साउदी अरब : साउदी अरेबियाको रियादको एक निजी कम्पनीमा काम गर्ने सुमन नेपाली (परिवर्तित नाम) १९ लाख रुपैयाँ ठगीमा परेका छन् । उनलाई हिन्दी र अरबी भाषा बोल्ने एक पाकिस्तानी नागरिकले प्रलोभनमा पारी ठगेका हुन् ।

सुमनले साउदीबाट ८ लाख ५० हजार नेपाली रुपैयाँ पठाइसकेपछि पनि थप पैसा मागिएको थियो । रकम दिन नसकेपछि ठगी गर्ने समूहले उनलाई ज्यान मार्ने धम्की दिएको बताइएको छ । आफ्नो ज्यान जोखिममा परेको भन्दै सुमनले परिवारलाई जानकारी दिएका थिए । त्यसपछि परिवारले त्रासका कारण एक नेपालीको खातामा १० लाख ५० हजार रुपैयाँ ट्रान्सफर गरिदिएका थिए ।

तर, पैसा पठाएपछि पनि समस्या समाधान नभई थप ६ हजार साउदी रियाल मागिएपछि परिवारले साउदीस्थित नेपाली साझा मञ्चका अध्यक्ष अन्जान गुभाजुलाई सम्पर्क गरेका थिए । गुभाजुले यो घटनाबारे बुझेर नेपाली राजदूतावास, रियादलाई जानकारी गराएका थिए । दूतावासले नेपालमा रकम ट्रान्सफर भएको खातावालाबारे अनुसन्धान गर्न र साउदीमा पुलिस रिपोर्ट गर्न सुझाव दिएको थियो । तर, पीडितले सुरक्षा कारणले प्रहरीमा उजुरी गर्न सकेका छैनन् ।

सुमनले ह्वाट्सएपमार्फत ठगी गर्ने समूहसँग सम्पर्क गरेका थिए, जहाँ उनलाई लोभमा पारेर व्यक्तिगत जानकारी लिइ मानसिक दबाब दिइएको थियो ।

हालका दिनमा साउदीमा सस्तोमा आइफोन दिने, लोटरी परेको भन्दै, वा अन्य प्रलोभन देखाएर नेपाली नागरिकहरू ठगीमा पर्ने गरेका छन् । यस्ता घटनाहरूमा फोनमार्फत पैसा माग्ने व्यक्तिहरूसँग कुनै लेनदेन नगरी तुरुन्तै सम्बन्धित दूतावास, प्रहरी, वा संघसंस्थालाई जानकारी दिन आवश्यक हुने मन्चका अध्यक्ष गुभाजुले आग्रह गरे ।

नेपाल सरकार र सम्बन्धित निकायले यस्ता घटनाहरूलाई गम्भीरतापूर्वक लिएर तुरुन्त कारबाही गर्नुपर्ने माग उठिरहेको छ । विदेशमा कार्यरत नेपाली श्रमिकहरूले आफ्नो व्यक्तिगत जानकारी सुरक्षित राख्न र अपरिचित व्यक्तिहरूसँग सतर्क भएर व्यवहार गर्नुपर्ने आवश्यक देखिएको छ ।

यो घटनामा पीडितको व्यक्तिगत जानकारी गोप्य राख्दै अन्य नेपालीहरूलाई सचेत बनाउनका लागि यो समाचार प्रकाशित गरिएको हो ।