काठमाडौं : वैदेशिक रोजगार विभागले जापान इन्टरनेशनल ट्रेनिङ को–अपरेसन अर्गनाइजेसन (जिट्को) अन्तर्गत सूचीकृत म्यानपावर कम्पनीहरुलाई साउन मसान्तसम्म अनुमतिपत्र (लाइसेन्स) नवीकरण गर्न भनेको छ । विभागले आइतबार एक सूचना जारी गर्दै साउन महिनाभित्र तोकिएका कागजात र दस्तुरसहित नवीकरणका लागि निवेदन दिनुपर्ने बताएको छ ।

यसअघि विभागले माघ र साउन महिनामा गरी वर्षको दुई पटक जिट्को लाइसेन्स नवीकरण गर्न सूचना प्रकाशन गर्ने गरेको थियो । एक आर्थिक वर्षभित्र दुई पटक इजाजत नवीकरण गर्ने कार्यले अन्योल र कतिपय अवस्थामा दोहोरो परेकाले जिट्कोमा सूचीकृत सबैले साउन मसान्तभित्र नवीकरण गर्नुपर्ने विभागले जनाएको छ ।

नवीकरणका लागि वैदेशिक रोजगार ऐन तथा नियमावलीका अतिरिक्त नेपाली प्राविधिक प्रशिक्षार्थी जापान पठाउनेसम्बन्धी निर्देशिका २०६६ बमोजिम निवेदनसहित नवीकरण दस्तुरबापत १० हजार रुपैयाँ बुझाएको सक्कलै रसिदसहित निवेदन दिनुपर्ने विभागले उल्लेख गरेको छ ।

विभागले निवेदनका साथमा अघिल्लो नवीकरण मिति खुलेको प्रमाणपत्रको प्रतिलिपि, जिट्कोमार्फत गत आर्थिक वर्ष २०८०/८१ मा कामदार पठाएको विवरण, कम्पनी रजिस्ट्रारको कार्यालयमा अघिल्लो आर्थिक वर्ष २०७९/८० को अध्यावधिक भएको कागजात, आर्थिक वर्ष २०७९/०८० को कर चुक्ता प्रमाणपत्र तथा इजाजतपत्रको प्रतिलिपि पेस गर्नुपर्ने बताएको छ ।

जिट्को लाइसेन्स प्राप्त भए पनि संस्थागतरुपमा जापानमा प्रशिक्षार्थी कामदार पठाउन सक्ने अवस्था नभएपछि सूचीकरण भइ नवीकरण नगराउने म्यानपावर कम्पनीको संख्या पछिल्ला वर्षहरूमा बढेको छ । शुरूमा २ सय ५० भन्दा बढी म्यानपावर कम्पनी जिट्कोमा सूचीकृत भए पनि धेरैले नवीकरण गराएका छैनन् । जिट्कोले नेपालसहित भारत, चीन, पाकिस्तान, श्रीलंका, फिलिपिन्स, म्यानमार, भियतनामलगायत १६ मुलुकबाट प्रशिक्षार्थी कामदार लैजाने गरेको छ ।