अर्घाखाँची : सालझण्डी सन्धिखर्क ढोरपाटन सडकको सन्धिखर्क र मालारानीको सीमाना वागि भण्डारमा १२ दिनका लागि यातायात आवागमन बन्द गरिने भएको छ ।
बर्खामा आएको अविरल वर्षाका कारण सडक भाँसिएकाले बन्द नै गरेर मर्मत गर्नुपर्ने सडक आयोजना सालझण्डि सन्धिखर्क सडकका लेखा अधिकृत योगेश पन्थिले जानकारी दिए ।
वागिको माटे–भण्डार सडक खण्डको मालारानी–५ मा पर्ने भण्डारको बेतानेमा पुष्पा विल्डर्स अर्घाखाँचीका सञ्चालक नारायण बन्जाडे, मनोज बन्जाले १ अर्ब २५ करोड रुपैयाँमा सालझण्डि सन्धिखर्क ढोरपाटन सडकसँग सम्झौता गरी निर्माण भइरहेको सडक अविरल वर्षाका कारण तलबाट माटो बगेर भाँसिएपछि मर्मत गर्न लागिएको आयोजनाले जनाएको छ ।
असोज १ गतेदेखि ११ गतेसम्म सडक आवागमन बन्द हुने भएकाले वैकल्पिक सडकको प्रयोग गर्न आयोजनाले अर्घाखाँचीबासीलाई आग्रह गरेको छ । जिल्ला समन्व समिति प्रमुख जीवनारायण कोइरालाको नेतृत्वमा सन्धिखर्क नगरपालिकाका प्रमुख कृष्ण प्रसाद श्रेष्ठ, मालारानी गाउँपालिकाका अध्यक्ष दलबहादुर भट्टराई, प्रमुख जिल्ला अधिकारी बाबुराम अर्याल, सुरक्षा निकायका प्रमुखहरु, मालारानी–५ का वडा अध्यक्ष तिलक मिश्र, आयोजनाका इन्जिनियर दिक्षा बस्याल, देउराली यातायातका उपाध्यक्ष अशोक भुसाल, नेपाल पत्रकार महासंघका सदस्य लक्ष्मण घिमिरे लगायतको टोलीले स्थलगत अनुगमन पश्चात बाटो बन्द गरेर मर्मत गर्नुपर्ने निष्कर्ष निकालेपछि प्रमुख जिल्ला अधिकारीले सडक बन्द गरेर वैकल्पिक मार्ग प्रयोग गरी सडक निर्माण गर्न निर्माण व्यवसायीलाई निर्देशन दिएपछि सडक निर्माण शुरु गरिएको हो ।
चाडपर्वमा कुनै अप्रिय घटना नघटोस् भनेर सडक मर्मतको काम थालिएको प्रमुख जिल्ला अधिकारी बाबुराम अर्यालले बताए । चाडपर्वमा सवारीको चाप हुने भएकाले त्यसलाई मध्यनजर गरेर कामको थालनी गरिएको उनको भनाइ छ ।
सकभर काम छिटो सकिने गरी योजना बनाइएको सालझण्डी–सन्धिखर्क–ढोरपाटन सडक आयोजनाकी सूचना अधिकारी दिक्षा बस्यालले बताए । १२ दिनमा काम सकाउने लक्ष्य भएको र मौसमले साथ दिएसम्म तोकिएको समयमा काम सम्पन्न हुने उनको भनाइ छ । बैठकमा प्रशासनका प्रशासकीय अधिकृत नुमलाल पन्थी, ढोरपाटन सडक आयोजनाका लेखा अधिकृत योगेश पन्थी लगायतको उपस्थिति थियो ।
