काठमाडौं : परराष्ट्र मन्त्रालयअन्तर्गत नेपाली दूतावासले मागपत्र प्रमाणीकरण नगर्दा युरोपेली मुलुकमा रहेको आकर्षक रोजगारी गुम्न पुगेको छ । परराष्ट्र मन्त्रालयमा नारायण प्रसाद (एनपी) साउद आएपछि रोकिएको युरोपेली मुलुकको मागपत्र प्रमाणीकरणको कार्य सुचारु हुन नसक्दा युरोपको रोजगारी अवसर गुमेको हो ।
वैदेशिक रोजगारका मागपत्र प्रमाणीकरण जाँचबुझसम्बन्धी निर्देशिका २०७५ मा विदेशस्थित नेपाली दूतावास वा कुटनैतिक नियोगले मागपत्र प्रमाणीकरण गरी वैदेशिक रोजगार सूचना व्यवस्थापन प्रणाली (फेमिस)मा अनिवार्यरूपमा अपलोड गर्नुपर्ने व्यवस्था छ ।
नेपाल वैदेशिक रोजगार व्यवसायी संघले युरोपमा नेपाली युवायुवतीको योग्यता र क्षमताअनुसार ४० हजार रोजगारीका अवसर रहेको र मागपत्र प्रमाणीकरण नहुँदा आकर्षक तलब सुविधासहितको रोजगारी गुमेको बताउँदै आएको छ । युरोपका सबै मुलुकमा नेपाली दूतावास छैनन् । हाल युरोपका जर्मनी, अस्ट्रिया, फ्रान्सजस्ता केही मुलुकमा दूतावास रहेका छन् । ती दूतावासहरूले सम्बन्धित देशसहित थप आठ/दश मुलुक हेर्नुपर्ने बाध्यता रहेको छ ।
यी दूतावासलाई मागपत्र प्रमाणीकरणका लागि वैदेशिक रोजगार व्यवसायीले पटक–पटक अनुरोध गरेका छन् भने श्रम, रोजगार तथा सामाजिक सुरक्षा मन्त्रालयले पनि पटक–पटक पत्राचार गरेको छ । तर युरोपेली मुलुकमा रहेका दूतावासहरू मागपत्र प्रमाणीकरण गर्नुभन्दा स्रोतसाधन नभएको भन्ने प्रतिक्रिया दिएर जिम्मेवारीबाट भाग्ने गरेका छन् ।
तत्कालीन परराष्ट्रमन्त्री साउदको कार्यकालमा मागपत्र प्रमाणीकरण गर्ने विषयमा हाल परराष्ट्र मन्त्रालयको शिष्टाचार प्रमुख रहेका तत्कालीन युरोप महाशाखा प्रमुख दिलिप कुमार पौडेल र वैदेशिक रोजगार व्यवसायीबीच तत्कालीन मन्त्री साउदको कार्यकक्षमा “तँ तँ र म म” को शैलीमा भनाभन भएको थियो ।
उनले नेपालीहरू व्यक्तिगत प्रयासमा जान पाउनुपर्ने तर्क गर्दै दूतावासहरूले व्यवसायीले भनेअनुसार मागपत्र प्रमाणीकरण गर्नु आवश्यक नभएको भनाइ राखेपछि तत्कालीन मन्त्री साउद पौडेलकै भनाइमा लागेर निष्क्रिय बन्दा हालको अवस्था आएको प्रगतिशील वैदेशिक रोजगार व्यवसायी मञ्च नेपालका अध्यक्षसमेत रहेका रावल ईण्टरनेशनल प्रा.लि.का संचालक जनक रावलले बताए । कतिपय वैदेशिक रोजगार व्यवसायीले पौडेलको एजुकेसन कन्सल्याट्यान्सीसँग साँठगाँठ रहेकाले व्यक्तिगत प्रयासमा जान पाउनुपर्ने अडानमा पौडेल रहेको दाबीसमेत गर्ने गरेका छन् ।
परराष्ट्र मन्त्रालयले मागपत्र प्रमाणीकरण गर्ने विषयमा असहयोग गरेपछि श्रम मन्त्रालयले युरोपको अवसर गुम्न नदिन नेपालमै परराष्ट्र मन्त्रालय र श्रम मन्त्रालयका अधिकारीको संयुक्त कार्यसमिति बनाए मागपत्र प्रमाणीकरण गर्ने योजना बनाइ दूतावासले १५ दिनभित्र प्रमाणीकरण नगरेका माग प्रति पेश गर्न सूचना नै जारी गरेको थियो । तर परराष्ट्र मन्त्रालयलाई नचिढ्याउने बरू समन्वय गर्ने भन्दै श्रम मन्त्रालय आफ्नो निर्णयबाट पछि हटेको थियो ।
नेपाल वैदेशिक रोजगार व्यवसायी संघको युरोपेली मुलुकका समस्या हेर्ने कार्यसमिति सदस्य सोम लामाले हाल छापिएका पूर्वस्वीकृति करिब ८ महिना अगाडिको मागपत्र र केही पुनः विज्ञापन भएका मागपत्र रहेको भन्दै युरोपेली मुलुकको मागपत्र प्रमाणीकरण बन्दको अवस्थामा रहेको बताए ।
युरोपेली मुलुकमा पारिश्रमिक, सेवासुविधा तथा सुरक्षा खाडी मुलुकभन्दा धेरै गुणा राम्रो मानिन्छ । खाडी र मलेसियामा निर्भर वैदेशिक रोजगारीलाई युरोप सिफ्ट गर्नुपर्छ भनेर तत्कालीन श्रममन्त्री शरतसिंह भण्डारीले पटक–पटक सार्वजनिक अभिव्यक्ति दिएका थिए । तर परराष्ट्र मन्त्रालयको निरन्तरको असहयोग हालपनि यथावत रहेकाले नेपाली युवायुवती खाडी र मलेसियाका असुरक्षित गन्तव्यमा जान अभिसप्त रहेको वैदेशिक रोजगार व्यवसायीहरु बताउँछन् ।
भरत प्रधान/मध्यान्ह
लिस्बन : पोर्चुगलमा राहदानी सम्बन्धी समस्यामा परेका नेपालीलाई राहदानी सेवा दिन शुरु गरिएको छ । लिस्बनस्थित अवैतनिक नेपाली महावाणिज्यदूतावासको समन्वय र सहजीकरणमा नेपाली दूतावास फ्रान्सबाट आएको टोलीले आइतबारबाट राहदानी सेवा दिन शुरुवात गरेकोे हो । दूतावासकी नियोग उपप्रमुख सीता बस्नेत नेतृत्वको टोलीले राजधानी लिस्बनमा इनरोलमेन्ट सेन्टरको स्थापना गरी विद्युतीय राहदानीका लागि दरखास्त संकलन गर्न शुरु गरेको हो ।
आइतबार पहिलो दिन राहदानीको म्याद सकिसकेका, क्षति भएका, राहदानी हराएका, पोर्चुगलको अध्यागमन निकाय (आइमा)मा बायोमेट्रिकका लागि समय लिइसकेका र पोर्चुगलमा जन्मेका बालबालिकाका गरी ५४ जनाको विद्युतीय राहदानीका लागि जैविक तथ्यांक संकलन गरिएको टोलीले जनाएको छ ।
टोलीले राहदानी हराएका, क्षति भएका, २०२३ डिसेम्बर ३१ सम्म म्याद सकिएका, पोर्चुगलको अध्यागमन निकाय (आइमा)मा २०२४ अप्रिल ३० सम्म बायोमेट्रिकका लागि समय लिइसकेका तथा पोर्चुगलमा जन्मेका बालबालिकाको प्राथमिकताका आधारमा विद्युतीय राहदानीका लागि जैविक तथ्यांक संकलन गर्ने टोली प्रमुख एवं नेपाली दूतावास, फ्रान्सका नियोग उपप्रमुख सीता बस्नेतले जानकारी दिइन् ।
शिविर अवधिभर दैनिक एक सय जनाका दरले सात सय जनाको विद्युतीय राहदानीका लागि दरखास्त संकलनको लक्ष्य रहेको बस्नेतले बताइन् । टोलीले प्राथमिकताका आधारमा जैविक तथ्यांक संकलनका लागि आवेदकको नामावली प्रकाशित गर्ने जनाउँदै उनले सोही बमोजिम इनरोलमेन्ट सेन्टरमा उपस्थित हुन आवेदकलाई आग्रह समेत गरेकी छिन् ।
पोर्चुगलमा राहदानीविहीन बनेका, राहदानी नभएकै कारण समस्यामा परेका र पोर्चुगलको अध्यागमन निकाय (आइमा)मा बायोमेट्रिकको समय लिएका लगायत राहदानीको अत्यावश्यक परेकाका लागि तत्कालको राहतका लागि दूतावासले शिविरको व्यवस्था गरेको नियोग उपप्रमुख बस्नेतले बताइन् ।
एक सातासम्म सञ्चालन हुने राहदानी सेवा शिविरमा गैर आवासीय नेपाली संघ पोर्चुगलसहित यहाँ क्रियाशील नेपाली संघ–संस्थाले समन्वय र सहजीकरण गरेका छन् ।
टोलीले आगामी मार्च ३१ सम्म राजधानी लिस्बनमा रहेर राहदानी सेवा प्रवाह गर्ने जनाएको छ । गत वर्ष पनि फ्रान्सस्थित नेपाली दूतावास र राहदानी विभाग काठमाडौंको टोली आएर राजधानी लिस्बनमा करिब एक महिनासम्म राहदानीसम्बन्धी सेवा प्रदान गरेको थियो ।
काठमाडौं : वैदेशिक रोजगार व्यवसायी रामध्वज लामा नेपाली कांग्रेस बागमती प्रदेश वैदेशिक रोजगार समन्वय विभागको सदस्यमा मनोनीत भएका छन् ।
