भक्तपुर : वैदेशिक रोजगार व्यवसायीहरूको व्यापक उपस्थितिमा वैदेशिक रोजगार व्यवसायी गणतान्त्रिक मञ्चले भक्तपुरको घ्याम्पेडाँडामा वनभोज कार्यक्रम सम्पन्न गरेको छ । मञ्चका अध्यक्ष धनलाल जैसीको अध्यक्षतामा सम्पन्न कार्यक्रममा गणतन्त्रिक मञ्चका इञ्चार्ज, नेकपा माओबादीका केन्द्रीय सदस्य तथा पूर्वमन्त्री रामेश्वर राय यादवले मञ्चले आयोजना गरेको वनभोज कार्यक्रमले मनोरञ्जन, आपसमा भाइचारा सम्बन्ध र सद्भाव कायम गर्ने भन्दै आयोजक मञ्चलाई धन्यवाद दिए ।
व्यवसायी एकता र सद्भावका लागि प्रधानमन्त्री पुष्पकमल दाहाल ‘प्रचण्ड’ले समेत सद्भाव र शुभकामना दिएको उनले जानकारी दिए । उनले मुलुकको अर्थतन्त्रमा वैदेशिक रोजगार व्यवसायीले दिएको योगदान राज्यले बिर्सन नहुने बताए । सरकारले रोजगार दिन नसकेका कारण बेरोजगार अवस्थामा रहेका युवायुवतीलाई वैदेशिक रोजगारव्यवसायीले विदेशमा भएपनि रोजगारी उपलब्ध गराएर सरकारलाई ठूलो सहयोग गरेको उनले बताए ।
पूर्वमन्त्री यादवले आफू मन्त्री हुँदा इजाजतपत्र नवीकरणका लागि बाध्यकारी प्रावधानको रूपमा रहेको वार्षिक सय जना कामदार पठाउनुपर्ने बाध्यता हटाएर व्यवसायीको मुहार उज्यालो बनाएको भन्दै जुनसुकै पार्टीमा आस्था राख्ने भएपनि व्यवसायीहरू एकले अर्कोलाई थिचोमिचो नगर्ने र एकले अर्कोलाई सघाउने सोचले काम गर्नुपर्ने सुझाव दिए ।
नेपाल वैदेशिक रोजगार व्यवसायी संघका अध्यक्ष राजेन्द्र भण्डारीले संघले व्यवसायीका समस्या समाधानका लागि काम गरिरहेको भन्दै व्यवसायीका सबै संघसंस्थाबीच आपसी एकता बलियो हुनुपर्ने बताए । मञ्चका अध्यक्ष जैसीले मञ्च व्यवसायीका हक अधिकारका मुद्दामा सधैं उभिने, तर संघले बाटो बिराए खबरदारी गर्ने बताए ।
मञ्चका महासचिव कुन्छा दोर्जे दिमदोङले सञ्चालन गरेको कार्यक्रममा गीतकार तथा संगीतकार फुल कुमार बम्जन, लोक गायक श्याम रानामगर, गायिका सुमन थापा, संगीता सारू मगरलगायतका कलाकारले नेपालका विभिन्न भेग र क्षेत्रमा गाइने लोकगीत, लोक दोहोरी र आधुनिक गीतका विविध प्रस्तुति दिएर कार्यक्रमलाई मनोरञ्जनात्मक बनाएका थिए ।
कार्यक्रममा संघका पूर्वअध्यक्ष दिल प्रसाद पोखरेल, प्रेमबहादुर कटुवाल, नेपाली कांग्रेसकी केन्द्रीय सदस्य तथा महिला व्यवसायी सिता देवकोटा, प्रगतिशील वैदेशिक रोजगार व्यवसायी मञ्च नेपालका अध्यक्ष जनक रावल, वैदेशिक रोजगार व्यवसायी एकता समितिका अध्यक्ष हरि बहादुर पाण्डे क्षेत्री, नेपाल लोकतान्त्रिक वैदेशिक रोजगार व्यवसायी एशोसिएसनका पूर्वअध्यक्ष नरेन्द्र ढकाल, संघका कार्यसमितिका पदाधिकारी तथा सदस्यहरू, एशोसिएसन तथा मञ्चका वर्तमान पदाधिकारीहरु, पत्रकारहरुका साथै करिब ४ सय जनाको हाराहारीमा उपस्थिति रहेको वनभोज कार्यक्रमका संयोजक केदारनाथ अधिकारीले जानकारी दिए ।
काठमाडौं : श्रम, रोजगार तथा सामाजिक सुरक्षा मन्त्री एवम् राष्ट्रिय स्वतन्त्र पार्टीका उपसभापति डोल प्रसाद अर्यालले सहकारी ठगीमा आफनो कुनै पनि संलग्नता नरहेको भन्दै बचाउ गरेका छन् । केही दिनयता सार्वजनिक सञ्चारका माध्यमबाट मन्त्री अर्याल पार्टीका अन्य नेताहरूसँगै सहकारीको रकम अपचलनमा संलग्न रहेको दाबीसहित समाचार सार्वजनिक भएका छन् ।
राष्ट्रिय स्वतन्त्र पार्टी क्षेत्र नम्बर ५ काठमाडौंले आउँदै गरेको नयाँ वर्षको अवसरमा शनिबार आयोजना गरेको शुभकामना आदान प्रदान कार्यक्रमलाई सम्बोधन गर्दै मन्त्री अर्यालले बजारमा हल्ला फिजाइएजस्तो गरी सहकारी ठगीमा आफनो कुनै भूमिका नरहेको दाबी गरे ।
उनले भने, ‘२०७८ सालमा म सो सहकारीको उपाध्यक्ष थिएँ । तर मेरो कार्ययोजना र सहकारी सञ्चालकसँगका बिचार मेल खान नसकेपछि मैले २०७८ साल पुस ११ गते नै राजीनामा दिएको हो, सरकारले समस्याग्रस्त घोषणा गरेको हाम्रो नयाँ कृषि सहकारीमा अहिले मेरो कुनै संलग्नता नभएको स्पष्ट गर्न चाहन्छु ।’
एक करोड लगानी गर्ने योजना बनाइ पहिलो किस्ता स्वरुप २३ लाख रुपैयाँ लगानी गरेको सार्वजनिक गर्दै मन्त्री अर्यालले सहकारीबाट आफ्नो उक्त रकम अहिलेसम्म फिर्ता नपाएको दाबी गरे ।
सहकारीको उपाध्यक्ष नियुक्त भएदेखि राजीनामा दिएसम्मको अवधिमा आफूले कुनै पनि कारोबार नगरेको दाबी गर्दै श्रममन्त्री अर्यालले सहकारीका रजिष्ट्रारको रोहबरमा नै आफूले उपाध्यक्ष पदबाट राजीनामा दिएकाले बदमासीको गुञ्जायस नरहेकोसमेत दाबी गरे । मन्त्री अर्यालले आफूले ठगी नगरेको भन्दैमा कुनै कालखण्डमा सहकारीमा आवद्ध भएकै कारण ठग हो भन्ने कसैलाई छुट नहुने जिकिर गरे । उनले आरोप लगाउनु पूर्व एक पटक अध्ययन गरेर मात्रै लेख्न र बोल्न सञ्चारकर्मीहरूसँग आग्रह गरेको उनको निजी सचिवालयले जनाएको छ ।
काठमाडौं : वैदेशिक रोजगारीका लागि माल्टा र क्यानडा पठाइदिने प्रलोभन दिएर २० लाख रुपैयाँभन्दा बढी ठगी गरेको उजुरीका आधारमा प्रहरीले दुई जनालाई पक्राउ गरेको छ ।
अर्जुन प्रसाद ढकालसमेत दुई जनालाई माल्टा पठाइदिने भन्दै १३ लाख ४४ हजार ४ सय रुपैयाँ ठगी गरेकोे उजुरीका आधारमा प्रहरीले पाँचथर तुम्बेवा गाउँपालिका वडा नं. १ घर भइ हाल ललितपुर महानगरपालिका वडा नं. १३ कुसुन्ती बस्ने हर्क बहादुर दाहाललाई पक्राउ गरेको हो । दाहालले माल्टालगायत युरोपका विभिन्न देशमा पठाइदिन्छु भन्दै आकर्षक तलबको प्रलोभन देखाएर ठगी गर्ने गरेको प्रहरी भनाइ छ ।
यस्तै प्रहरीले दिनेश लोहारसमेत ३ जनालाई क्यानाडा पठाइदिन्छु भनि ७ लाख रुपैयाँ ठगी गरेको उजुरीका आधारमा सुनसरीको बराक्षेत्र नगरपालिका वडा नं. १० घर भइ हाल काठमाडौं महानगरपालिका वडा नं. ३१ नयाँ बानेश्वर बस्दै आएका मनिष दाहाललाई पक्राउ गरेको छ ।
प्रहरीले बेरोजगार युवायुवतीहरुलाई वैदेशिक रोजगारीमा पठाउने भनि आकर्षक तलबको प्रलोभनमा पारी पीडितहरुबाट रकम लिएपश्चात विदेश नपठाइ सम्पर्कविहीन हुने प्रवृत्ति बढेको भन्दै सचेत हुनसमेत आग्रह गरेको छ ।
पक्राउ परेकाहरुलाई गरी थप अनुसन्धान तथा कारबाहीका लागि वैदेशिक रोजगार विभाग ताहाचल, काठमाडौं पठाइएको काठमाडौं उपत्यका अपराध अनुसन्धान कार्यालय मीनभवनले बताएको छ ।
काठमाडौं : उपप्रधान एवम् गृहमन्त्री रवि लामिछानेले रुसी सेनामा रहेका नेपालीलाई उद्धार गर्न अन्तरदेशीय समन्वय प्रभावकारी नहुँदा जटिलता देखिएको बताएका छन् । विभिन्न कारणले रुसी सेनामा भर्ना भइ जीवन जोखिममा पारेका नेपालीको ‘जीवन रक्षा अभियान’ले शुक्रबार गृहमन्त्री लामिछानेलाई भेटेर रुसी सेनामा रहेका नेपाली युवाहरुको जीवन रक्षा गरिदिन माग गरेको हो ।
जवाफमा गृहमन्त्री लामिछानेले रुसी सेनामा रहेका नेपाली युवाहरुको समस्याबारे प्रधानमन्त्रीसँग पनि तत्काल समन्वय गरी समस्या समाधानका लागि छलफल गर्ने बताए । गृहमन्त्री लामिछानेले रुसी सेनामा पठाउन रकम असूली गर्नेलाई पनि कानूनी दायरामा ल्याउने आश्वासन दिए ।
अभियानले गृहमन्त्री लामिछानेलाई रुसी सेनामा भएका ६ सय २० जना नेपालीको विवरण हस्तान्तरण गरेको छ । त्यसमध्ये ३९ जनाले रुस–युक्रेन सिमानामा ज्यान गुमाएको अभियानको दाबी छ ।
अभियानले सामाजिक सञ्जालमार्फत रुसी सेनामा आवद्ध ४ सय २० जना नेपाली दैनिक सम्पर्कमा रहेको र उनीहरुले प्रत्येक दिन युद्धस्थलबाट श्रव्यदृश्य सामग्रीमार्फत जानकारी पठाउने गरेको बताएको छ ।
अभियानले रुसले नेपाली युवाहरुलाई भाडाका सिपाहीका रुपमा भर्ती गरेपछि सिर्जना भएको समस्याका सम्बन्धमा सरकार, राजनीतिक दल, गैरसरकारी संस्था र सम्पूर्ण नेपालीको चिन्ता र सरोकारको विषय बन्नुपर्ने माग गरेको छ ।
परराष्ट्र मन्त्रालयले भने रुसी सेनामा भर्ती भएका १८ जनाको मृत्यु भएको पुष्टि गरेको छ । रुसी सेनामा रहेका युवाका परिवारले हालपनि नेपालीलाई अवैधानिकरुपमा रुस पठाउने गरेको र बिचौलियाहरुले रुस युक्रेन युद्धमा फसेका युवालाई उद्धार गरिदिन्छु भन्दै रकम मोलमलाइ गरेर शोषण गर्ने गरेको भन्दै अभियानले बिचौलियाहरुलाई कारबाही गर्न गृहमन्त्रीसमक्ष माग गरेको छ ।
काठमाडौं : वैदेशिक रोजगारीका लागि मलेसिया तथा क्रोएसिया पठाइदिन्छु भन्दै ठगी गरेको उजुरीका आधारमा प्रहरीले दुई जनालाई पक्राउ गरेको छ ।
प्रहरीले जानकी थापालाई वैदेशिक रोजगारीका लागि युरोपेली मुलुक क्रोएसिया पठाइदिने भन्दै २ लाख ८७ हजार रुपैयाँ ठगीको उजुरीमा कञ्चनपुर भिमदत्त नगरपालिका वडा नं. ३ घर भइ हाल काठमाडौं महानगरपालिका वडा नं. १३ ताहाचल बस्ने मदन सिंह ठगुन्नालाई काठमाडौं कुलेश्वरबाट पक्राउ गरेको छ ।
त्यसैगरी प्रहरीले मोहिद राईनलाई वैदेशिक रोजगारीका लागि मलेसिया पठाउने आश्वासन दिएर २ लाख ८७ हजार लिएका महोत्तरी बलवा नगरपालिका वडा नं. ९ घर भइ हाल काठमाडौंको बुढानीलकण्ठ नगरपालिका वडा नं. १० कपन बस्दै आएका अजमत राईनलाई कपनबाट पक्राउ गरेको छ । प्रहरीले उनीहरुलाई वैदेशिक रोजगार ऐनअनुसार अनुसन्धान तथा कारबाहीका लागि वैदेशिक रोजगार विभाग पठाइएको जानकारी दिएको छ ।
भरत प्रधान/मध्यान्ह
लिस्बन : पोचुगलमा सञ्चालित राहदानी सेवा शिविरबाट ६ सय बढी नेपालीको विद्युतीय राहदानी (ई–पासपोर्ट) का लागि जैविक तथ्यांक संकलन गरिएको छ ।
फ्रान्सस्थित नेपाली दूतावासको टोलीले लिस्बनमा रहेको अवैतनिक नेपाली महावाणिज्यदूतावासको समन्वय र सहजीकरणमा लिस्बनबाट ६ सय ६९ नेपालीको विद्युतीय राहदानीका लागि जैविक तथ्यांक संकलन गरेको हो । टोलीले राजधानी लिस्बनमा इनरोलमेन्ट सेन्टरको स्थापना गरी विद्युतीय राहदानीका लागि जैविक विवरणसहितको आवेदन संकलन गरेको टोली प्रमुख एवं नेपाली दूतावास, फ्रान्सका नियोग उपप्रमुख सीता बस्नेतले जानकारी दिइन् ।
टोली प्रमुख बस्नेतका अनुसार दुई सय ८० जनाको राहदानी हराएको, ४७ जनाको क्षति भएको, दुई सय ९१ जनाको नवीकरण, १६ बालबालिकाको नयाँ राहदानी र ३५ बालबालिकाको नवीकरणका लागि आवेदन संकलन गरिएको हो । राजधानी लिस्बनमा एक सातासम्म सञ्चालित राहदानी सेवा शिविरबाट एक लाख १६ हजार पाँच सय २० युरो अर्थात् झण्डै एक करोड ६६ लाख ६२ हजार रुपैयाँ राजस्व संकलन भएको टोली प्रमुख बस्नेतले बताइन् ।
शिविरमा अतिरिक्त शुल्क लिएर आवेदन संकलन गरेको भन्ने सेवाग्राहीको गुनासोका सन्दर्भमा दूतावासकी नियोग उपप्रमुख बस्नेतले टोलीले राहदानी बनाउन लाग्ने सरकारले तोकेको न्यूनतम राजस्व शुल्क र कुरिएर खर्चबापतको १० युरोबाहेक अन्य रकम नलिएको स्पष्ट पारिन् । अतिरिक्त शुल्क लिएको भन्दै अफवाह फैलाइएकोप्रति आफ्नो गम्भीर ध्यानाकर्षण भएको उल्लेख गर्दै बस्नेतले सो विषयमा लिस्बनस्थित महावाणिज्य दूतावास, एनआएनए पोर्चुगललगायत शिविर अवधिभर खटिएका नेपाली संघ–संस्थाका प्रतिनिधिसँग सोधखोज गर्न र सत्यतथ्य बुझ्न सबैलाई आग्रह गरिन् । दूतावासबाट टोली आएको भएपनि शिविर अवधिभरको सबै खर्च लिस्बनस्थित महावाणिज्यदूतावासले व्यवस्थापन गरेको उनले बताइन् ।
टोलीले शिविर अवधिभर राहदानीविहीन बनेका, राहदानी हराएका, क्षति भएका र राहदानीकै कारण समस्यामा परेका नेपालीका लागि प्राथमिकताका आधारमा सेवा प्रवाह गरेको उनले बताइन् । “पोर्चुगलमा रहेका नेपालीको समस्यालाई ध्यानमा राखेर विशेष गरी यहाँको कागजी प्रक्रियामा रहेका नेपालीलाई सेवा प्रदान गर्ने उद्देश्यअनुरूप दूतावासले शिविरको व्यवस्था गरेको हो”, बस्नेतले भनिन्, “यहाँ अझै धेरै नेपालीको राहदानी बनाउनुपर्ने देखिन्छ । राहदानी बनाउन नपाएको भन्दै धेरै नेपालीले गुनासो गर्नुभएको छ । उहाँहरुको गुनासो स्वभाविक छ । दूतावाससँग कर्मचारीको अभाव भएका कारण लामो समयसम्म शिविर सञ्चालन गर्न सम्भव भएन । यहाँ देखिएको राहदानीसम्बन्धी समस्याको समाधानका लागि विभागबाटै टोलीको व्यवस्थापन गर्नुपर्ने देखिन्छ”, उनले भनिन् ।
शिविर गत मार्च २४ तारिखदेखि शुरु भएको हो । मंगलबार बिहानसम्म थप आवेदन संकलन गरिएको थियो । टोलीले राहदानी हराएका, क्षति भएका, सन् २०२४ फ्रेब्रुअरी २९ सम्म म्याद सकिएका, पोर्चुगलको अध्यागमन निकाय (आइमा) मा २०२४ अप्रिल ३० सम्म बायोमेट्रिकका लागि समय लिइसकेका तथा पोर्चुगलमा जन्मेका बालबालिकाको प्राथमिकताका आधारमा विद्युतीय राहदानीका लागि जैविक तथ्यांक संकलन गरेको थियो ।
घुम्ती शिविरले तत्कालका लागि राहत भए पनि अझै धेरै नेपाली राहदानीसम्बन्धी समस्यामा रहेकाले फेरि छिट्टै टोली ल्याउन पहल गर्ने गैरआवासीय नेपाली संघ पोर्चुगलका अध्यक्ष उमेश खड्काले बताए । शिविरमा अतिरिक्त शुल्क लिएको भन्दै सेवाग्राहीले गुनासो गरेका छन् नि भन्ने जिज्ञासामा खड्काले महावाणिज्यदूतावास सहित पोर्चुगलमा क्रियाशील नेपाली संघसंस्थाको सर्वपक्षीय छलफल र निर्णयबाटै १५ युरो अतिरक्ति शुल्क लिइएको प्रष्ट पारे । “जसमा १० युरो शिविर ब्यबस्थापन खर्च र ५ युरो विपद् व्यवस्थापन कोषका लागि लिइएको हो । यो कसैको ब्यक्तिगत खर्च र लाभका लागि लिईएको रकम होइन । यो शव ब्यबस्थापन लगायत आपद्–विपद् पर्दाका लागि निर्माण गरिएको कोषका लागि लिईएको हो,” खड्काले स्पष्ट पार्दै भने ।
शिविरबाट राहदानीविहीन बनेका र राहदानीकै कारण समस्यामा परेका नेपालीलाई राहत मिलेको पोर्चुगलका लागि अवैतनिक नेपाली महावाणिज्यदूत मकरबहादुर हमालले बताए । शिविरले विशेषतः यहाँको कागजी प्रक्रियामा रहेका तर राहदानी नै नभएका र हराएका नेपालीलाई राहत मिलेको उनले बताए । शिविर अवधि छोटो भएका कारण धेरै नेपालीको समस्या सम्बोधन गर्न नसकिएको उल्लेख गर्दै महावाणिज्यदूत हमालले फेरि छिट्टै टोली ल्याउन पहल गर्ने बताए । अतिरिक्त शुल्कका सम्बन्धमा प्रष्ट्याउँदै हमालले सबै संघ–संस्थाको उपस्थितीमा भएको निर्णय बमोजिम १० युरो शिविर ब्यबस्थापन खर्च र ५ युरो विपद् कोषका लागि लिइएको बताए । शिविर ब्यबस्थापनका लागि लिईएको रकम मध्ये खर्च कटाएर बाँकी रहेको रकम विपद् कोषमा जम्मा गरिने उनले स्पष्ट पारे ।
पोर्चुगलमा नेपाली दूतावास नहुँदा राहदानीसम्बन्धी समस्या झेल्दै आएका नेपालीले शिविरमार्फत सेवा पाउँदा राहतको अनुभूति गरेका छन् । एक सातासम्म सञ्चालन भएको शिविरमा गैरआवासीय नेपाली संघ पोर्चुगलका प्रतिनिधि र यहाँ क्रियाशील नेपाली संघ संस्थाका प्रतिनिधिले समेत समन्वय र सहजीकरण गरेका थिए ।
काठमाडौं : प्रधानमन्त्री पुष्पकमल दाहाल ‘प्रचण्ड’ले सरकार वैदेशिक रोजगारीमा रहेका नेपालीको हक अधिकारका लागि गम्भीर रहेको बताएका छन् । राष्ट्रपति रामचन्द्र पौडेलसमक्ष नेपाल सरकारको आर्थिक वर्ष २०७९/०८० को वार्षिक प्रतिवेदन पेस गर्दै प्रधानमन्त्री दाहालले मिटरब्याजलगायतका सामन्ती शोषणको चक्र अन्त्य गर्न र स्वदेश तथा वैदेशिक रोजगारीमा रहेका श्रमिकको अधिकार संरक्षणमा सरकारले ऐतिहासिक पहलकदमी लिएको उल्लेख गरेका छन् ।
प्रधानमन्त्री दाहालले विगतमा १३ देशमा रहेका नेपाली राजदूतहरूलाई काठमाडौं बोलाएर तीनदिने छलफल गरेका थिए भने श्रम, रोजगार तथा सामाजिक सुरक्षा मन्त्रालयलाई १६ बुँदे निर्देशन दिएका थिए । उक्त निर्देशनपछि वैदेशिक रोजगार विभाग र वैदेशिक रोजगार कार्यालय काठमाडौंमा केही सुधार देखिएको छ ।
