काठमाडौं : वाणिज्य, आपूर्ति तथा उपभोक्ता संरक्षण विभागले नियमित रुपमा बजार अनुगमन गर्दै आइरहेको छ । विभागले एक महिनाको अवधिमा एक हजार बढी ठाउँमा अनुगमन गरिसकेको छ ।
विभागले आइतबार काठमाडौंको कालिमाटी तरकारी तथा फलफुल बजारमा अनुगमन गरिरहेका बेला उद्योग, वाणिज्य तथा आपूर्तिमन्त्री दामोदर भण्डारी पुगे ।
अनुगमनका क्रममा अस्वभाविक महंगी र व्यापारमा अनियमितता गरिरहेका केही पसलहरुलाई सिल गर्न मन्त्री भण्डारीले निर्देशन दिएका छन् । व्यापारीले खरिद मूल्यभन्दा अत्यधिक नाफा राखेर सामान बिक्री वितरण गरेको पाइएको छ भने, बिलबिजक बिनै कारोबार गरेको पाइएको छ । केही तरकारी र मासुजन्य पसलहरुले सरसफाइमा पटक्कै ध्यान नदिएको पाइएको छ ।
माछामासु अव्यवस्थित रुपले फ्रीजिङ गरिएको तथा सरसफाइमा ध्यान नदिएको पाइएको हो । अनुगमन टोलि जाँदा व्यापारीहरु पसल बन्द गरी भाग्ने र अनुगमन टोलीलाई असहयोग गरेको पाइएको छ ।
बजारमा भेटिएका उपभोक्ताहरुले खरिद मूल्य भन्दा १० गुणा बढीसम्म नाफा राखेर बिक्री गर्ने गरेर उपभोक्ता ठग्ने कार्य भइरहेकाले यस्ता व्यापारीलाई कारबाही गर्न माग गरेका छन् ।
मन्त्री भण्डारीले गुनासो आएका ठाउँहरुमा अनुगमन गरी तत्काल कारबाही गरिरहेको बताए । उनले र्षाका कारण श्रृजित प्राकृतिक विपदको पीडा भोगिरेका उपभोक्ता नठग्न व्यवसायीहरुलाई आग्रह गरे । उनले अस्वभाविक ढंगले कानून विपरित व्यवसाय सञ्चालन गर्ने व्यापारिलाई कारबाही गर्न मातहतका निकायलाई निर्देशन दिए ।
