सत्ता साझेदार दलका नेताहरुले आफू निकट कानून व्यवसायीहरुसँग आइतबार स्थानीय चुनावबारे छलफल गरेका छन् । आफैले छनोट गरेका कानून व्यवसायीहरुले संविधानअनुसार स्थानीय चुनाव सम्बन्धी ऐन संशोधनको सुझाव दिएको छ । यस्तो सुझाव अपेक्षित नै थियो । किनकि कानून सचिव, प्रधानमन्त्रीका कानूनी सल्लाहकार र सत्तारुढ दल निकट कानून व्यावसायीले सरकारकै चाहनाअनुसार सुझाव दिने नै भए । नभन्दै वैशाखमा स्थानीय चुनाव नगर्नेगरी सरकारलाई सुझाव दिइएको छ । सरकारका प्रवक्ता ज्ञानेन्द्रबहादुर कार्कीको भनाइ पुष्टि गर्दै वरिष्ठ अधिवक्ता रमण श्रेष्ठले संविधान अनुसार कानून संशोधनको सुझाव दिइएको बताए । श्रेष्ठ पुष्पकमल दाहाल प्रचण्ड प्रधानमन्त्री हुँदा महान्यायाधिवक्ता थिए । त्यसैले प्रचण्डको अपेक्षा बमोजिम सुझाव दिएका थिए ।
छलफलमा सहभागी स्रोतका अनुसार, प्रधानमन्त्री शेरबहादुर देउवाले वैशाखमा चुनाव नहुँदा आइपर्ने समस्याबारे सुझाव मागेका थिए । छलफलको थालनि नै चुनाव नहुनेबाट शुरू भएपछि सुझाव फरक आउने अपेक्षा नै भएन । बरु सत्ता साझेदार दल र कानून व्यावसायीहरुबीच कानूनका छिद्रको खोज्ने प्रयत्न गरियो । स्थानीय निर्वाचन सम्बन्धी ऐनले स्थानीय चुनाव भएको सात दिनभित्र नयाँ नेतृत्वले शपथ लिनुपर्ने व्यवस्था गरेको छ । तर २०७४ मा स्थानीय चुनाव तीन तहमा भएको थियो । वैशाख ३१, असार १४ र असोज २ मा गरी झण्डै ६ महिनाको फरकमा चुनाव भएको थियो । पहिलो चरणको चुनावलाई आधार मान्दा आउने जेठ ६ गतेभित्र शपथ लिनेगरी नयाँ जनप्रतिनिधि आइसक्नुपर्नेछ ।
तर संविधानले भने कार्यकाल सकिएको ६ महिनाभित्र चुनाव गराउनुपर्ने व्यवस्था गरेको छ । त्यसैलाई आधार मानेर सत्तारुढ दल निकट कानून व्यवसायीहरुले ऐन संशोधनको सुझाव दिएका छन् । यो सुझावलाई आधार मान्दा आउने वैशाखमा स्थानीय चुनाव हुनेछैन । तर राजनीतिक प्रश्न भने उठिरहनेछ भने संविधानप्रति विपक्षी नेकपा एमालेले प्रश्न उठाउनेछ । आइतबार बक्तव्य जारी गरेरै एमालेले वैशाखमा चुनाव गराउनुपर्ने माग गरेका छन् । विपक्षी एमालेको माग मात्रै नभएर पाँच वर्षे स्थानीय सरकारको कार्यकाल वैशाखमा सकिने प्रष्ट हो । यसको अर्थ गठबन्धन दलहरु पनि संविधानको अपव्याख्या गर्नेतिर लागेका छन् । एमालेले प्रतिनिधिसभा विघटन गरेर संविधानमाथि धावा बोलेको बताइरहेको गठबन्धन फेरि त्यही बाटोमा हिडेको सन्देश पनि दिने प्रयास गरिएको छ ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies