रौतहट : रौतहटको गरुडामा ट्रेक्टरको ठक्करबाट एक नाबालकको मृत्यु भएको घटनाले गम्भीर मोड लिएको छ । घटना भएको करिब एक महिना बित्न लाग्दासमेत प्रहरीले मुद्दा दर्ता गर्न अस्वीकार गरेको भन्दै पीडित परिवारले न्यायका लागि पत्रकार सम्मेलनमार्फत गुहार मागेका छन् ।

प्रहरी प्रशासनले राजनीतिक दबाब र आर्थिक प्रभावमा परेर दोषीलाई संरक्षण दिएको आरोप पीडित पक्षको छ । पीडित परिवारले दिएको जानकारी अनुसार फाल्गुन १७ गते आइतबार प्रतिनिधि सभा निर्वाचनको प्रचारप्रसारका क्रममा ना.६ त ७५८६ नम्बरको ट्रेक्टरले दुर्घटना गराएको थियो। जनता समाजवादी पार्टीका उम्मेदवार राजकुमार दासको चुनावी प्रचारमा प्रयोग गरिएको उक्त ट्रेक्टरमा चर्को आवाजमा डिजे बाजा बजाइएको थियो ।

अत्यधिक गति र लापरबाहीका कारण ट्रेक्टरले गम्हरिया टोलस्थित अब्दुल कलाम आजाद (फूलबाबु) को घरको कम्पाउण्ड वाल र गेटमा ठक्कर दिएको थियो । सोही क्रममा गेट नजिक खेलिरहेका बालक मो. अलफाज गेटमा च्यापिन पुगेका थिए र उनको घटनास्थलमै मृत्यु भएको थियो ।

​मृतकका आफन्तका अनुसार घटनापछि उम्मेदवार राजकुमार दासले पहिले बच्चालाई बचाउनुपर्छ भन्दै आफ्नै गाडीमा राखेर बालक र परिवारलाई गरुडास्थित अस्पताल पुर्‍याएका थिए । बैंकबाट पैसा लिएर आउँछु भनी अस्पतालबाट बाहिरिएका दास त्यसपछि हालसम्म पनि सम्पर्कमा नआएको र पीडितको पीडामा बेवास्ता गरेको आरोप लगाइएको छ । मृतकका पिता हाल वैदेशिक रोजगारीको सिलसिलामा बहराइनमा रहेका छन् ।

​मृतककी आमा सबिहा खातुनले इलाका प्रहरी कार्यालय गरुडाका डिएसपी शंकर प्रसाद आचार्यमाथि गम्भीर आरोप लगाएकी छन्। पत्रकार सम्मेलनमा भावुक हुँदै उनले भनिन्,' ​हामी गरिब छौँ, त्यसैले हाम्रो कुरा सुनिँदैन। डिएसपी आचार्यले मुद्दा दर्ता गर्नुको साटो उल्टै हामीलाई बोलाएर डराउने र धम्क्याउने काम गरिरहेको छ। उनले दोषी पक्षसँग मिलेमतो गरेर न्यायलाई दबाउन खोज्नुभएको छ ।'

खातुनले थप चेतावनी दिँदै भनिन्, 'यदि हामीले न्याय पाएनौँ भने इलाका प्रहरी कार्यालय गरुडाकै अगाडि आत्मदाह गर्नेछौँ। छोरो नै नरहेपछि म बाँच्नुको अर्थ छैन, यसको सम्पूर्ण जिम्मेवारी डिएसपी आचार्यले लिनुपर्नेछ ।'

यता, प्रतिनिधि सभा सदस्यका प्रत्यासी राजकुमार दास तत्माले भने आफूमाथि लगाइएका आरोपहरू निराधार र राजनीतिक पूर्वाग्रहबाट प्रेरित रहेको दाबी गरेका छन् । उनले भने,'घटना भएको समयमा बालबालिकाहरू गेटमा झुण्डिएर खेलिरहेको र अचानक गेट लडेर दुर्घटना भएको हो।​मेरो जुलुस वा सवारी साधनले ठक्कर दिएको भन्ने कुरामा कुनै सत्यता छैन । ​घटनास्थलको मुचुल्कामा पनि स्थानीयले गेट लडेरै मृत्यु भएको बयान दिएका छन् । ​चुनावी माहोलमा मेरो चरित्र हत्या गर्न राजनीतिक प्रतिद्वन्द्वीले यो प्रपञ्च रचेका हुन् ।'

प्रहरीले किटानी जाहेरी लिन अस्विकार गरेपछि स्थानीय नागरिक समाज र अधिकारकर्मीहरूले समेत चासो देखाएका छन् । घटनाको प्रकृति र समय (निर्वाचनको पूर्वसन्ध्या) ले गर्दा पनि यसलाई शक्ति र पहुँचको आधारमा सामसुम पार्न खोजिएको आशंका गरिएको छ ।

पीडित परिवारले वर्तमान सरकार, गृहमन्त्री र प्रहरी महानिरीक्षक सम्म आफ्नो आवाज पुगोस् भन्ने चाहना राखेका छन् । उनीहरूले निष्पक्ष छानबिन दोषीलाई कानुनी कारबाही र लापरबाही गर्ने प्रहरी अधिकारीमाथि विभागीय अनुसन्धानको माग गरेका छन् ।