– निरू गौतम, मोरङ
१
बुहारी पाएर खुसी भएकी सासु आजसम्म देखेको छैन
सासु पाएर कुनै बुहारी खुसी भएको मैले भेटेको छैन ।
छोरा छोरी समान हुन् हजुर चित्त के कुरामा दुखाउनु
छोरा नहुनेलेलाई वैतरणी तर्न कसैले छेकेको छैन ।।
२
स्वार्थी छ दुनियाँ आफ्नै हितको कुरा गर्छ
सय चोटी हारोस् एउटै जीतको कुरा गर्छ ।
पैसा र प्रतिष्ठाको मातले उन्मत्त साँढे बनी
मानवमा हुने विभेदलाई रितको कुरा गर्छ ।।
३
गार्हो नै हुन्छ अर्काको घर पोत्न हजुर
झन गाह्रो साहुको खेतबारी जोत्न हजुर ।
अरुको दयामा बाँचेर एकपटक हेरिदेऊ
कति गाह्रो हुन्छ चुहिने छानो ओत्न हजुर ।।
४
जिन्दगीमा कहिले खुशी पनि आउँदो रैछ
मरुभूमि चाहानामा वसन्त नि छाउँदो रैछ ।
कर्मलाई कर्तव्य ठानेर निरन्तर डटिरहे
सम्झौताले एकदिन नयाँ ऊर्जा पाउँदो रैछ ।।
५
पैसामा बिक्यो ममता पैसैमा साटियो मायाँ पनि
पैसैले पायो प्रतिष्ठा पैसैलाई शितल छायाँ पनि ।
कस्तो चिज बनायौ दैव ! पैसामा सबथोक पाइने
पैसाले नै दिलायो साथ दायाँ अनि बायाँ पनि ।।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies