अर्घाखाँची : संघीय खानेपानी ढल व्यवस्थापन आयोजना अर्घाखाँचीको आर्थिक वर्ष २०८०/०८१ को वार्षिक भौतिक प्रगति ९२ प्रतिशत र वित्तीय प्रगति ८८ प्रतिशत भएको आयोजनाले जनाएको छ ।
आयोजनाको कार्यक्षेत्रभित्र पर्ने तीन जिल्ला अर्घाखाँची, गुल्मी, पाल्पा जिल्लामा योजनाका कामहरु अहिले निरन्तर रुपमा अगाडि बढेको आयोजनाका सिनियर डिभिजन इन्जिनियर किरण आचार्यले जानकारी दिए । आचार्यका अनुसार ३ जिल्लामध्ये अर्घाखाँचीमा १८, गुल्मीमा २५, पाल्पामा २५ गरी ६८ योजनाहरु आर्थिक वर्ष २०८०/०८१ मा आयोजनासँग सम्झौता भएकोमा तीन जिल्लामा ११ वटा योजनाहरु यस वर्ष सम्पन्न हुँदा ३ हजार ७ सय ९० परिवार लाभग्राही तथा ७ सय ७४ घरधुरीले खानेपानी १ घर १ धारा योजना अन्तर्गत लाभान्वित भएका प्रमुख आचार्यले मध्यान्हलाई जानकारी दिए ।
योजनाहरु धेरै बहुवर्षीय छन्, यस आर्थिक वर्ष २०८१/०८२ मा ३ जिल्लामा १ सय ११ वटा योजनाहरु छनोट भएका छन् भने यस आर्थिक वर्षमा तान्सेन कालिगण्डकी बृहत् पम्पिङ खानेपानी योजना पाल्पा र बर्तुङ खानेपानी योजना पाल्पाका २ ठूला योजना र छत्रकोट बृहत् पम्पिङ खानेपानी योजना गुल्मी रेसुङ्गा खानेपानी योजना गुल्मी गरी ४ वटा ठूला योजनाहरु समेत यसै वर्ष सम्पन्न हुने गरी काम दु्रत गतिमा अगाडि बढेको सिडिइ किरण आचार्यले बताए । अर्घाखाँची जिल्लामा आयोजनाको मुख्य कार्यालय भएपनि अर्घाखाँची भन्दा योजनाहरु गुल्मी र पाल्पामा धेरै छन् । यस आयोजनामा प्रमुखको रुपमा सिनियर डिभिजन इन्जिनियर आचार्यले जिम्मेवारी सम्हालेपछि कामले दु्रत गति लिएको योजनाका उपभोक्ताहरु बताउँछन् ।
आयोजना ठूलो भएपनि दरबन्दी अनुसारका कर्मचारीहरु कार्यालयमा नभएको अवस्थामा थोरै जनशक्तिले ९२ प्रतिशत आर्थिक ८८ प्रतिशत भौतिक प्रगति, आर्थिक वर्ष २०८०/०८१ मा देखाउनु ठूलो उपलब्धि भएको संघीय खानेपानी मन्त्रालयको दाबी छ । कर्मचारीहरु दिनरात नभनी खटिएर काम गरेपछि प्रगति राम्रो देखिएको जिल्ला समन्वय समिति अर्घाखाँचीका प्रमुख जीवनारायण कोइरालाले बताए ।
बहुवर्षीय योजनाको काम पनि ३ जिल्लामा दु्रत गतिमा अगाडि बढिरहेका छन् । कार्यालय प्रमुखले राम्रोसँग काम गर्न सहजीकरण गर्ने गरेको कारण धेरै काम गर्न सजिलो भएको बिडारी निर्माण सेवाका सञ्चालक वरिष्ठ निर्माण व्यवसायी राजकुमार बिडारीले बताए ।
अर्घाखाँचीमा भन्दा धेरै ठूला योजनाहरु गुल्मी जिल्लामा छन् भने अर्घाखाँची जिल्लामा पनि ठूला योजनाहरुको काम अगाडि बढ्ने तयारीमा रहेको कार्यालयका कम्प्युटर अधिकृत कृष्ण बर्माले बताए ।
उनका अनुसार कार्यालयमा डिभिजन इन्जिनियरसहित ४ जना इन्जिनियरको दरबन्दी भएपनि हालसम्म १ इन्जिनियर, १ कार्यालय प्रमुखले तीन जिल्लाका १ सय ११ योजनाहरुको फिल्ड निरीक्षण गर्ने बिल बनाउने नापजाँच गर्ने गरेका छन् । अर्घाखाँची जिल्लामा ढलको समेत काम योजनाका साथ स्थापना भएको सो कार्यालयले ढलको काम भने शुरु नगरेको बुझिएको छ ।
