​रौतहटः रौतहटको कटहरिया नगरपालिका–९ स्थित ज्योति डिष्टिलरीमा बोइलर मेसिन विष्फोट हुँदा एक जनाको मृत्यु भएको छ भने छ जना घाइते भएका छन् ।

मृत्यु हुनेमा सोही नगरपालिका वडा नम्बर-८ बलुवा गाउँ निवासी ४५ वर्षीय लक्ष्मण राय यादव रहेका छन् । घाइते हुनेमा बलुवा गाउँकै ४५ वर्षीय रहमोद आलम, ३५ वर्षीय प्रमजित यादव, ५५ वर्षीय विगन यादव, ४० वर्षीय कैलाश माली, ५१ वर्षीय विगन यादव र गरुडा नगरपालिका–५ महमदपुरका ४० वर्षीय मुकेश यादव रहेका छन् ।

घाइतेहरूलाई तत्काल घटनास्थलबाट उद्धार गरी स्थानीय स्वास्थ्य संस्थामा प्राथमिक उपचार गरिएको थियो। थप उपचारका लागि उनीहरूलाई एम्बुलेन्समार्फत वीरगञ्ज पठाइएको प्रहरीले जनाए छ । घाइतेमध्ये केहीको अवस्था चिन्ताजनक रहेको अस्पताल स्रोतले बताएको छ।

​​जिल्ला प्रहरी कार्यालय रौतहटका अनुसार शनिबार बिहान करिब ९ बजेको समयमा उद्योगको बोइलर सेक्सनमा काम भइरहेका बेला अचानक विष्फोट भएको थियो। ​​घटना लगत्तै डिएसपी विष्णुप्रदीप बस्यालको नेतृत्वमा प्रहरी टोली घटनास्थल पुगेको थियो। विष्फोटका कारण डिष्टिलरीको भौतिक संरचनामा समेत ठूलो क्षति पुगेको छ। ​डिएसपी बस्यालका अनुसार अहिले प्रहरीको मुख्य प्राथमिकता घाइतेहरूको जीवन रक्षा र घटनास्थलको सुरक्षामा रहेको छ। उनले भने, ‘विष्फोटको वास्तविक कारणबारे प्राविधिक अनुसन्धान सुरु गरिसकेका छौँ।’

सम्भावित थप जोखिमलाई मध्यनजर गर्दै डिष्टिलरी क्षेत्रलाई नियन्त्रणमा लिएर सुरक्षा व्यवस्था कडा पारिएको छ। ​प्रहरीले उद्योगधनीलाई तत्काल घाइतेहरूको उपचारमा लाग्न र उचित क्षतिपूर्तिको व्यवस्था गर्न निर्देशन दिएको छ।