नेपाली कांग्रेस बागमती प्रदेश कार्यसमितिका सभापति इन्द्र बानियाँले वैदेशिक रोजगार समन्वय विभागको सदस्यहरू मनोनीत गर्ने क्रममा काभ्रे जिल्ला, तेमाल गाउँपालिका वडा नं. २, निवाली शाल्मा एच. आर. ओभरसिज प्रा.लि. का प्रबन्ध निर्देशक लामालाई मनोनीत गरेका हुन् । लामा तरुण दल काभ्रे प्रदेश सभा १ का सभापति पनि हुन् ।
गत शुक्रबार जारी विज्ञप्तिअनुसार सभापति बानियाँले बागमती प्रदेश वैदेशिक रोजगार समन्वय विभागमा २३ सदस्य मनोनीत गरेका छन् ।
नेपाली कांग्रेसको प्रदेश कार्यसमितिका सदस्य सविन तामाङ प्रमुख रहेको सो विभागका मनोनीत अन्य सदस्यहरुमा संगम थापा, अर्जुन ढकाल, टिका शिवाकोटी, टिकाराम खरेल, सुवास रानाभाट, ध्रुव अधिकारी, पुष्पा कुमारी पौडेल, नरेन्द्र डंगोल, विकास धिताल, प्रदीप खड्का, रामलाल नेपाल, पुष्कर पौडेल, मिना पाठक, बद्रिराम मानन्धर, समिर सुनुवार, तुलाराज थापा, हेमन्त फुयाल, नविन लामा, सुरेश गोतामे, मिना प्रसाद दुलाल, शिवहरि विष्ट र उपेन्द्र तामाङ रहेका छन् ।
मलेसिया : मलेसियामा नेपाली सुरक्षागार्डले फेला पारी प्रहरीलाई बुझाएको ५ लाख रिंगेटका धनी फेला परेका छैनन् । मलेसियाको दमनसाराको एक सपिङ सेन्टरको पार्किङमा भेटिएको उक्त रकमबारे शुरूमा एक सूचना प्रविधि कम्पनीले आफ्नो व्यापारको रकम भन्दै दाबी गरेपनि सेलान्गोरका प्रहरी प्रमुख हुसेन ओमर खानले कम्पनीका निर्देशकबाट उक्त रकमबारे प्रमाणसहित बयानका लागि बोलाउँदा अलमल गरेको र अस्वस्थ भएको जस्ता विभिन्न बहाना बनाएको बताए ।
प्रहरीले सपिङ सेन्टरबाट सीसीटिभी क्यामरा (क्लोज–सर्किट टेलिभिजन फुटेज) हेर्दा क्यामराले सुटकेस भेटिएको क्षेत्रलाई कभर नगरेको पाइएको थियो । मलेसियामा कुनै व्यक्ति वा पक्षले रकम दाबी नगरे प्रहरीले थप कारबाहीका लागि अदालतमा बुझाउने कानूनी व्यवस्था छ ।
मलेसियाको ए–फाइभ सेक्युरिटी सर्भिसेज कम्पनीमा कार्यरत नेपाली सुरक्षागार्ड दावा शेर्पाले कसैले भुलबस छोडेको ५ लाख मलेसियन रिंगेट करिब डेढ करोड नेपाली रुपैयाँ भएको झोला इमानदारीसाथ प्रहरी कार्यालयमा बुझाएका थिए । उनको इमानदारिताको उच्च कदर गर्दै रोजगारदाता कम्पनीले प्रशंसापत्र, उपहार र पुरस्कारसहित उनलाई सम्मानित गरेको थियो । त्यसले मलेसियामा नेपाली सुरक्षागार्ड अर्थात ‘गोर्खा’प्रतिको विश्वसनीयता थप बढाएको छ ।
काठमाडौं : प्रगतिशील वैदेशिक रोजगार व्यवसायी मञ्च नेपालले जोरपाटीस्थित अपांग पुनर्स्थापना केन्द्रमा आश्रित बालबालिकासँग यस वर्षको फागु पूर्णिमा अर्थात होली मनाएको छ । मञ्चले केन्द्रमा आश्रित बालबालिकाका लागि ‘ह्याप्पी होली’ अंकित टिसर्ट, आइतबार बिहानको खानासहित ६६ हजार ६ सय रूपैयाँ प्रदान गरेको छ ।
उक्त केन्द्रमा आयोजित संक्षिप्त कार्यक्रममा मञ्चका अध्यक्ष जनक रावलले संस्थाका अध्यक्ष उदय बहादुर लिम्बूलाई ६६ हजार ६ सय रूपैयाँको चेक हस्तान्तरण गरे । चेक हस्तान्तरण गर्दै मञ्चका अध्यक्ष रावलले व्यवसायीको सामाजिक उत्तरदायित्वको सिद्धान्त अन्तर्गत अपांग पुनर्स्थापना केन्द्रलाई सहयोग गरिएको र भविष्यमा पनि सहयोग जारी रहने बताए ।
रावलले बालबालिकाको शिक्षा, भोजन तथा मनोरञ्जन कार्यक्रम लिएर आएको बताउँदै केन्द्रमा अभिभावकविहीन अवस्थामा रहेका बालबालिकालाई भविष्यका दिनमा पनि सहयोग गरिरहने बताए ।
वैदेशिक रोजगार व्यवसायी संघका प्रथम उपाध्यक्ष डिक बहादुर खत्रीले आश्रित बालबालिकाको उज्ज्वल भविष्यका लागि गरेको कार्यप्रति मञ्च तथा केन्द्रलाई शुभकामना व्यक्त गरे ।
केन्द्रका अध्यक्ष लिम्बूले आश्रित बालबालिकालाई गरेको सहयोगका लागि मञ्चप्रति आभार व्यक्त गरे । उनले सरकारी विद्यालयमा अपांगमैत्री संरचना नभएकाले निजी विद्यालयमा पढाउनुपर्ने बाध्यताले गर्दा दाताहरूको आवश्यक रहेको बताए ।
उनले मञ्चले गत वर्ष होलीको अवसरमा प्रदान गरेको सहयोग अपांग बालबालिकाको शिक्षामा लगानी गरिएको जानकारी दिए । लिम्बूले आफ्नो संस्थाले अध्ययन गराएका ६ जना बालिका नर्स बनेर विभिन्न अस्पतालमा सेवा गरिरहेको पनि जानकारी दिए ।
त्यस अवसरमा मञ्चमा आवद्ध व्यवसायीले एकआपसमा अवीर तथा रंग लगाइ खुसी साटासाट गरेका थिए । कार्यक्रममा मञ्चका पदाधिकारी तथा सदस्यहरूसहित नेपाल वैदेशिक रोजगार व्यवसायी संघका प्रथम उपाध्यक्ष खत्री र द्वितीय उपाध्यक्ष सञ्जु गुरूङ, कार्यसमिति सदस्य सोम लामा तथा पुनर्स्थापना केन्द्रका अध्यक्ष लिम्बू, संस्थाका पदाधिकारी र कर्मचारीलगायतको सहभागिता रहेको मञ्चका कोषाध्यक्ष शीतल मैनालीले जानकारी दिए ।
तिलोचन गौतम/मध्यान्ह
क्वालालम्पुर : एक जना नेपाली सुरक्षागार्डले आफ्नो पेशाप्रतिको इमान्दारिता र निष्ठा कायम गर्दा मलेसियामा सिंगो नेपाली समुदाय र सुरक्षागार्डको प्रतिष्ठा बढाएको छ । ड्युटीमा इमान्दारिता र निष्ठा कायम गर्ने नेपाली सुरक्षागार्ड व्यक्तिगतरूपमा रोजगारदाता कम्पनीद्वारा सम्मानित भएका छ्न् भने त्यसले मलेसियामा नेपाली सुरक्षागार्ड अर्थात ‘गोर्खा’प्रतिको विश्वसनीयता थप बढाएको छ ।
नेपाली गोर्खा सैनिकहरूले प्रथम र दोस्रो विश्वयुद्धमा आफ्नो ज्यानको बाजी लगाएर देखाएको साहस, वीरता र इमानदारिताबाट प्रभावित मलेसियाले सुरक्षागार्ड नेपालबाट मात्रै लिने निर्णय गरेको छ । पछिल्लो पटक गत हप्ताको घटनाले मलेसियामा नेपाली सुरक्षागार्डको छवि थप उज्यालो बनेको छ ।
मलेसियाको दामानसारामा अवस्थित एक सपिङ मलमा कार्यरत नेपाली सुरक्षागार्ड दावा शेर्पाले कसैले भुलबस छोडेको ५ लाख मलेसियन रिंगेट करिब डेढ करोड नेपाली रुपैयाँ भएको झोला इमानदारीसाथ प्रहरी कार्यालयमा बुझाएबापत उनको इमानदारिताको उच्च कदर गर्दै रोजगारदाता कम्पनीले प्रशंसापत्र, उपहार र पुरस्कारसहित सम्मानित गरेको छ ।
३९ वर्षीया दावा विगत ४ वर्षदेखि ए–फाइभ सेक्युरिटी सर्भिसेज कम्पनीमा आबद्ध रही काम गर्दै आएका थिए । उनी बौद्ध महॉकालस्थित ए एन एस एसोसिएट्स प्रा.लि. बाँट सुरक्षा गार्डमा मलेसिया गएका थिए । सुरक्षागार्ड कम्पनीका निर्देशक हरदीप सिंहले ‘परिस्थितिलाई सम्हाल्ने तरिका र प्रक्रिया अपनाएकोमा दावाप्रति आफूले गर्व गरेको बताए । उनले भने, ‘हामी उनको इमानदारिताको धेरै प्रशंसा गर्छौं । झोलामा रहेको ठूलो रकम सुरक्षितरूपमा प्रहरीलाई जिम्मा लगाउने उहाँको कामका लागि हामी कृतज्ञ छौं, त्यसैले हामी उहाँलाई पुरस्कृत गर्दैछौं ।’
निर्देशक हरदीपले दावालाई कम्पनीको उत्कृष्ट सुरक्षागार्डको रूपमा प्रशंसा गरे । उनले दावा आगामी वर्षसम्म साथमा रहने विश्वास व्यक्त गरे । उनले भने, ‘मलाई आशा छ कि हामीले उहाँको यहाँ बस्न मिल्ने अनुमतिपत्र भिसा विस्तार गरेर थप गर्न सक्छौं, हामीलाई उहाँजस्ता इमानदार मानिसहरू चाहिन्छ ।’
दावाले दमनसराको सपिङ मलमा ड्युटीमा रहेको बेला पैसाले भरिएको झोला फेला परेपछि आफूले कम्पनीमा लिएको तालिम र तालिममा सिकेको कुरो याद आएको सम्झिँदै प्रहरीलाई जिम्मा लगाएको बताए । उनले भने, ‘मैले झोलामा कति रकम छ भनेर पनि सोचिनँ, मैले मेरो ड्युटीको काम पूरा गरें ।’
सेलाङ्गर राज्यका प्रहरी प्रमुख हुसेन ओमर खानले दावाको प्रशंसा गर्दै उनले बिना विलम्ब स्थानीय समयअनुसार बिहान ८ बजे नै सपिङ मलको कार पार्कमा सुटकेस फेला पारेको रिपोर्ट दिएको बताए । फेला परेको उक्त रकम गुमाउनेले प्रमाण पुर्याएर प्रहरी चौकीमा निवेदन दिए रकम फिर्ता पाउने, तर कसैले सो रकम दाबी नगरेमा भने कारबाहीका लागि अदालतमा बुझाइने प्रहरी प्रमुख खानले बताए ।
इसत्याक अहमद/मध्यान्ह
काठमाडौं : नेपालका लागि यूएईका राजदूत अब्दुल्लाह जरवान अल् शम्सीले नेपालको विकास, निर्माण र शैक्षिक क्षेत्रको उन्नतिका लागि सहयोग गर्न यूएई इच्छुक रहेको बताएका छन् । मुस्लिम आयोग र नेपालस्थित यूएई दूतावासको संयुक्त आयोजनामा होटल याक एण्ड यतिमा शनिबार सम्पन्न इफ्तार डिनर कार्यकममा राजदूत शम्सीले उक्त धारणा राखेका हुन् ।
प्रत्येक मुस्लिम हिज्री संवतको नवौं महिना रमजानमा महिनाभर ब्रत बस्ने प्रचलन छ । उनले इस्लाम धर्मका पाँच स्तम्भमध्ये रमजान महिनामा हुने ब्रतले ब्रतालुलाई संयमता र नैतिक शिक्षाको प्रयोगात्मक प्रशिक्षण प्रदान गर्ने बताए ।
मुस्लिम समुदायले यो महिनाभर बढीभन्दा बढी उपासना, दान, कुरआन पाठ आदि गर्छन् । महिनाभर एक–अर्का ब्रतालुहरुलाई साँझ इफ्तारमा निम्तो दिने गर्छन् । नेपालस्थित मुस्लिम राष्ट्रका दूतावासहरूले पनि इफ्तार डिनर गराउने गर्छन् । साँझ सूर्यास्त हुनासाथ ग्रहण गरिने भोजनलाई अरबीमा इफ्तार भनिन्छ ।
राजदूत शम्सीले यूएई–नेपालबीचको सम्बन्ध राम्रो रहेको र आगामी दिनमा विभिन्न कार्यक्रम र योजनामार्फत संयुक्तरूपमा काम गर्दै अगाडि बढ्ने बताए । यूएईले विकास निर्माण, शिक्षा र सामाजिक क्षेत्रमा काम गर्दै आएको बताए । उनले वैश्विक स्तरमा भएका समस्याहरूको न्यूनीकरण र दीगो विकासको क्षेत्रमा यूएईले ठोस कदमहरू उठाएको बताए ।
पर्यावरणलगायतको वैश्विक चासोका विषयमा यूएई सरकार गम्भीर भइ काम गरिरहेको भन्दै राजदूत शम्सीले यूएईले वैकल्पिक उर्जाको क्षेत्रलाई विकासको वैकल्पिक मार्ग बनाउँदै लगेको बताए ।
यूएई धार्मिक सहिष्णु मुलुक भन्दै राजदूत शम्सीले धार्मिक सद्भावका लागि यूएईले हिन्दूका लागि मन्दिर, इसाइका लागि चर्च आदि निर्माण गरेको उनले बताए । त्यस्तै उनले यूएईमा हुने विश्व कुरआन पाठ प्रतियोगितामा नेपाली हाफिजहरू पनि भाग लिइरहेको जानकारी दिए ।
स्वागत मन्तव्य राख्दै मुस्लिम आयोगका अध्यक्ष समिम मियाँ अन्सारीले नेपाल–यूएई सम्बन्ध गहिरिँदै गएको बताउँदै यसलाई थप मजबुद बनाउन मुस्लिम आयोगले थप भूमिका खेल्ने बताए ।
उपराष्ट्रपति रामसहाय यादवको प्रमुख आतिथ्यतामा सम्पन्न इफ्तार कार्यकममा रक्षामन्त्री हरिप्रसाद उप्रेती, राष्ट्रिय सभाका निवर्तमान अध्यक्ष गणेश तिमिल्सिना, पूर्वमन्त्री मोहम्मद जाकिर हुसैन, पूर्वसांसद रुही नाज, नेपालस्थित विभिन्न दूतावासका कूटनीतिक अधिकारी र सयौं मुस्लिम अगुवा तथा बुद्धिजीवीहरूको उपस्थिति रहेको थियो ।
