काठमाडौं : मेलम्ची खानेपानीको भ्रष्टाचार मुद्दामा दोषी ठहर भएकाहरुको सजाय निर्धारण भएको छ । विशेष अदालत काठमाडौँले गत भदौ २४ गते दोषी ठहर गरेको थियो । सोमबार ठहर भएकाहरुको सजाय निर्धारण गरेको हो ।
दोषी ठहर भएका पाँच जनालाई आठ÷आठ वर्ष कैद सजाय सुनाइएको छ । विशेष अदालतका अध्यक्ष नारायण कुँवर, न्यायाधीशहरु तेजनारायण सिंह राई र न्यायाधीश मुरारीबाबु श्रेष्ठको इजलासले दोषी ठहर भएकाहरुलाई सजाय निर्धारण गरेको हो ।
विशेष अदालतका प्रवक्ता यज्ञराज जोशीका अनुसार दोषी ठहर भएकाहरु पूर्वसचिव समेत रहेका खानेपानी समितिको अध्यक्ष गजेन्द्रकुमार ठाकुर, कार्यकारी निर्देशक सूर्यराज कँडेल, अर्का समितिको कार्यकारी निर्देशक र बोर्डको सचिव रामचन्द्र देवकोटालाई सजाय निर्धारण गरिएको हो । विशेष अदालतले ठाकुर र कँडेलसँग १० करोड १० लाख ६१ हजार ७५ रुपैयाँ बिगो भराउन आदेश गरेको छ । देवकोटासँग दुई करोड ९५ लाख ६५ हजार ६०३ रुपैयाँ बिगो माग गरेको छ ।
विशेष अदालतले परामर्शदाता इप्टिसाका टिम लिडर शिवकुमार शर्मालाई पनि आठ वषै नै कैद तोकेको छ । तर उनलाई जेष्ठ नागरिक भएकाले दुई वर्ष मिनाहा भएर ६ वर्ष कामय गरिएको छ । शर्मालाई पनि दुई करोड ९५ लाख ६५ हजार ६०३ रुपैयाँ बिगो भराउन आदेश भएको छ ।
इप्टिसा र बेट्स (बीइटीएस) सँग ६ करोड २१ लाख ९३ हजार ५९६ रुपैयाँ बिगो भराउन आदेश भएको छ । इटालियन निर्माण कम्पनी सीएमसी भ्रष्टाचारको मतियारमा दोषी ठहर भएको छ भने सीएसीले २६ करोड ११ लाख ६ हजार ९९१ रुपैयाँ बिगो बुझाउनुपर्ने भएको छ ।
भेरियसन स्वीकृत नै नगराई रनिङ्ग बिलमार्फत भुक्तानीको लागि सिफारिस गरेको, कार्य सम्पन्न नहुँदै भुक्तानी गराएको रकम असुल उपर गर्न तर्फ कुनै पहल नगरेको, अघिल्लो बिलहरुमा भुक्तानी भएको नयाँ दर रेटवाट मूल्य घटेको तथा रेक्टिफिकेसन नगरे वापत कटाउनु पर्ने रकम नघटाएको कसुरदार ठहर भएका हुन् ।
अख्तियार दुरुपयोग अनुसन्धान आयोगले १५ जना व्यक्ति र तीनवटा कम्पनीविरुद्ध ६ अर्ब ७३ करोड बराबरको बिगो कायम गर्दै गत फागुन ६ गते मुद्दा दायर भएको थियो । तर, विशेष अदालतले पूर्वसचिव भीम उपाध्यायसहित डा. संजय शर्मा मुकुन्दप्रसाद पौडेल र रुद्रसिंह तामाङलाई भने सफाइ दिएको छ । बाँकी दोषी ठहर भएकाहरूको सोमबार कैद निर्धारण गरिएको हो ।
