो लागेपनि अहिले केही नयाँ सांगीतिक कोशेली सार्वजनिक गर्ने तयारीमा छिन् । पुर्वको सुन्दर स्थान खोटाङ माक्पाकी स्थानीय गायिका राईको आइडी कार्डैले, बिर्सी जानेलाई, गुनासो लगायतका अडियो एल्बम सार्वजनिक भएका छन् । देश विदेशमा हुने सांगीतिक कार्यक्रमहरुमा प्रायः ब्यस्त रहने गायिका सत्यकला राई कोभिडका कारण सबैतिर सांगीतिक कार्यक्रम बन्द भैदिँदा चिन्तित छिन् । कलाकारहरुको आर्थिक स्रोतको भरपर्दो माध्यम भनेकै स्टेज प्रोग्राम भएको र त्यो नै नभएपछि कलाकारहरु समस्यामा परेको भएपनि बिस्तारै सुधार हुने र पहिलेकै अवस्थामा गीतसंगीतको क्षेत्र फर्कने आशामा रहेकी गायिका सत्यकला राईले मध्यान्ह दैनिकका लागि सानु श्रेष्ठसँग गरेको कुराकानीः
आरामै हुनुहुन्छ ?
आरामै छु ।
धेरै भयो त नयाँ कोशेली स्रोता माझ नआएको कता हराउनु भयो ?
म हराएको छुइन । स्रोतामाझ नयाँ कोशेलीहरु पनि फाटफुट आइरहेकै छन् । यो कोभिडले गर्दा यस्तै छ । अलि कमै छ । सबै भन्दा ठुलो कुरा त ज्यानै जोगाउनु पर्यो नि होइन र ?
अहिले पहिले जस्तो अडियो क्यासेटको बिक्रीबाट आर्थिक लाभ नभएर गायनबाट टाढा रहनु भएको हो कि ?
त्यस्तो होइन, म कहाँ गीतसंगीतबाट टाढा भएकी छु र ? चलचित्रहरुको गीतहरु गाइरहेकै छु । र, आउँदै पनि छ । देश, बिदेश घुमिरहेकै छु । विभिन्न अवार्ड पनि पाइरहेको छु ।
सुन्ने भन्दा पनि हेर्ने गीतको प्रचलनलाई कसरी लिनु भएको छ ?
अब यो समयको माग होला । अहिलेका गीतहरु प्रायः हेर्ने खाल कै बनेका हुन्छन् । साथै यो प्रविधिको विकासले गर्दा पनि होला ।
अहिलेको पुस्ताले नेपाली गीतसंगीतलाई चासो नदिनुको कारण के होला ?
अहिलेको पुस्ताले नेपाली गीतसंगीतलाई चासो नदिनुको कारण पनि यही प्रविधिको विकासले नै हो । अब पहिले पहिले मिडिया कम थिए । जहाँ हाम्रो नेपाली गीतसंगीत मात्र बज्थे । तर अहिले प्रत्येक ब्यक्तिको हातमा मिडिया छ । देश विदेशका गीतसंगीत सुन्न, हेर्न पाइने उनीहरुसँग विकल्प छ । त्यसैले उनीहरुको चासो पनि बाँडिएर आफ्नो देशको गीतसंगीतमा चासो कम हुन गएको जस्तो लाग्छ ।
आफ्नै स्वरबद्ध गीत मध्य कुनले मनमा सन्तुष्टि दिलायो ?
मैले आफुले गाएका गीतहरु सबै राम्रा लाग्छन् । तर गाएर सन्तुष्टि भने थोरैमा मिलेको छ र आफुले पूर्णरुपले गाएँ भनेर सन्तुष्ट भने हत्तपत्त भएकी छैन ।
स्रोता, दर्शकहरुको लागि नयाँ केही ल्याउँदै हुनुहुन्छ कि ?
स्रोता दर्शक माझ ‘काँडेतार’नामक देशभक्तिपूर्ण चलचित्रमा मेरो स्वर आउँदैछ । त्यसमा शीर्ष गीत र रोमान्टिक गीत छन् । दुबै गाएकी छु । आशा छ यी गीतहरुलाई जुन देशप्रेम र देशलाई जोगाउन पर्छ भन्ने भावले ओतप्रोत छन् । प्रत्येक देशभक्त नेपालीहरुले मन पराइदिनु हुने छ भन्ने आशा लिएकी छु ।
व्यापारमा पनि आवद्ध हुनुहुन्छ, गीतसंगीतलाई कसरी अघि बढाउँदै हुनुहुन्छ ?
गीतसंगीतको मात्र भर हुँदैन । त्यसैले व्यापारमा पनि आवद्ध छु । तर, बढी गीतसंगीत तिरै लाग्ने कोसिसमा छु ।
कुनै समयको बहुचर्चित गायिका अब त्यो स्थान हासिल गर्न प्रयासरत हुनुहुन्छ कि ?
मलाई लाग्छ दुई चार वर्ष, महिना गीत हिट भएन भन्दैमा स्रष्टाको चर्चा नाम हराउँदैन जस्तो लाग्छ । किन भने एकपटक दर्शक, स्रोताहरुको मनमटुमा बसेपछि सधैं सम्झिरहनु हुन्छ भन्ने लाग्छ मलाई । गीतसंगीत त आइनै रहेका छन् र ल्याइ नै रहने छु ।
कोभिड कहरले गीतसंगीतको क्षेत्रमा कस्तो प्रभाव पार्यो जस्तो लाग्छ ?
कोभिड कहरले गीतसंगीतको क्षेत्रमा ठुलो प्रभाव परेको छ किन भने गीतसंगीतबाट जुन कलाकारहरुलाई आर्थिक रुपले सहयोग पुगिरहेको थियो त्यो हुन सकिरहेको छैन । देश विदेशमा हुने सबै कार्यक्रमहरु बन्द भएका छन् । यसले हामी गायक कलाकारहरुको रोजिरोटीमा ठुलो प्रभाव पारेको छ ।
नायक, निर्माताको परिवारमा हुनुहुन्छ चलचित्रमा काम गर्ने कुनै चाहना छैन ?
चलचित्रमा नायक, निर्माताज्यूसँगै सधैं हुन्छु । पर्दामा नआएको मात्र हुँ । पर्दा बाहिरबाट त उहाँलाई साथ सहयोग दिइरहेकै हुन्छु । उहाँसँगको सहकार्य निरन्तर चलिनै रहन्छ ।
रोयल्टी लगायतका कुरा उठिरहँदा सर्जकले आफ्नो सिर्जनाको मुल्य पाउँदैनन् भन्ने गुनासो प्रति तपाईंको धारण के छ ?
यहाँ यस्तै छ जे कुरा पनि सजिलै पाउन सकिन्न । त्यसको लागि संघर्ष गर्नै पर्ने हुन्छ । रोयल्टी पाउनका लागि सबै कलाकारहरु संघर्षरत छांै । कतिपय कुराहरु सर्जकहरुलाई कम्पनीहरुले खुलेर नगरेको कारण आपसमा मनमुटाव छ ।
अन्त्यमा....?
लोकप्रिय राष्ट्रिय दैनिक मध्यान्हमार्फत मेरा कुराहरु स्रोता, दर्शक माझ पुुर्याउने मौका दिनु भएकोमा तपाईं लगायत मध्यान्ह टिमलाई धेरै धेरै धन्यवाद ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies