उदयपुर : दोस्रो स्व. कैलाश राई (युवराज) स्मृति फुटबल प्रतियोगिताको उपाधि सगरमाथा फुटबल समूह राजावासले जितेको छ । शनिबार भएको फाइनल खेलमा दमौटी फुटबल समूह दमौटीलाई ट्राइब्रेकरमा ४–१ गोल अन्तरले पराजित गर्दै सगरमाथा फुटबल समूहले जितेको हो ।
खेल अवधिभर दुवै टोलीले गोल गर्न नसकेपछि खेल गोलरहित बराबरीमा सकिएको थियो । त्यसपछि भएको ट्राइब्रेकरमा सगरमाथा फुटबल समूहले बाजी मार्यो ।
प्रतियोगितामा पहिलो तथा दोस्रो हुनेलाई क्रमशः ५१ र ३१ हजार नगदसहित ट्रफी, मेडल, प्रमाणपत्र प्रदान गरिएको थियो । कोशी प्रदेश सदस्य तथा उपसभामुख सिर्जना दनुवारलगायतले पुरस्कार हस्तान्तरण गरेका थिए ।
जिल्ला फुटबल संघको समन्वय तथा त्रियुगा नगरपालिका–४ बगहा युवा समूहको आयोजनामा बगहामा दोस्रो स्व. कैलाश राई स्मृति प्रतियोगिता कात्तिक ३ गतेदेखि सञ्चालन भएको थियो ।
