काठमाडौं : समाजवादी मोर्चा नेपालले कांग्रेस र एमालेको नयाँ सत्ता समीकरण देशको प्रगतिशील यात्राकाे बाधककाे रूपमा रहेको ठहर गरेको छ ।
माओवादी केन्द्र सत्ताबाट बाहिरिएपछि उसकै अग्रसरतामा नेकपा एकीकृत समाजवादीकाे केन्द्रीय कार्यालय आलाेकनगरमा आज बसेको बैठकले पछिल्लो राजनीतिक घटनाक्रमले देशलाई पश्चगमनमा धकेलेको भन्दै चिन्ता प्रकट गरेको नेकपाका नेता खड्गबहादुर विश्वकर्माले जानकारी दिए ।
‘बैठकमा राष्ट्रिय राजनीतिमा भर्खरै घटेको राजनीतिक घटनाबारे छलफल भएको छ । यो घटनाको हामीले गम्भीर छलफल गरेका छौं,’ मंगलबार बसेको बैठकपछि पत्रकारहरूसँग विश्वकर्माले भने, ‘नेपालको राष्ट्रिय राजनीतिका एउटा नयाँ घटना भएको छ । योलगायत देशको समग्र स्थितिको बारेमा र समाजवादी मोर्चाको विगतको काम कारबाहीको बारेमा गम्भीर समीक्षा भएको छ । यो घटनाले के देखाउँछ भने– प्रगतिशील यात्रातिर अगाडि बढिरहेको देशलाई यथास्थिति, पश्चगमन र विगतका आन्दोलन र उपलब्धीहरुलाई थ्रेट गर्नेतिर यसले उद्यत गर्न खोजेको देखिन्छ । यो घटनापछि यथास्थिति र पश्चगमनमा लाने चिन्ता थपिएको बारे हामीले गम्भीर चिन्ता प्रकट गरेका छौं ।’
बैठकले देशको पछिल्लो राजनीतिक स्थितिको विश्लेषण गर्न कार्यदल गठन गरेको छ । कार्यदलमा खड्गबहादुर विश्वकर्मा, देव गुरुङ, प्रमेश हमाल र गंगा नारायण श्रेष्ठ छन् । कार्यदललाई १५ दिनभित्र प्रतिवेदन बुझाउन समय दिइएको छ ।
बैठकले महेन्द्र राय यादव, गंगानारायण श्रेष्ठको नेतृत्वमा रहेको नेपाल समाजवादी पार्टीलाई समाजवादी मोर्चामा समावेश गरिएको छ । अरु सबै प्रगतिशील र कम्युनिष्ट घटकहरुसँग छलफल चलाउने, मोहन विक्रम र उपेन्द्र यादवले नेतृत्व गरेको पार्टीलाई मोर्चामा ल्याउन पहल गरिने निर्णय पनि गरेको छ ।
बैठकमा माओवादी केन्द्रका अध्यक्ष तथा निवर्तमान प्रधानमन्त्री पुष्पकमल दाहाल प्रचण्ड, नेकपाका महासचिव नेत्रविक्रम चन्द ‘विप्लव’, प्रवक्ता खड्गबहादुर विश्वकर्मा ‘प्रकाण्ड’, नेपाल समाजवादी पार्टीका अध्यक्ष महिन्द्र राय यादव र सह–अध्यक्ष गंगानारायण श्रेष्ठ, नेकपा एकीकृत समाजवादीका अध्यक्ष माधवकुमार नेपाल, महासचिव घनश्याम भुसाल, प्रमेश हमाल र जीवनराम श्रेष्ठलगायत सहभागी थिए ।
