–अम्बिका धिताल, काभ्रेपलाञ्चोक
“आज पनि मदनको घरमा झगडा परेछ । बुढीचाहिँ रुँदै घरबाट निस्किएर गई रे ।” सुमनले बुढीलाई सुनाए ।
“किन सधैँ कलह मात्र हुन्छ तिनीहरुको घरमा ? त्यति कलिला बालबच्चा छन् ? बुढी नभएपछि घरको सारा काम मदनले कसरी भ्याउँछन् ? कता गइन् होली बुढी ? दुःख, पीडा र मनमा चोट नपरी त कसैले घर छोडेर हिँड्दैन त के भएछ ?” रुपाले जिज्ञासा राखिन् । सुमनले भने, “दुबै आगो आगो भएर हो, एउटा आगो अर्को पानी भएको भए किन यो अवस्था आउँथ्यो र !”
कुरा गर्दागर्दै मदन टुप्लुक्क आइपुगे र निन्याउरो मुद्रामा भने, “दाइ घरमा ठाकठुक भयो, बुढी घरमा छैन । सबैले हजुरको परिवारको चर्चा गर्छन् । कति मिलेका बुढाबुढी भन्छन् । कतिखुसी हुनुहुन्छ तपाईहरू दुबैजना ? केहो त्यसको रहस्य ? मेरो त भाग्य नै खोटो हो कि, बुढीलाई कहिल्यै खुसी राख्न सकिएन । आज म तपार्इँहरूबाट त्यो कुरा सिक्न आएको, जुन कुराले हाम्रो परिवार पनि तपाईंको जस्तै हाँसीखुसी रहन सकोस् ।”
मदनको कुरा सुनेर सुमनले भने, “चिन्ता नगर भाइ सब ठिक हुन्छ । भन् आज घरमा खाना कसले बनायो ?”
“कहाँ खाना बनाउनु दाइ त्यही निहुँमा झगडा भयो । म बजार गएर आउँदा बुढी घाँस काटेर आइपुगेकी रहिनछे । मैंले किन भात पकाउन ढिला गरको केटाकेटी भोकाइसके, आफूलाई पनि भोक लागिसक्यो भनेको जवाफ फर्काइहाली । अनि मैले !”
“हो यही नै तेरो ठुलो कमजोरी भयो भाइ ।”
“कसरी कमजोरी हुन्छ ? समयमा खाना नपकाउनु उसकै कमजोरी हो नि ।” मदन भन्दै थिए ।
“हेर् मदन, उसको कुनै कमजोरी छैन । के उसले तैँले जसरी बजारमा गएर नानाथरी गफ ठोक्दै चियाको चुस्की लगाएकी छ र ? बिहान चार बजेदेखि उठेर घरको लिपनपोतन, गाईभैँसी कुँडोपानी सारा काम गरेर घाँस काट्न जाँदा तँ चाहिँ ओछ्यानमा नै चिया पिएर बुढीले ठिक्क पारेको दुधको क्यान झुन्ड्याउँदै बजार गएको तीन घन्टा पछि भात पाकेन भन्दै आउँछस् । बुढीको ठाउँमा आफू बसेर हेर् त कति गाह्रो छ उसलाई ।”
मदनले भन्छन् “अँ...तर त्यो त महिलाले गर्ने काम हो नि ।”
सुमन केही झोँक्किएर बोले, “त्यही साघुँरो सोचले त घरमा किचलो हुन्छ । कहाँ लेखिएको छ, महिलाले मात्र गर्ने भनेर ? त्यस्तो सोच लिने हो भने तँ खुसी हुन सक्दैनस् । हामी त सँगै उठ्छौँ, मिलेर काम गर्छौँ, दुबैको सल्लाह र सहमतिमा निर्णय गर्छौँ, त्यसैले हामी खुसी र सुखी छौँ । अब जे गर्छस् तेरै इच्छा भाइ ।”
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies