जनकपुरधाम : प्रमुख प्रतिपक्षी दलहरुले अर्थमन्त्री जितेन्द्र यादवको राजीनामा माग गर्दै मधेश प्रदेश सभाको बैठक फेरि अवरुद्ध गरेका छन् ।
शुक्रबारको बैठक प्रारम्भसँगै प्रतिपक्षी जसपा, नेकपा माओवादी केन्द्र, नेकपा एकीकृत समाजवादी, नेपाल संघीय समाजवादी र राप्रपाले अर्थमन्त्रीको राजीनामालाई ‘बटमलाइन’ बनाएर सदन सञ्चालन हुन नदिएका हुन् । त्यसपछि सभामुख रामचन्द्र मण्डलले अर्को सूचना नआएसम्मका लागि बैठक स्थगित गरेका छन् ।
प्रतिपक्षी दलहरुले सरकारले अवैधानिक ढंगले बजेट पारित गरेको र अर्थमन्त्री यादवले गैरसंसदीय व्यवहार प्रदर्शन गरेको आरोप लगाएका छन् । उनीहरूले अर्थमन्त्रीले राजीनामा नदिए सदन चल्न नदिने चेतावनी दिएका छन् ।
बैठकमा नेकपा एकीकृत समाजवादीका प्रमुख सचेतक कनिष पटेलले आर्थिक वर्ष २०८२/८३ को बजेट त्रुटिपूर्ण भएको दाबी गर्दै अर्थमन्त्रीले राजीनामा दिनुपर्ने बताए । यद्यपि नेपाली कांग्रेसका सांसदहरुले प्रतिवाद गरेका थिए, तर प्रतिपक्षी दलहरुको अडान यथावत रहेपछि बैठक स्थगित गरिएको हो ।
सरकारले संसदमा सुरुवाती रूपमा ४६१ पृष्ठको बजेट प्रस्तुत गरेर पछि २६१ पृष्ठ थप गरेको भन्दै प्रतिपक्षी दलले प्रश्न उठाएका छन् ।
