बरियारपुरः नेपाल सरकारका कार्यवाहक प्रधानमन्त्री तथा शहरी विकास मन्त्री प्रकाशमान सिंहले विश्व प्रसिद्ध गढीमाई मन्दिर दर्शन गरेका छन् । प्रत्येक पाँच वर्षमा लाग्ने विश्व प्रसिद्ध गढीमाई मेलाका अवसरमा मन्त्री सिंहले आज गढीमाईको दर्शनका साथै मेलाको अवलोकन गरेकाे मेला मूल व्यवस्थान समितिले जनाएको छ ।
सिंहलाई मन्दिरमा महागढीमाई नगरपालिकाका नगरप्रमुख एवम् मेला मूल व्यवस्थापन समितिका अध्यक्ष उपेन्द्र प्रसाद यादवले स्वागत गर्दै माताप्रतिको भक्तिभाव एवम् गढीमाईको महत्वबारे जानकारी गराए । कार्यवाहक प्रधानमन्त्री सिंहसँगै वन राज्यमन्त्री रुपा विश्वकर्माले पनि मन्दिरको दर्शन गरिन् ।
मेला मूल व्यवस्थापन समितिका अध्यक्ष यादवले नेपाल, भारतसहितका विभिन्न देशहरूबाट दर्शन गर्न आउने भक्तजनहरूलाई मेलाले लोभ्याइरहेको बताए । उनले मेला रोचक बन्दै गएकाले मेला हेर्न आउनेहरूलाई सकारात्मक सन्देश प्रवाह गरिदिनहुन समेत आग्रह गरे । मंसिर १ गतेदेखि सुरु भएको मेला मंसिर ३० गते समापन हुने समेत उनले जानकारी दिए ।
