रौतहट : जिल्लाको देवाही गोनाही नगरपालिका-६ मा रहेको श्री माध्यमिक विद्यालय कर्कच गुठ्ठीको विद्यालय व्यवस्थापन समितिको सदस्य पदका लागि भएको निर्वाचनमा हरेन्द्र साह कानूको प्यानल विजयी भएको छ । चार जना सदस्य पदका लागि शुक्रबार भएको निर्वाचनमा हरेन्द्र साह कानू २०१ मत प्राप्त गरि विजयी भएका हुन् ।
साहका निकटतम प्रतिद्वन्द्वी पप्पु कुमार यादव ५१ मतले पराजित भएका छन् । यादवले कुल १५० मत प्राप्त गरेका थिए ।
त्यस्तै साहको प्यानलबाट उम्मेदवारी दिएका रीना कुमारी दास २१६, किशोरी प्रसाद कुर्मी २१० र नितु कुमारी जयसवालले २१८ मत प्राप्त गरी विजयी भएका छन् ।
पप्पु कुमार यादवको प्यानलबाट उम्मेदवारी दिएका समिता कुमारी कुशवाहाले १६०, काजल कुमारी झाले १६१ र बिनोद कुमार यादव (सुनील) ले १४० मत तथा स्वतन्त्र उम्मेदवार राकेश ठाकुर लोहारले ३७ मत ल्याएका छन् ।
श्री माध्यमिक विद्यालय कर्कच गुठ्ठीको व्यवस्थापन समितीको नयाँ नेतृत्व चयनका लागि शुक्रबार बिहान ८ :३० बजेदेखि मतदान शुरु भई ४ बजे सम्पन्न भएको थियो । मतगणना कार्य साँझ ४:३० बजेदेखि शुरु गरिएको थियो । अन्तिम मत परिणाम राती सार्वजनिक भएको थियो ।
निर्वाचनमा हरेन्द्र साह र पप्पु यादव पक्षबीच निकै कडा प्रतिस्पर्धा भएको थियो । निर्वाचनमा चार जनाबाट नै कोही एकजना अध्यक्ष बन्ने मतदान अधिकृत जिल्ला शिक्षा समन्वय समिति रौतहटको वि.नि. उपेन्द्र सिंहले जानकारी दिए ।
