रौतहट : रौतहटको ईशनाथ नगरपालिकाले सिँचाइका लागि प्रयोग हुने विद्युतको महसुल स्थानीय तहले व्यहोर्ने भएपछि यहाँका किसान खुसी भएका छन् । ईशनाथ नगरपालिकाले किसानले खेती सिँचाइका लागि प्रयोग गर्ने विद्युत् महसुल व्यहोर्ने निर्णय गरेपछि किसान खुसी भएको नगरप्रमुख कौशलिया देवीले बताईन् ।
चालु आर्थिक वर्षको स्वीकृत कार्यक्रमअनुरूप कृषि सिँचाई मिटरको बिल नगरपालिकाले भुक्तानी गर्न लागेको उनको भनाई छ । नगरप्रमुख देवीले किसानलाई प्रोत्साहन गर्न तथा कृषि क्षेत्रमा आधुनिकीकरण गर्ने उद्देश्यले ‘कृषि मिटरको विद्युत् महसुल भुक्तानी गर्ने कार्यक्रम’ अन्तर्गत उक्त निर्णय गरिएको बताइन् ।
अहिलेसम्म कृषि सिँचाइको विद्युत् महसुल आफैले तिर्दै आएको अब नगरपालिकाले तिरिदिने भएपछी सजिलो हुने वडा नं २ का औरैयाका किसान सुरेश महतोले बताए । उनले भने, 'अब नगरपालिकाले नै महसुल तिरिदिने भएपछि खेतीको लागत कम हुनेछ ।'
नगरपालिकाको उक्त निर्णयले आफूहरुलाई सहज भएको ईशनाथ नगरका वडाबासी बताउँछन् । समयमै वर्षा नहुँदा सिँचाइका लागि डिजेलपम्प चलाउँदा खर्च बढी हुन्थ्यो, उनीहरूले भने-'सिँचाइका लागि विद्युत् निःशुल्क उपभोग गर्न पाउने भएपछि खर्च कम हुने भएको छ ।'
ईशनाथ नगरपालिकाले शुरु गरको ‘कृषि मिटरको विद्युत् महसुल भुक्तानी गर्ने कार्यक्रम’ स्थानीय सरकारले सञ्चालन गरेको योजनामध्ये नमुना भएको वडा नं ७ को किसानहरूको भनाइ छ ।
नगरकार्यपालिकाको बैठकले नगरपालिकाभित्रका सम्पूर्ण सडक बत्ती तथा कृषि सिँचाइ मिटरको बिल ईशनाथ नगरपालिकाले भुक्तानी गर्ने निर्णय गरेको थियो ।
पुस मसान्तसम्मको महसुल किसान आफैँले भुक्तानी गर्ने र आगामी माघदेखिको महसुल नगरपालिकाले तिर्ने निर्णय भएको नगरपालिकाका निमित्त प्रमुख प्रशासकीय अधिकृत नन्दकिशोर गुप्ताले जानकारी दिए । 'सिँचाइमा दिइने अनुदानले उत्पादन बढ्ने र किसानको आर्थिक अवस्थामा पनि सुधार आउने विश्वास लिएका छौँ', उनले भने -'कृषि क्षेत्रको विकास र विस्तारका लागि नगरपालिकाले ठोस् योजनासहित अघि बढेकाे छ ।'