प्रधानमन्त्री दाहालले वैदेशिक रोजगारसँग जोडिएका राहदानी, लाइसेन्सलगायत विदेशमा अध्ययनका लागि ‘नो अब्जेक्सन लेटर’ सेवाका लागि घण्टौंसम्म लाइन लाग्नुपर्ने अवस्थाको अन्त्य गरी राज्यले नागरिकलाई प्रदान गर्दै आएका सेवाप्रवाह थप प्रभावकारी, झन्झटमुक्त र सहज बनाएको उल्लेख गरेका छन् ।
प्रधानमन्त्री दाहालले व्यापक सुधार गरेको बताए पनि वैदेशिक रोजगार व्यवसायी संघले सुधारको कुनै अनुभूति नभएको बताएको छ । संघका महासचिव मेघनाथ भुर्तेलले २०७२ सालदेखि भएका व्यवसायी र कामदार विरोधी नीति यथावत रहेसम्म झिनामसिना निर्णयले तात्विक अर्थ नराख्ने भन्दै नेपालले भारत, पाकिस्तान र श्रीलंका जस्ता प्रतिस्पर्धी मुलुकमा रहेको व्यवस्थाअनुरूप नेपालको वैदेशिक रोजगार ऐन र अन्य प्रणालीमा सुधार हुनु जरुरी रहेको बताए ।
व्यवसायीले संघमार्फत वैदेशिक रोजगारमा सरकारले कामदार पठाउने हो वा निजी क्षेत्रले भन्ने प्रष्टताको माग गरेको भन्दै महासचिव भुर्तेलले लागत परिभाषित गरेर सेवा शुल्क निर्धारण, मागपत्र प्रमाणीकरण, लिंगीय विभेद हुने गरिएको महिला तथा घरेलु कामदारको श्रम स्वीकृतिको प्रतिबन्ध, वैदेशिक रोजगार ऐनमा सुधार, पूर्वप्रस्थान अभिमुखीकरण तालिमको शुल्क र जीर्ण अवस्थामा पुगेको वैदेशिक रोजगार सूचना व्यवस्थापन प्रणालीको क्षमता वृद्धि गरी डिजिटलाइजेसन गर्नेजस्ता लामो समयदेखि समाधान नभएका समस्याहरू यथावत रहेसम्म वैदेशिक रोजगारमा सुधार भयो भन्नू आत्मरति मात्रै हुने टिप्पणी गरे ।
एउटा मन्त्रीले एउटा निर्णय गर्ने मन्त्री फेरिएपछि पुरानो निर्णय उल्टाउने शैलीले वैदेशिक रोजगारलाई सधैं असुरक्षित र अमर्यादित बनाउने भन्दै महासचिव भुर्तेलले सरकार र सरकारी निकायहरूले रेमिट्यान्समार्फत नेपाली अर्थतन्त्र धानिएको सत्यलाई आत्मसात गरी सुधारका लागि इमानदार प्रयास नगरेको टिप्पणीसमेत गरे ।
काठमाडौं : श्रम, रोजगार तथा सामाजिक सुरक्षा मन्त्री डोल प्रसाद अर्याल र नेपालका लागि स्वीजरल्याण्डका राजदूत डा. डेनियल मेउलीबीच शिष्टाचार भेटवार्ता भएको छ । बुधबार मन्त्रालयमा नै भएको शिष्टाचार भेटमा विश्व बैंकका नेपाल निर्देशक फारिस हदाद जवीस र फरेन कमनवेल्थ एण्ड डेभलपमेन्ट अफिस (एफसिडिओ)का प्रतिनिधिको पनि सहभागिता रहेको थियो ।
भेटमा नेपालका लागि स्वीस राजदूत डा. डेनियलले प्रधानमन्त्री रोजगार कार्यक्रमअन्र्तगत सञ्चालित रोजगार सेवा केन्द्र सुदृढीकरण कार्यक्रमको बारेमा चर्चा गरे । स्वीस सरकार, अन्तर्राष्ट्रिय श्रम संगठन (आईएलओ), एफसिडिओ तथा विश्व बैंकको सहकार्यमा सञ्चालित यो कार्यक्रम रोजगार सेवा केन्द्रका कर्मचारीहरुको क्षमता विकासमा केन्द्रित छ ।
त्यस्तै विश्व बैंकका नेपाल निर्देशक जवीसले विश्व बैंकको सहयोगमा सञ्चालित ‘युवा रोजगारीका लागि रुपान्तरण पहल अयोजना’ (यति)को अवधि थप गर्न विश्व बैंक इच्छुक रहेको जानकारी दिए । आयोजनामार्फत नेपालको आन्तरिक रोजगारी प्रवद्र्धन, सीप विकासका कार्यक्रमहरु सञ्चालन, राष्ट्रिय रोजगार व्यवस्थापन सूचना प्रणालीको निर्माण, स्थानीय तहमा रहेका रोजगार सेवा केन्द्रमा कार्यरत कर्मचारीहरुको क्षमता विकास गरी एकीकृत श्रम रोजागर सेवालाई थप प्रभावकारी बनाउन विश्व बैंक प्रतिबद्ध रहेको उनको भनाइ थियोे । त्यस्तै नतिजामुखी कार्यका लागि वातावरण निर्माण गर्दै नेपालमा सुरक्षित, मर्यादित श्रम तथा उत्पादनशील र दिगो रोजगारीमार्फत नेपालको आन्तरिक रोजगारी प्रवद्र्धनमा सहयोग गर्ने बताएको मन्त्रालयले जनाएको छ ।
भेटमा श्रममन्त्री अर्यालले आन्तरिक रोजगारीलाई प्रवद्र्धन गर्न विकास साझेदारहरुको महत्वपूर्ण भूमिका रहेको बताउँदै आगामी दिनमा नेपाल सरकारले न्यूनतम ज्यालामा आधारित रोजगारी सिर्जनामा मात्र सीमित नभइ श्रम बजारको मागका आधारमा सीप विकासमा लगानी गर्ने उल्लेख गरे । मन्त्री अर्यालले सीपयुक्त जनशक्तिको निर्माण गरी सक्रिय श्रम बजारको स्थापना, स्वरोजगारी र उद्यमशीलतामा प्रवद्र्धन गर्दे राष्ट्रिय तथा अन्तर्राष्ट्रिय रोजगारीका अवसरहरु सिर्जना गर्ने वातावरण निर्माण गरिने प्रतिबद्धता व्यक्त गरे ।
२०२० जुन ३० देखि विश्व बैंकको सहयोगमा मन्त्रालयले यति परियोजना सञ्चालन गर्दै आएको छ । यस परियोजनामार्फत विश्व बैंकले नेपालमा आन्तरिक रोजगारीको सिर्जना गर्ने, श्रमिकको सीप विकास गर्ने, श्रम बजारको नतिजामा सुधार तथा राष्ट्रिय रोजगार व्यवस्थापन सूचना प्रणाली (नेमिस) निर्माण गर्ने प्रतिबद्धता व्यक्त गरेको छ । आगामी जुन महिनामा यस परियोजनाको अवधि सकिँदैछ ।
काठमाडौं : वैदेशिक रोजगारीका नाममा बेचिन लागेका पाँच महिलाको उद्धार गरिएको छ । मानव बेचबिखन अनुसन्धान ब्यूरोले विदेश जाने बहानामा बेचिनबाट जोगिएका ती महिलालाई उद्धार गरी अहिले आवश्यक परामर्श गरिरहेको र उक्त घटनाको अनुसन्धान पनि थालिएको जनाएको छ ।
ब्यूरोका प्रवक्ता एवं प्रहरी उपरीक्षक ज्ञानेन्द्रप्रसाद फुँयालले उनीहरुलाई गिरोहले विदेश पठाउने भनेर काठमाडौंको गौशालास्थित एक होटलमा राखिएको अवस्थाबाट उद्धार गरिएको जानकारी दिए ।
बहाना वैदेशिक रोजगारीको भए पनि उनीहरुलाई तेस्रो मुलुक लगेर बेचबिखन गर्न लागिएको पत्ता लागेपछि उद्धार गरिएको उनले बताए । प्रारम्भिक अनुसन्धानमा आकर्षक तलब पाउने लोभ देखाएर उनीहरुलाई विदेशमा बेचबिखन गर्न लागिएको पाइएको प्रहरीले जनाएको छ ।
उक्त घटनामा संलगन रहेको आरोपमा प्रहरीले दुई जनामाथि अनुसन्धान गरिरहेको छ । ती गिरोहले यसअघि पनि केही महिलालाई विदेश पठाउने बहानामा बिक्री गरेको पाइएपछि उनीहरुलाई उद्धार गरिएको हो । महिला बेचबिखनमा संलग्नमध्येका गणेशबहादुर कटुवाललाई यही चैत २ गते काठमाडौंको टोखा नगरपालिका– ५ बाट ब्यूरोले पक्राउ गरेकोे थियो ।
