काठमाडौँ : राष्ट्रिय प्रजातन्त्र पार्टी (राप्रपा)ले बागमती प्रदेशसभामा संसदीय दलका नेता उद्धव थापामाथि पार्टी अनुशासन उल्लंघन गरेको आरोपमागर्दै साधारण सदस्यसमेत नरहने गरी निष्कासन गरेको छ ।

पार्टीको निर्णय विपरीत नेकपा एमाले र नेपाली कम्युनिस्ट पार्टी (नेकपा) सम्मिलित सरकारलाई समर्थन गरेको विषयलाई राप्रपाले कारबाहीको आधार बनाएको हो। पार्टीले यसअघि थापाको उक्त कदमप्रति असहमति जनाउँदै सरकारलाई दिएको समर्थन फिर्ता लिन निर्देशन दिएको थियो ।

तर पार्टीको निर्देशनअनुसार समर्थन फिर्ता नलिएपछि थापामाथि कारबाही गरिएको राप्रपाले जनाएको छ । पार्टी निर्णय विपरीत संसदीय गतिविधि सञ्चालन गरेको भन्दै उनलाई संगठनको सदस्यताबाट समेत हटाइएको हो ।

राप्रपाले प्रदेश सरकारमा सहभागी अन्य नेता तथा सदस्यहरूले पनि पार्टीको निर्णय र निर्देशन उल्लंघन गरे कारबाहीको दायरामा ल्याउने संकेत गरेको छ । यससँगै बागमती प्रदेशमा सरकारलाई समर्थन गर्ने विषयलाई लिएर राप्रपाभित्रको विवाद थप औपचारिक रूपमा सतहमा आएको छ ।