जब म दिनभरि घुमेर घर फर्किन्छु 
मसित हुनेछ सारा एक्लोपन, 
मेरो एक्लोपन 
महानगरको कोलाहलमा हराउँदैन 
भीडमा कतै विसाउँदैन 
यो घना र कठोर छ 
अनि 
यो वीभत्स र बर्बर छ 

तिमी भन्थ्यौ नि –
जङ्थलमा हुन्छ एक्लोपन , 
तर म यो कंक्रिटको घेरामा 
अझै भयावह एक्लोपन भोग्दैछु 
मलाई थकाउँछ यसले 
मलाई मैबाट भगाउँछ यसले 
तर म हार्दिनँ यो एक्लोपनबाट । 

मेरो एक्लोपनमा मेरा असङ्ख्य रातहरु छन् –
मेरा अपरिचित शत्रुहरु छन् 
मेरो एक्लोपन कहाँ एक्लो हुन्छ र ? 
यहाँ कैय्यन् ज्ञातअज्ञात साथीहरु छन् 

जब म घर फर्किन्छु 
घर कहाँ मसित हुन्छ र ? 
म त घर जस्तै एक्लो भएर नाङ्गिसकेको हुन्छु 
घर म जस्तै । 
मजस्तै एक्लो घर ।