उनीसँग सोधपुछ तथा अनुसन्धानका क्रममा सोही घटनामा संलग्न रहेको पाइएपछि फरार भएका आरोपीमध्ये ५८ वर्षका लक्ष्मीप्रसाद निला सिटौलालाई मंगलबार चैत २० गते काठमाडौंबाटै पक्राउ गरिएको हो । उनीहरुसँगको बयानका तथा थप अनुसन्धान गर्दै जाँदा त्यसरी विदेश पठाउने लोभ देखाएर थप पाँच महिलाहरुलाई पनि बेचबिखनमा संलग्न गराउनका लागि होटलमा राखेर आवश्यक प्रक्रिया अघि बढाइएको जानकारी प्राप्त भएपछि प्रहरी टोली गौशालाको होटलमा पुगेको थियो ।
“सिटौलालाई पक्राउ गर्ने क्रममा उनले भ्रमण भिसामा दुबई हुँदै खाडी मुलुकहरुमा घरेलु कामदारको रुपमा आकर्षक तलब सुविधाको काममा लगाइदिने प्रलोभन देखाइ थप पाँच जना महिलाहरुलाई लैजाने तयारी गरेको पाइएपछि तत्कालै होटलबाट उनीहरुलाई उद्धार गरिएको हो”, प्रहरी उपरीक्षक फुँयालले भने । उद्धार गरिएकाहरुसँग आज थप जानकारी लिने तथा घटनाको थप अनुसन्धानका काम जारी रहेको ब्यूरोले जनाएको छ ।
काठमाडौं : रोजगारीका लागि मलेसिया जाँदा म्यानपावर कम्पनीलाई आफन्त र साथीभाइले ठूलो रकम खर्च गरेको देखेका धनुषाका नथुनी धानुक आफू जाने बेलामा म्यानपावर कम्पनीले उल्टै बैंक एकाउन्टमा १५ हजार पठाएपछि छक्क परे ।
उनीमात्रै नभइ फ्युजन इन्टरनेशनल प्रा.लि.बाट मलेसियाको सेलङ्गोर राज्यमा रहेको नेचर ग्रिन एसडीएन बिएसडी कम्पनीमा जान लगेका अन्य २२ जना पनि शून्य लागतमा जान पाउँदा खुसी थिए ।
उक्त रकम मेडिकल गर्दा लागेको ९ हजार ८ सय ९० रुपैयाँ, अन्तर्वार्ताका लागि आउँदा जाँदा र तीन दिन काठमाडौंमा बस्दाको ४ हजार ४ सय १४ रुपैयाँ र अभिमुखीकरण तालिमलगायतमा कामदारले गरेको खर्चअन्तर्गत कम्पनीले फिर्ता गरेको रकम हो ।
वैदेशिक रोजगारीका लागि मलेसिया जानुअघि मंगलबार रोजगारदाता कम्पनीले जुममार्फत ‘कसैले भर्ना प्रक्रियामा राहदानी बनाउनेबाहेक कुनै रकम खर्च गरेको भए भन्नू’ भनेर प्रश्न राख्दा कसैले कुनै रकम खर्च नगरेको बताएका थिए । फ्युजन इन्टरनेशनल प्रा.लि.का सञ्चालक कुमुद खनालले प्लाष्टिकका सामान उत्पादन गरी युरोपेली बजारमा सप्लाइ गर्ने नेचर ग्रिन एसडीएन बिएसडीबाट फ्याक्ट्री वर्करअन्तर्गत आएको शून्य लागतको डिमाण्डमा मंगलबार दोस्रो समुह पठाएको बताए ।
उनले शून्य लागतमा जाने कामदार छनोट प्रक्रियामा धेरै सावधानी अपनाउनुपर्ने देखिएको अनुभव पनि सुनाए । सबै मासिक न्यूनतम १५ सय रिंगेट तलबमा गएका हुन् । म्यानपावर सञ्चालक खनालले ओभरटाइमको धेरै चर्चा हुने गरे पनि दाबी गरेर आन्दोलन र हडताल नगर्न उनीहरूलाई आग्रह गरे ।
त्यस अवसरमा इशारा नेपालकी अनुजा रिमाल, सुरक्षित आप्रवासनका लागि राष्ट्रिय सञ्जाल (एनएनएसएम)का निवर्तमान अध्यक्ष हरि थापा, इप्यान अध्यक्ष लक्ष्मण भट्टराई, मध्यान्ह दैनिकका पत्रकार रेशम राज पौडेलले शून्य लागतमा जाने कामदारको जिम्मेवारी, उपलब्धि र दायित्वका बारेमा जानकारी गराएका थिए ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies