काठमाडौं : नेपालमा सामान आयत गर्ने मुख्य नाका तातोपानी र रसुवागढी ढप्प भएका छन् । बाढी पहिरोका कारण चार दिनदेखि तातोपानी नाका पूर्ण रूपमा बन्द भएको छ भने रसुवागढी नाकामा डेढ महिनादेखि सामान रोकिएको हो ।  

तातोपानी नाकाको खासा (चिनियाँ) खण्डमा करिब १५ सय कन्टेनर रोकिएका छन् । यसअघिको अवरोधपछि तीन दिन बाटो खुल्दा ६३ वटा कन्टेनर मात्र नेपाल भित्रिएको बताइएको छ । सिन्धुपाल्चोकको भोटेकोशी गाउँपालिका–२ स्थित इकोमा (साउन १८ गते) खसेको पहिरोले करिब २ सय ५० मिटर सडक प्रभावित भएको थियो । यसैकारण पूर्ण रूपमा अवरुद्ध भएको यो सडक मर्मतपछि भदौ ५ गते सञ्चालनमा आए पनि भदौ ८ गतेदेखि पुनः अवरुद्ध भएको हो । 

‘अहिले कोदारीमा पानी परेपछि सडक बगेको बग्यै गर्छ । दुई–तीन दिन बाटो खोल्ने अवस्था छैन,’ नेपाल हिमालय सीमापार वाणिज्य संघका अध्यक्ष रामहरि कार्कीले भने । उनका अनुसार कोदारी क्षेत्रमा पहिरोका कारण सडकको झन्डै ५ सय मिटर खण्ड प्रत्यक्ष प्रभावित भएको छ, जसमा २ सय ५० मिटर भाग पूरै बगेको छ । दसैं, तिहार र छठका लागि आयात गरिएका लत्ताकपडा, फलफूल, लसुन–प्याजलगायत दैनिक उपभोग्य वस्तु तथा चाडपर्वमा अत्यधिक खपत हुने सामान अलपत्र परेका छन् । लामो समयदेखि अवरोध सडक खुलाउन सडक विभागका कर्मचारीसँगै व्यवसायी पनि खटिएका छन् ।  

देशभरका ७७ वटै जिल्लामा सामान पुर्‍याउनुपर्ने नाका लामो समयसम्म बन्द हुँदा मुलुकलाई नै ठुलो आर्थिक क्षति हुने भएकाले राज्यले यस विषयमा चाँडो पहल गर्नुपर्नेमा व्यवसायीले जोड दिएका छन् । त्यस्तै, रसुवागढी नाकाअन्तर्गत केरुङमा डेढ महिनादेखि करिब ५ सयवटा कन्टेनर रोकिएका छन् । २४ असारमा लेन्दे खोलामा आएको बाढीले रसुवागढी–चीन जोड्ने मितेरी पुल बगाएपछि यो नाका पूर्ण रूपमा अवरुद्ध छ । त्यसअघि चीनतर्फबाट सामान लोड भएर केरुङ आइपुगेका कन्टेनर रोकिएका हुन् । रसुवागढी नाका खुलाउन अहिले मितेरी पुल भएको स्थानमा चीनले बेलिब्रिज जडान गर्ने तयारी गरेको बताइएको छ ।