काठमाडौं : नेकपा एमालेले आगामी मंसिर १६ गते ४४ पदमा हुन लागेको स्थानीय तहको उपनिर्वाचनमा पार्टीका उम्मेदवारलाई जिताउन सम्पूर्ण शक्ति परिचालित गर्ने भएको छ । शनिवार बसेको सचिवालय बैठकले यस्तो निर्णय लिएको हो । बैठकपछि एमालेका उपमहासचिव प्रदीप ज्ञवालीले पत्रकारहरूसँग भने, ‘मंसिर १६ गते हुने उपनिर्वाचनका सन्दर्भमा प्रदेश कमिटीले सिफारिस गरेर पठाएका उम्मेदवारहरूको नाम अनुमोदन गर्ने निर्णय गरेको छ । सो निर्वाचनमा सिंगो पार्टी पंक्तिलाई सम्पूर्ण शक्तिका साथ परिचालित हुन निर्देशन दिइएको छ ।’
नेपाली कांग्रेस पनि स्थानीय तहको उपनिर्वाचन हुने क्षेत्रमा उम्मेदवार टुंगो लगाएर अगाडि बढ्दैछ । पार्टीभित्र सर्वसम्मत उम्मेदवार तय गरेर अधिकतम चुनाव जित्ने रणनीतिमा छ । यी दुई दल गत चुनावमा पहिलो र दोस्रो दलको रुपमा रहेका थिए । हाल संघीय सरकार र प्रदेश सरकारमा सँगै छन् । तथापि, कांग्रेस र एमाले स्थानीय तहको उपनिर्वाचनमा मुख्य प्रतिस्पर्धी हुन् । दुवै दलले पार्टीको सम्पूर्ण शक्ति लगाएर उपचुनावमा होमिने निर्णय लिएका छन् ।
उपनिर्वाचन हुने ४४ स्थानमध्ये २६ स्थानमा कांग्रेसका तर्फबाट चुनाव जितेकाहरू थिए । यसकारण पनि स्थानीय तहको उपनिर्वाचन कांग्रेसका लागि महत्वपूर्ण छ । आसन्न उपनिर्वाचनमा कांग्रेसलाई ती २६ स्थानको विरासत जोगाउनु मुख्य चुनौती हुने देखिएको छ । काठमाडौँको कीर्तिपुर नगरपालिका प्रमुख, ओखलढुंगा र कैलाली जिल्ला समन्वय समिति प्रमुख, जाजरकोटको नलगाड नगरपालिका उपप्रमुख, मोरङको ग्रामथान गाउँपालिकाका अध्यक्ष, दैलेखको महाबु गाउँपालिका अध्यक्ष कांग्रेसले जितेको थियो । दोलखाको गौरिशंकर गाउँपालिकाका उपाध्यक्ष, बाजुराको स्वामीकार्तिक खापर गाउँपालिका उपाध्यक्ष पदका लागि उपनिर्वाचन हुँदैछ । यी सबै पदमा यसअघि कांग्रेसले जितेको थियो ।
सरकारको नेतृत्वकर्ता दल नेकपा एमालेका लागि आफ्नो पार्टीको परीक्षणका लागि अझ महत्वपूर्ण छ । यसअघि एमालेले जितेका ८ स्थानमा उपनिर्वाचन हुँदैछ । संसदको तेस्रो शक्ति रहेको माओवादी केन्द्रले अघिल्लो स्थानीय तह निर्वाचनमा जितेका ८ स्थानमा अहिले उपनिर्वाचन हुँदैछ । जसपा नेपालले जितेको एक र स्वतन्त्र उम्मेदवारले जितेको एक स्थानीय तहमा पनि उपनिर्वाचन हुँदैछ ।
विगतमा सरकारमा रहेका दलहरूले चुनावी तालमेल गरेका उदाहरण छन् । यसअघिको राष्ट्रिय सभाको चुनावमा आफ्नो उम्मेदवारलाई हराउन सत्ता सहयात्री कांग्रेसले भूमिका खेलेको भन्दै माओवादी केन्द्रले असन्तुष्टि जनाउँदा गठबन्धन नै फेरबदलको अवस्था आएको थियो । तर अहिलेको सरकारलाई विगतको जस्तो बुझ्न नहुने कांग्रेस र एमालेका नेताहरू बताउँछन् । सरकारमा सँगै रहेर चुनाव हराउन भूमिका खेलेको भनेर यसअघिको जस्तो सत्ता सहकार्य नरहेको बताउँछन् । सरकारमा रहेर जनताको काम गर्ने र चुनावमा दलहरूले प्रतिस्पर्धा गर्ने बताउँछन् । कांग्रेस र एमालेले एक्ला एक्लै चुनाव लड्ने नीगित निर्णय पनि गरेका छन् । यस आधारमा समेत उपचुनाव लड्न लागेको उनीहरू बताउँछन् ।
