काठमाडौं : आधुनिक थोक कृषि बजार सम्बन्धी कार्यशाला सम्पन्न भएको छ । सार्वजनिक निजी साझेदारीमा, आधुनिक (अन्तराष्ट्रिय स्तरको) थोक कृषि बजार स्थापना र सञ्चालनको औचित्य, आवश्यकता र लगानी प्रवर्धनको लागि कृषि तथा पशुपन्छी विकास मन्त्रालयको सहकार्य, नेपाल उद्योग वाणिज्य महासंघको सहआयोजना र डिएफसिडी÷एसएनभी परियोजनाको सहयोगमा मुक्तिनाथ कृषि कम्पनी लिमिटेडले काठमाडौंको लाजिम्पाटमा शुक्रबार कार्यशाला सम्पन्न गरेको हो ।
कार्यशालामा मुक्तिनाथ कृषि कम्पनीका प्रबन्ध संचालक भरतराज ढकालले किसानहरूले गरेको उत्पादनको बाइव्याक ग्यारेन्टी गरी उत्पादनमा प्रोत्साहन गर्न अन्तर्राष्ट्रिय स्तरको थोक बजार आवश्यक रहेकोले कार्यक्रमको आयोजना गरिएको बताए । कार्यक्रममा राष्ट्रिय तथा अन्तर्राष्ट्रिय अवस्थाः चुनौती र अवसरहरू सम्बन्धमा विज्ञ प्रस्तुतीकरण र आधुनिक थोक कृषि बजार स्थापना लगायतका विषयमा छलफल भएको थियो ।
प्रमुख अतिथि तथा कृषि तथा पशुपन्छी विकास मन्त्री रामनाथ अधिकारीले साना किसानहरूको जीवनस्तर उकास्न र ठूला किसानलाई सेवा दिने दिशामा निजी क्षेत्र लाग्नुपर्ने बताएका थिए । त्यस्तै, मन्त्रालयका सचिव डा. गोविन्दप्रसाद शर्माले कृषि विधेयक मन्त्रिपरिषद्मा लैजाने अन्तिम तयारीमा रहेको र ऐन कार्यान्वयन भएपश्चात उत्पादन, प्रशोधन र बजार व्यवस्थापन सम्बन्धी धेरै समस्या समाधान हुने बताए ।
नेपाल उद्योग वाणिज्य महासंघमा उपाध्यक्ष हेमराज ढकालले निजीी क्षेत्रका समस्या समाधानको लागि महासंघले विभिन्न पहल गरिरहेको र बजार व्यवस्थापनको लागि करार खेती ऐन निर्माण गर्नुपर्ने भनाइ राखेका थिए ।