काठमाडौं : प्रहरीले बंगलादेशी नागरिकहरूलाई वैदेशिक रोजगारीका लागि विभित्र युरोपियन मुलुक पठाउने भनि नेपाल ल्याइ बन्धक बनाइ राख्ने कार्यमा संलग्न चार बंगलादेशी नागरिकलाई पक्राउ गरेको छ ।
बंगलादेशी नागरीकहरूलाई वैदेशिक रोजगारको लागि क्यानडा, इटालीलगायतका देशहरूमा पठाइदिने विश्वास दिलाइ बंगलादेशबाट नेपाल ल्याएर काठमाडौंको पनकनाजोलस्थित निभाना ग्रिन पिस होम होटलमा राखी पासपोर्ट नियन्त्रणमा लिइ ठगी गरिरहेको अवस्थामा चार बंगलादेशी नागरिकलाई पक्राउ गरिएको प्रहरीले बताएको छ ।
प्रहरीले बंगलादेशको ढाका निवासी नुरूल हुडा, शमिम अहमीद, मोहम्म मशुल विल्लाह र पोर्नाय कुमार देलाई पक्राउ गरिएको बताएको छ । उनीहरूले विभिन्न प्रलोभनमा नेपाल ल्याएका बंगलादेशीहरूलाई अनेकौं धाकधम्की दिइ कुटपिट गर्नुका साथै आफन्तसँग सम्पर्क गर्न नदिइ साथमा रहेको नगदसमेत लिइ जबरजस्ती बन्धक बनाइ राखेको प्रहरीले बताएको छ । प्रहरीले पक्राउ परेका बंगलादेशीहरूलाई अपहरण तथा शरीर बन्धक लिन नहुने कसुरमा आवश्यक अनुसन्धान तथा कारबाहीका लागि मुद्दा चलाउन जिल्ला प्रहरी परिसर, टेकु, काठमाडौंमा पठाइएको बताएको छ ।
यता बेरोजगार युवायुवतीलाई आकर्षक तलबको प्रलोभनमा पारी वैदेशिक रोजगारीमा पठाउने भनि रकम उठाएर सम्पर्कविहीन भएका थप पाँच नेपालीलाई पनि प्रहरीले पक्राउ गरी थप अनुसन्धान तथा कारबाहीका लागि वैदेशिक रोजगार विभाग ताहाचल, काठमाडौं पठाइएको प्रहरीले बताएको छ ।
जितमाया बललाई वैदेशिक रोजगारीमा न्युजिल्याण्ड पठाउने आश्वासन दिएर ९० हजार रुपैयाँ ठगी गरेको उजुरीका आधारमा सिन्धुपाल्चोकको मेलम्ची घर भइ हाल बौद्ध बस्ने युवराज सापकोटा, कुमार खड्कालाई मकाउ पठाउने आश्वासन दिएर ३ लाख ९३ हजार रुपैयाँ ठगी गरेको उजुरीका आधारमा काठमाडौंको बुढानिलकण्ठकी १९ वर्षीय श्रुती शाही र ३५ वर्षीय मन्दिरा बोम्जन गुरुङ, कृष्ण चन्दसमेत ३ जनालाई दक्षिण कोरिया पठाउने भन्दै ५ लाख ७१ हजार रुपैयाँ लिएको उजुरीका आधारमा कैलालीको टिकापुरकी अस्मिता बम र राम माया तामाङलाई कतार पठाइदिने आश्वासनमा ५० हजार रुपैयाँ ठगी गरेको उजुरीका आधारमा सुनसरी भोक्राहाकी अनिता कुमारी यादवलाई पनि पक्राउ गरिएको प्रहरीले बताएको छ ।
विगतमा हप्ताको दुई–चार वटा व्यक्तिगत ठगीको उजुरी दर्ता हुने वैदेशिक रोजगार विभागमा हाल एकैदिन करोड बढी बिगो उल्लेख भएर डेढ दर्जन उजुरी दर्ता हुने गरेका छन् । शैक्षिक कन्सल्ट्यान्सीबाट ठगीको धन्दा व्यापकरूपमा बढेको प्रहरीले बताएको छ ।
राजधानीमा सञ्चालित दर्जनौं शैक्षिक कन्सल्ट्यान्सीलाई प्रहरीले पटक–पटक कारबाही चलाउँदै आएको भएपनि कन्सल्ट्यान्सीबाट वैदेशिक रोजगारको नाममा ठग्ने धन्दा नरोकिएको वैदेशिक रोजगार विभागमा खटिएको प्रहरीले बताएको छ ।
वैदेशिक रोजगारीका लागि जापान, युरोपेली मुलुक, अमेरिका र क्यानडा पठाइदिने भन्दै तेस्रो व्यक्ति खडा गरेर करोड रुपैयाँसम्म ठगी गरिएको उजुरी आएको प्रहरीको भनाइ छ । ठगीको उजुरी आउने, तर शैक्षिक कन्सल्ट्यान्सीका मुख्य व्यक्ति फरार भइ उनीहरूका कर्मचारी मात्र पक्राउ पर्ने गर्दा ठगिएको रकम असुली गर्न पनि त्यतिकै समस्या रहेको बताइएको छ ।
