– तसलीमा नसरिन
अन्य पाकिस्तानी केटी जस्तै मलाला युसुफजाईले पनि २४ वर्षको उमेरमा बिहे गरिन् । त्यसैले अब अन्य आम श्रीमतीजस्तै उनी पनि श्रीमान् र छोराछोरीको हेरचाहमा व्यस्त हुनेछिन् । मलालाका श्रीमान पाकिस्तानी हुन् । पाकिस्तानका पुरुषहरू पुरुषतान्त्रिक माहोलमा हुर्के बढेका हुन्छन् । उनका श्रीमानले पनि उनलाई आन्दोलित भईरहन सायदै सहयोग गर्नेछन् ।
मलाला कुनै साधारण केटी होइनन्, उनी दुनियाका करोडौं केटीहरुका लागि ‘आइकन’ जस्तै हुन् । विश्वमा लगभग १३ करोड यस्ता केटीहरु छन् जो पढ्न र लेख्नको अवसरबाट निकै टाढा छन् । ती करोडौं केटीहरूको लागि शिक्षाको व्यवस्था गर्नु ठूलो काम हो । सामान्यतया, सम्पूर्ण जीवन खर्चिएपछिे मात्रै नोबेल शान्ति पुरस्कार केहीले प्राप्त गर्न सक्छन् । तर मलाला तालिबानको गोलीबाटै चर्चित बनेकी थिइन् । मलाला युसुफजाईले ठूलो काम गर्नु अघि नै जीवनको सुरुमै नोबेल शान्ति पुरस्कार पाएकी थिइन्। यस्तो अवस्थामा मलाला आम केटीहरूको लागि शान्ति र शिक्षा स्थापना गर्ने अभियानमा जीवनभर लाग्नु उपयुक्त थियो । मलालाले शिक्षा हासिल गर्न पाएको अवसर विश्वका अधिकांश केटीले पाउँदैनन् । यस्तो अवस्थामा मलालाले पाएको अवसरको सदुपयोग गर्नु उपयुक्त हुन्थ्यो । अहिले प्रश्न उठेको छ, के अब विश्वभरका केटीहरूले मलाला युसुफजाईबाट साँच्चै केही सिक्ने अवसर पाउँछन् त ?
पिछडिएको समाजमा बालिकाको विवाह सानै उमेरमा गरिन्छ र विवाहपछि उनीहरु श्रीमान र घरमै सीमित हुन्छन् । मलालाले आफ्नो उदाहरणले यो सामाजिक व्यवस्था परिवर्तन गर्न सक्थिन् । तर उनको बिहे र घरजम गर्ने निर्णयबाट त्यस्तो लाग्दैन । मलालाले आफू विवाह प्रणालीमा विश्वास नगर्ने र मानिसहरूले किन बिहे गर्छन् भन्ने कुरा पनि नबुझ्ने बताएकी थिइन् । यो भनेको तीन महिनामै मलालाले आफैंले विवाह गरिन् । त्यसोभए, मलालाको शब्दमा कत्तिको विश्वास गर्न सकिन्छ त ? मलालाको विवाहले महिला शिक्षाको क्षेत्रमा ठूलो आन्दोलन गर्ने अपेक्षा गर्नेहरूलाई निराश तुल्याएको हुनुपर्छ।
यद्यपि कतिपयले विवाह मलालाको व्यक्तिगत मामिला भएको भन्दै यसमा आपत्ति जनाउने अधिकार कसैलाई नहुने पनि बताएका छन् । मलालाको विवाह जबरजस्ती गरिएको पनि होइन । मलालाले आफ्नो पतिको रूपमा रोजेको मान्छे असल मान्छे हो, होइन भन्ने निष्कर्षमा अरु पुग्न आवश्यक पनि छैन् । मलालाको व्यक्तिगत जीवनमा टिप्पणी गर्न आवश्यक पनि छैन् । विवाह गरिसकेपछि पनि मलालाले महिला शिक्षाको क्षेत्रमा काम गरिरहेर आफ्ना आलोचकहरूलाई अस्वीकार गर्न सक्छिन् । मलालाले नारी शिक्षाका लागि आन्दोलित भए पनि जीवनमा प्रेम र विवाहजस्ता सम्बन्धलाई त्यागेर सन्यासीको जीवन जिउनुपर्छ भन्ने होइन । बरु श्रीमानको साथ पाए भने मलालाले आफ्नो जीवनमा ठूलो काम गर्न सक्छिन्, ठूलो उपलब्धि हासिल गर्न सक्छिन् ।
मलाला युसुफजाई भविष्यमा पाकिस्तानको प्रधानमन्त्री बन्न चाहन्छिन् भन्ने विश्वास गर्नेहरू पनि छन् । यसका लागि जति गुणहरू चाहिन्छ, मलालाले ती सबै दिईरहेकी छिन् । उदाहरणका लागि, उनी सधैं सामान्य मानिसहरूको अगाडि आफ्नो टाउको छोप्छिन्। उनी आफ्नो हरेक भाषण अल्लाहको नामबाट सुरु गर्छिन् । त्यही भएर उनले पाकिस्तानीसँग बिहे गरेका हुन् । यसैको परिणाम पाकिस्तानका परम्परावादीहरूले मलालालाई माया गर्न थालेका छन् ।
मलालाका बुबा आफैं पनि उनलाई पाकिस्तानको प्रधानमन्त्रीको रूपमा हेर्न चाहन्छन् । पाकिस्तानीहरूको जीवनमा क्रिकेटको ठूलो महत्व भएकोले मलालाले जानाजानी क्रिकेटसँग सम्बन्ध राख्ने व्यक्तिलाई आफ्नो पतिको रूपमा रोजेकी छिन् । यति मात्र होइन, मलालाले भर्खरै भएको टी–२० विश्वकपमा पाकिस्तानले भारतमाथि जित हासिल गरेकोमा पतिसँग केक पनि काटिन् ।
याद राख्नु पर्ने अर्को कुरा के छ भने विश्वभर अन्यायको आवाज उठाउँदै आएकी मलालाले कश्मीरी पण्डितहरूको विस्थापनबारे कहिल्यै केही बोलिनन् । वास्तविकता यो हो कि मलाला एक परम्परावादी महिला हुन् जसलाई पश्चिमाहरूले प्रसिद्ध बनाएका छन् । त्यसैले धर्म र परम्परामा बाँधिएकी महिलाबाट योभन्दा बढी आशा गर्नु हुँदैन । टाउको पल्लु नहटाउने बेनजिर भुट्टो पनि अन्ततः कट्टरपन्थीको गोलीको सिकार भइन् भन्ने कुरा पनि बिर्सनु हुँदैन । यस्तो अवस्थामा मलाला प्रधानमन्त्री बनिन् भने उनी फेरि तालिवानको निशानामा आउन सक्छिन् ।
जहाँसम्म मेरो चिन्ता छ, सत्य यो हो कि मलाला युसुफजाईले यति कम उमेरमा विवाह गर्ने निर्णय गर्छिन् भन्ने मैले कहिल्यै सोचेको थिइन । मलालाले अक्सफोर्डबाट स्नातक गरेकी छिन् । कतिपयले भने उनले थप अध्ययन गर्ने बताएका छन् । तर, विवाहपछि मलालाको पढाइ अघि बढ्न नसके मलाई अचम्म लाग्दैन । मलालाले भविष्यमा बुर्का लगाएर हिँड्न थालिन भने पनि मलाई अच्चम लाग्दैन् । अमर उज्यालाबाट
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies