रौतहट : नेपाल निर्माण उद्योग परिषद्को जिल्ला अधिवेशन सम्पन्न भएको छ । निर्माण व्यवसायीहरुसँग सरोकार राख्ने नेकपा एमाले पार्टीको भातृ संगठनको रुपमा रहेको नेपाल निर्माण उद्योग परिषद्ले शुक्रबार जिल्ला कमिटी विस्तार गरेको छ ।
पार्टी कार्यालय गौरमा आयोजित कार्यक्रमका बीच परिषद्को पहिलो जिल्ला अधिवेशन सम्पन्न भएको हो । पार्टीका केन्द्रीय सदस्य अजय कुमार गुप्ताको प्रमुख आतिथ्यमा आयोजना भएको सो कार्यक्रमबाट ११ सदस्यीय जिल्ला नेतृत्वको समेत चयन भएको छ ।
निर्माण व्यवसायी समेत रहेका मो. ज्याउल हक अध्यक्ष रहने गरी ११ सदस्यीय कमिटी तयार भएको हो । अधिवेशनबाट चयन भएकाहरुलाई कार्यक्रमका अतिथिहरुले गमछा र माला लगाइ शुभकामना तथा बधाइ समेत दिएका थिए ।