काठमाडौं : वैदेशिक रोजगार व्यवसायी नेवाः समाजले वैदेशिक रोजगारको क्रममा अलपत्र भइ उद्धार गरिएका महिलाहरूलाई आश्रय दिएको अमृतसार सामाजिक सस्थालाई आर्थिक सहयोग गरेको छ ।
राजधानीको महाराजगञ्ज चक्रपथमा रहेको उक्त सामाजिक सस्थामा बिहीबार आयोजित एक सक्षिप्त कार्यक्रममा समाजका अध्यक्ष किशन प्रधान तथा महासचिव देवेन्द्र नारायण श्रेष्ठले उक्त संस्थाकी अध्यक्ष मूना गौतमलाई ५० हजार रूपैयाँको चेक हस्तान्तरण गरे ।
उक्त संस्थामा भिजिट भिसा लगायतका भिसामा बिदेश लगेर जवरजस्ती घरेलु कामदारको रूपमा लगाई अलपत्र पारिएको अवस्थामा उद्वार गरि नेपाल फर्काईएका महिलाहरूलाई आश्रयका अतिरिक्त मनोसामाजिक परामर्श दिने गरिएको छ। गैर नाफामुलक सामाजिक कार्यगर्ने उदेश्यले दर्ता भएको उक्त संस्थाले अघिल्ला दुई बर्षमा गरि विदेशबाट खालीहात अलपत्र अवस्थामा फर्काईएका ६ सय ८ जनालाई सेल्टर दिएको बताएको छ ।
उक्त संस्थाले नेपाल सरकारले घरेलु कामदारको रूपमा जान श्रम स्वीकृति प्रतिवन्ध लगाएको खाडी मुलुकमध्ये कुवेत, ओमान, यूएई, साउदी अरेबिया,कतार इराक, बंगलादेश, साईप्रस, लेवनान, मलेसिया आदि मुलुकबाट अलपत्र परेर फर्काइएका पीडित महिलाहरुलाई सेल्टर दिइरहेको अध्यक्ष गौतमले जानकारी दिइन् । त्यसमध्ये उक्त संस्थामा कुवेतबाट अलपत्र अवस्थामा फर्केका धेरै रहेका छन् । आर्थिक रूपमा कठिनाईको अवस्थामा रहेको आफ्नो संस्थालाई सहयोग गरेर सह्रानीय कार्य रहेको भन्दै अध्यक्ष गौतमले नेवाः समाजप्रति धन्यवाद साथ आभार प्रकट गरिन् ।
समाजका अध्यक्ष प्रधानले उक्त संस्थामा अलपत्र अवस्थामा उद्धार गरिएकी आस्था परियारलगायत आर्थिक समस्यामा रहेको जानकारी पाएपछि व्यवसायी संस्थाका सामाजिक उत्तरदायित्वको जिम्मेवारी अन्तरगत सहयोग प्रदान गरिएको बताए । जसलाई अति जरुरी छ, त्यस्ता व्यक्ति वा संस्थालाई आफ्नो समाजको क्षमताले भ्याएसम्म सहयोग गर्ने संस्थाको उदेश्य रहेको पनि अध्यक्ष प्रधानले जानकारी दिए ।
यस्तै महासचिव श्रेष्ठले पनि सामाजिक उत्तरदायित्वका भावनाले अमृतसार संस्थालाई सहयोग गरेको जानकारी दिए । मर्दा पर्दा नेवाः समाज भन्ने सामाजिक सेवाको उद्देश्य राखेर समाज क्रियाशील रहेको भन्दै महासचिव श्रेष्ठले आगामी दिनमा पनि क्षमता अनुसार गर्ने कामलाई निरन्तरता दिने बताए ।
त्यस अवसरमा अमृतसार सामाजिक संस्थाका तर्फबाट अभियन्ता आशा लामा, सुमित्रा बस्नेत, कल्पना थापा, कला गुरूङ, मनमाया राई, सपना गुरूङ, आशाप्यारी लक्ष्मी गन्दर्व, निरकुमार बुढाथोकी, मिनराज गौतम, कौशिला पुन र तारा श्रेष्ठ समाजका सल्लाहकार तथा मध्यान्ह दैनिकका सम्पादक मदनकुमार श्रेष्ठसहित समाजको कार्यसमिति सदस्यहरू चन्द्र कुमार श्रेष्ठ, अमित कुमार श्रेष्ठ, कृष्ण भक्त श्रेष्ठलगायतको उपस्थिति रहेको थियो । नेवा समाजले यसअघि बालुवाटारमा रहेको शिवपुरी माध्यमिक (प्राविधिक ) विद्यालयमा अध्ययनरत एक छात्रालाई एक बर्षको शैक्षिक शुल्कसहित पाठ्यपुस्तक र शैक्षिक सामग्री प्रदान गरेको थियो ।
काठमाडौं : नेपाली कांग्रेस निकट वैदेशिक रोजगार व्यवसायीहरुको संस्था नेपाल लोकतान्त्रिक वैदेशिक रोजगार व्यवसायी एशोसिएसनको नयाँ नेतृत्वका लागि चहलपहल शुरू भएको छ । एशोसिएसनको २०७८ साल वैशाख ७ गते भएको साधारण सभाले निर्वाचित गरेको नेतृत्वको दुई वर्षे कार्यकाल अर्को निर्णय नभएको अवस्थामा आगामी वैशाख ६ गते सकिँदै छ ।
एशोसिएसनको कार्यसमितिको बैठकले निर्वाचनका लागि निर्णय गरिसकेको छैन । तर भित्र–भित्रै आ–आफ्ना गुटमा छलफल र तयारी भइरहेको बताएइको छ । नेपाली कांग्रेसको शुभेच्छुक संस्थाको हैसियतमा रहेको एशोसिएसनबाट पार्टीको महाधिवेशनमा तीन जना व्यवसायीको प्रतिनिधित्व हुने भएकाले कार्यसमिति र नेतृत्वमा जान चाहनेको चासो बढेको बताइन्छ ।
एशोसिएसनको विधानअनुसार अध्यक्ष, वरिष्ठ उपाध्यक्ष, उपाध्यक्ष, महासचिव, सचिव, कोषाध्यक्ष, सहकोषाध्यक्ष र सदस्यहरुसहित २१ सदस्यीय कार्यसमिति रहने भएपनि १७ जनाको निर्वाचन हुनेछ । ४ जना कार्यसमिति सदस्य निर्वाचित अध्यक्षले मनोनयन गर्ने व्यवस्था रहेको छ ।
साधारण सभाको समय नजिकिएसँगै एशोसिएसनमा नेतृत्वका आकांक्षीहरु सक्रिय भएका छन् । अध्यक्षका लागि तारानाथ अर्याल, भवानी निरौला, कमल काफ्ले र भुवनसिंह गुरूङले इच्छा व्यक्त गरेको बताइएको छ । कार्यसमितिको बैठक बसेर साधारण सभा र निर्वाचनको मिति तोकिएपछि यसपटक अध्यक्ष तथा पदाधिकारीका लागि भित्री तयारी गरेर बसेका केही नयाँ अनुहार पनि चुनावी मैदानमा आउने एशोसिएसनमा आवद्ध एक वरिष्ठ व्यवसायी बताउँछन् ।
नेपाल वैदेशिक रोजगार व्यवसायी संघको गत निर्वाचनमा पराजित भएपनि एशोसिएसनले आफूलाई सबैभन्दा धेरै व्यवसायी सदस्य रहेको संस्था भएको दाबी गर्दै आएको छ । अघिल्लो पटक ३ सय २६ जनाले सदस्यता नवीकरण गराएकामध्ये नेतृत्वको निर्वाचनमा २ सय ६७ जनाले मतदानमा भाग लिएका थिए । अघिल्लो निर्वाचनमा अध्यक्षमा कुमुद खनालसहित वरिष्ठ उपाध्यक्षमा भगीरथ राई, द्वितीय उपाध्यक्षमा विनोदजंग केसी, तृतीय उपाध्यक्षमा दीपक थापा, महासचिवमा कमल काफ्ले, सचिवमा लक्ष्मण पौडेल, सह–सचिवमा हर्क लिम्बू, कोषाध्यक्षमा कैलाश कार्की र सहकोषाध्यक्षमा जफरूद्दिन मियाँ विजयी भएका थिए ।
यस्तै कार्यसमिति सदस्यमा कैलाश पाठक, पंकज कुमार मिश्रा, प्रदीप थापा, मदन पुरी, यमकुमार क्षेत्री केसी, रविन मेगाले मगर, राम बहादुर लामा तामाङ, सुनिता कर्माचार्य, सुनिता श्रेष्ठ र हिरा बुढाथोकी निर्वाचित भएका थिए । उनीहरूमध्ये धेरैले स्वतः माथिल्लो पदमा जान चाहेको समाचार स्रोतको भनाइ छ ।
यसअघि एशोसिएसन नेतृत्वमा प्रतिस्पर्धा गरेका कतिपय व्यवसायी नेपाल वैदेशिक रोजगार व्यवसायी संघको गत निर्वाचनमा उम्मेदवार भएकाले उनीहरूले अर्को कार्यकालसम्म पर्खिनु पर्ने मापदण्ड बनाउनुपर्ने तर्क कतिपय व्यवसायीको छ भने कतिपय व्यवसायीले एशोसिएसन व्यावसायिकसँगै पार्टीको शुभेच्छुक संस्था भएकाले पार्टीमा क्रियाशील सदस्यको ज्येष्ठताका आधारमा एशोसिएसनको आगामी निर्वाचनका लागि उम्मेदवारको मापदण्ड बनाउनुपर्ने धारणा राख्ने गरेको बताइन्छ ।
Kamalpokhari, Kathmandu
Phone : 01-5326366, 01-5328298
Mobile : 9841293261, 9841206411
Email : madhyanhadaily59@gmail.com
सूचना विभाग दर्ता नं. : 807/074/075
© 2024 मध्यान्ह सर्वाधिकार सुरक्षित | Managed by Bent Ray Technologies